« យ៉ូសែប ស្ម៊ីធ—ព្យាការីរបស់ខ្ញុំ » ដើម្បីកម្លាំងនៃយុវជន ខែ មករា ឆ្នាំ ២០២១ ទំព័រ ៨–១១ ។
ចូរមកតាមខ្ញុំ
យ៉ូសែប ស្ម៊ីធ—ព្យាការីរបស់ខ្ញុំ
លោកជាព្យាការីរបស់ប្អូនៗផងដែរ ។ ប្អូនៗអាចសិក្សាអំពីការបង្រៀនរបស់លោកនៅឆ្នាំនេះ ដើម្បីធ្វើឲ្យលោកកាន់តែជាព្យាការីរបស់ប្អូន ។
មានអ្វីមួយដែលប្រធាន រ័សុល អិម ណិលសុន បានថ្លែងនៅក្នុងសន្និសីទទូទៅខែ មេសា ឆ្នាំ ២០២០ ដែលបានជះឥទ្ធិពលយ៉ាងខ្លាំងមកលើខ្ញុំគឺ ៖ « មិនថាបងប្អូនរស់នៅកន្លែងណា ឬស្ថានភាពបងប្អូនយ៉ាងណានោះទេ ព្រះអម្ចាស់ ព្រះយេស៊ូវគ្រីស្ទគឺជាព្រះអង្គសង្គ្រោះរបស់បងប្អូន ហើយព្យាការី របស់ព្រះ យ៉ូសែប ស្ម៊ីធគឺជាព្យាការីរបស់បងប្អូន » ( « Hear Him » [ Ensign ឬ Liahona ខែ ឧសភា ឆ្នាំ ២០២០ ទំព័រ ៨៨ ] ) ។
តាំងពីខ្ញុំនៅក្មេង នោះជាអារម្មណ៍ដែលខ្ញុំបានមាន—យ៉ូសែប ស៊្មីធគឺជាព្យាការីរបស់ខ្ញុំ ។ ព្យាការីនៃការស្ដារឡើងវិញរូបនេះបានជួយខ្ញុំឲ្យស្គាល់ព្រះយេស៊ូវគ្រីស្ទ និងដំណឹងល្អរបស់ទ្រង់ជាងព្យាការីណាៗទាំងអស់ ។ ខ្ញុំបានសិក្សាវិវរណៈទាំងឡាយនៅក្នុងគម្ពីរគោលលទ្ធិ និងសេចក្តីសញ្ញា ។ ហើយនៅពេលខ្ញុំនៅវ័យជំទង់ ប៉ាខ្ញុំបានឲ្យសៀវភៅមួយក្បាលស្ដីពីការបង្រៀនរបស់ព្យាការីយ៉ូសែប ស៊្មីធដល់ខ្ញុំ ហើយខ្ញុំបានអានវាយ៉ាងលឿន ។ ការសិក្សាអំពីការបង្រៀនទាំងនោះបានក្លាយជាដុំសាងសង់ដ៏ធំនៃទីបន្ទាល់របស់ខ្ញុំនៅលើដំណឹងល្អដែលបានស្ដារឡើងវិញនេះ ។
តាំងពីពេលនោះមក ខ្ញុំបានគិតថា ៖ តើវាគឺជាអ្វីទៅដែលចេញមកពីការបង្រៀនរបស់យ៉ូសែប ស៊្មីធ ដែលបានធ្វើឲ្យខ្ញុំមានចំណាប់អារម្មណ៍បែបនោះ ? តើអ្វីទៅដែលបានអនុញ្ញាតឲ្យព្រះវិញ្ញាណធ្វើជាសាក្សីអំពីសេចក្ដីពិតនៃការបង្រៀនទាំងនោះយ៉ាងរឹងមាំដូច្នេះមកកាន់ខ្ញុំ ? ខ្ញុំគិតថា វាជារឿងបីយ៉ាង ៖ ( ១ ) លោកបានដឹងអ្វីដែលលោកបានដឹង ហើយលោកបានថ្លែងអំពីវាយ៉ាងមុតមាំ ( ២ ) លោកមានរបៀបមួយក្នុងការពន្យល់ពីសេចក្ដីពិតយ៉ាងច្បាស់ៗ ដែលលោកបានរៀនតាមរយៈវិវរណៈ និង ( ៣ ) បុគ្គលិកលក្ខណៈ និងអត្តចរិតរបស់លោកតែងតែច្បាស់លាស់ជានិច្ច ។
