“Si Joshua ang Pioneer,” Higala, Oktubre 2024, 10–11.
Si Joshua ang Pioneer
“Ang pioneer mao ang usa ka tawo nga nag-una sa pagbuhat og usa ka butang,” miingon si Papa.
Kini nga istorya nahitabo sa USA.
Si Joshua naglukso-lukso diha sa daplin sa dalan samtang siya ug ang iyang pamilya naglakaw pauli gikan sa Simbahan. “Kahibalo ba kamo?” miingon siya. “Mohatag ko og pakigpulong sa Primary inig ka sunod Dominggo!”
“Sunod Dominggo kay Adlaw sa mga Pioneer, diin atong gihinumdoman ang mga pioneer nga miabot sa Walog sa Salt Lake,” miingon si Mama. “Seguro hisgotan nimo ang mahitungod sa mga pioneer.”
Nakahatag kadto ni Joshua og ideya. Pag-uli niya sa balay, gipakli niya ang Higala nga magasin. Nakakita siya og “Drowinga Kini” nga kalihokan nga nagpakita kon unsaon sa pagdrowing og gitabonan nga karomata ug mga baka, sama sa gigamit sa mga pioneer sa dihang sila mitabok sa kapatagan. Gusto niya nga magdrowing og larawan sa mga pioneer aron gunitan atol sa iyang pakigpulong. Gipagawas ni Joshua ang iyang mga krayola ug nagsugod og trabaho.
Sa dihang nahuman na og drowing si Joshua, gitabangan siya ni Papa sa pagsulat sa iyang pakigpulong. “Unsa man ang gusto nimong iistorya mahitungod sa mga pioneer?” Nangutana si Papa.
Nakahinumdom si Joshua sa usa ka awit mahitungod sa mga pioneer nga ilang nakat-onan sa Primary. “Nan, ang mga pioneer mao ang mga tawo nga naglakaw ug naglakaw ug naglakaw,” miingon siya.
“Husto ka! Ang mga Santos nga mitabok sa kapatagan naglakaw og layo kaayo,” miingon si Papa. “Apan nakahibalo ka ba nga ikaw usa usab ka pioneer?”
Gikunot ni Joshua ang iyang mga kilay. “Tungod kay maglakaw ko padulong sa eskwelahan usahay?”
Mikatawa si Papa. “Ikaw usa ka pioneer tungod kay nagbuhat ka og lisod nga mga butang,” miingon siya. “Ug gipili nimo ang insakto, bisan kon kini dili kanunay nga sayon.”
“Nindot,” miingon si Joshua. Espesyal ang pagbati nga mahimong usa ka pioneer!
“Ang pioneer mao usab ang usa ka tawo nga nag-una sa pagbuhat sa usa ka butang,” miingon si Papa. Sa dihang nahimo ka nga sakop sa atong pamilya, imong nakat-onan ang mahitungod sa ebanghelyo ug mipili sa pagsunod ni Jesukristo. Kana nakapahimo usab nimo nga pioneer!”
Si Joshua sinagop. Magkakita gihapon siya sa iyang tinuod nga pamilya ug maglingawlingaw uban kanila. Apan sa dihang mipuyo na siya kauban ni Mama ug Papa, iyang nakat-onan ang mahitungod ni Jesukristo ug sa Basahon ni Mormon. Mosimba siya uban nila. Nakaadto gani siya sa templo aron maselyo sa iyang bag-o nga pamilya.
Mingisi si Joshua. Aduna na siyay ideya kon unsa ang isulti sa iyang pakigpulong.
Tibuok semana, gipraktis ni Joshua kon unsa ang iyang isulti.
“Ganahan ka ba nga kuyogan ka nako og saka kon mohatag ka na sa imong pakigpulong?” Nangutana si Papa.
“Seguro mabasa ra nako ang tanan nga akong gisulat nga ako ra,” miingon si Joshua. “Apan pwede ba nimo nga gunitan ang larawan nga akong gi-drowing?”
Mipahiyom si Papa. “Siyempre.”
Sa pag-abot sa Dominggo, andam na si Joshua. Mibarog siya sa atubangan sa kwarto sa Primary. Mibarog si Papa tupad niya ug nagkupot sa drowing.
“Karon kay Adlaw sa mga Pioneer,” miingon si Joshua. “Ang mga pioneer mao ang mga tawo nga naglakaw og layo kaayo. Sama sa mga Santos nga mitabok sa kapatagan.”
Gitudlo ni Joshua ang larawan nga gigunitan ni Papa.
“Apan ang pioneer mao usab ang usa ka tawo nga nag-una sa pagbuhat sa usa ka butang,” miingon siya.
Mitan-aw si Joshua ni Mama. Siya nagpahiyom kaniya gikan sa likod sa kwarto.
“Ako usa ka pioneer,” miingon si Joshua. “Kon ako mabunyagan, ako ang unang tawo sa akong tinuod nga pamilya nga mopasakop sa Simbahan.” Mingisi siya. “Kitang tanan mahimong mga pioneer pinaagi sa pagbuhat og lisod nga mga butang ug sa pagpili nga mosunod ni Jesus. Sa ngalan ni Jesukristo, amen.”
Gibati ni Joshua ang kalipay samtang siya milakaw og balik aron molingkod uban sa iyang klase sa Primary. Nalipay siya nga nahimong usa ka Pioneer!
Mga Paghulagway pinaagi ni Melissa Manwill Kashiwagi