លោកបានដឹងអ្វីដែលលោកបានដឹង ហើយលោកបានថ្លែងពីវាយ៉ាងមុតមាំ
តាំងពីការនិមិត្តដំបូងមក យ៉ូសែប ស៊្មីធបានប្រឈមមុខនឹងការបៀតបៀន ដោយសារតែការចែកចាយនូវអ្វីដែលលោកបានដឹងតាមរយៈវិវរណៈ ។ ប៉ុន្ដែលោកបានដឹងថា លោកមិនអាចបដិសេធវាបានឡើយ ៖ « ហេតុដូចម្ដេចក៏បៀតបៀនខ្ញុំ ព្រោះតែខ្ញុំបានប្រាប់ពីការពិត ? ខ្ញុំពិតជាបានឃើញការនិមិត្តមែន ហើយតើខ្ញុំជាអ្វីទៅ ដែលអាចទាស់នឹងព្រះបាន ហើយចុះតើហេតុអ្វីបានជាពិភពលោកគិតចង់ឲ្យខ្ញុំបដិសេធអ្វីដែលខ្ញុំពិតជាបានឃើញនោះយ៉ាងដូច្នេះ ? ត្បិតខ្ញុំបានឃើញការនិមិត្ត ខ្ញុំដឹងថាខ្ញុំបានឃើញការនិមិត្ត ហើយខ្ញុំដឹងថា ព្រះទ្រង់ក៏ដឹងថាខ្ញុំបានឃើញការនិមិត្ត ហើយខ្ញុំពុំអាចបដិសេធរឿងនេះ ឬក៏ហ៊ានធ្វើយ៉ាងដូច្នោះបានឡើយ » ( យ៉ូសែប ស្មីធ—ប្រវត្តិ ១:២៥ ) ។
ទោះបីជាលោកបានដឹងថា វានឹងនាំឲ្យមានការបៀតបៀន និងការស្អប់កាន់តែខ្លាំងដោយសារការធ្វើដូច្នោះក្ដី ក៏យ៉ូសែប ស៊្មីធបានប្រកាសយ៉ាងមុតមាំអំពីសេចក្ដីពិត ដែលលោកបានដឹងមកពីព្រះពេញមួយជីវិតរបស់លោកដែរ ។
ឧទាហរណ៍ ៖
ទោះបីជាមនុស្សភាគច្រើននៅក្នុងពិភពគ្រីស្ទានបានជឿថា មនុស្សត្រូវបានបង្កើតដោយព្រះចេញពីភាពទទេយ៉ាងណាក្ដី ក៏យ៉ូសែប ស៊្មីធបានបង្រៀនអ្វីមួយផ្សេងពីនេះយ៉ាងមានទំនុកចិត្ត ៖
« កាលដើមដំបូង មនុស្សក៏បាននៅជាមួយនឹងព្រះដែរ ។ បញ្ញា ឬពន្លឺនៃសេចក្ដីពិតក៏ពុំបានបង្កើត ឬធ្វើឡើង ឬអាចបង្កើត ឬធ្វើឡើងឡើយ » ( គោលលទ្ធិ និង សេចក្ដីសញ្ញា ៩៣:២៩ ) ។
« ព្រលឹង—គំនិតរបស់មនុស្ស—វិញ្ញាណដ៏អមតៈ ។ តើវាបានមកពីណា ? មនុស្សដែលបានរៀនសូត្រទាំងអស់ និងបញ្ញាវន្ដខាងទ្រឹស្ដីទាំងឡាយថ្លែងថា ព្រះបានបង្កើតវានៅដើមដំបូង ប៉ុន្ដែវាមិនមែនដូច្នោះឡើយ ៖ គំនិតនេះឯងដែលធ្វើឲ្យមនុស្សអន់ថយនៅក្នុងការប៉ាន់ស្មានរបស់ខ្ញុំ ។ ខ្ញុំមិនជឿលើគោលលទ្ធិនេះទេ ខ្ញុំដឹងច្បាស់ជាងនេះ ។ សូមប្រុងស្ដាប់ការណ៍នេះ ឱ មនុស្សលោកទាំងអស់នៅចុងផែនដីអើយ ដោយសារព្រះបានមានបន្ទូលមកកាន់ខ្ញុំដូច្នេះ ហើយប្រសិនបើបងប្អូនមិនជឿខ្ញុំទេ វាក៏នឹងមិនធ្វើឲ្យសេចក្ដីពិតនេះគ្មានអានុភាពនោះដែរ » ( Teachings of Presidents of the Church: Joseph Smith [ ឆ្នាំ ២០០៧ ] ទំព័រ ២០៩ ) ។
លោកបានពន្យល់ពីសេចក្ដីពិតយ៉ាងច្បាស់ៗ
ពេលខ្លះ យ៉ូសែប ស៊្មីធបានផ្ដល់តម្រុយថា លោកបានដឹងពីអាថ៌កំបាំងរបស់ព្រះជាច្រើនទៀត ជាងអ្វីដែលលោកអាចចែករំលែកជាមួយនឹងពិភពលោកនេះបាន ។ ប៉ុន្ដែពេលលោកបានបង្រៀន លោកមានរបៀបមួយក្នុងការធ្វើឲ្យសេចក្ដីពិតរបស់ព្រះច្បាស់លាស់ និងសាមញ្ញ ។
ឧទាហរណ៍ ៖
តាំងពីការនិមិត្តដំបូងមក យ៉ូសែប ស៊្មីធបានដឹងពីសេចក្ដីពិតជាច្រើនអំពីនិស្ស័យនៃព្រះ ដែលជាព្រះវរបិតាដ៏អស់កល្បជានិច្ច ។ ហើយនៅក្នុងការបង្រៀនរបស់លោក លោកបានពន្យល់ពីសារសំខាន់នៃសេចក្ដីពិតទាំងនេះ ។ ឧទាហរណ៍ លោកបានថ្លែង ៖
« ប្រសិនបើមនុស្សមិនយល់ពីលក្ខណៈរបស់ព្រះ នោះពួកគេក៏មិនយល់ពីខ្លួនពួកគេដែរ » ( Teachings: Joseph Smith ទំព័រ ៤០ ) ។ នោះគឺជាសេចក្ដីថ្លែងការណ៍ដ៏ច្បាស់លាស់មួយ ដែលចូលដល់ដួងចិត្តថា ព្រះគឺជានរណា យើងគឺជានរណា តើយើងមានទំនាក់ទំនងអ្វីជាមួយទ្រង់ ហើយតើយើងមានសក្ដានុពលអ្វីខ្លះ ។
លោកបានបន្ដសេចក្ដីនេះជាមួយនឹងសេចក្ដីថ្លែងការណ៍នេះ ៖ « មានគ្រាមួយព្រះក៏ដូចជាយើងនៅពេលនេះដែរ ហើយជាអង្គដែលបានតម្កើងឡើង » ( Teachings: Joseph Smith ទំព័រ ៤០ ) ។ ថែមទាំងច្បាស់ជាងនេះទៀត ។
រួចហើយលោកបានបង្រៀនអំពីការណ៍នេះ ៖ « ព្រះទតឃើញថាអង្គទ្រង់ស្ថិតនៅក្នុងចំណោមពួកវិញ្ញាណ និងសិរីល្អ ដោយសារតែទ្រង់មានព្រះប្រាជ្ញាញាណដ៏ច្រើនលើសលប់ បានទតឃើញយ៉ាងត្រឹមត្រូវដើម្បីបង្កើតក្រឹត្យវិន័យដែលវិញ្ញាណផ្សេងទៀតអាចមានឯកសិទ្ធិដើម្បីអភិវឌ្ឍខ្លួនឲ្យដូចជាទ្រង់ » ( Teachings: Joseph Smith ទំព័រ ២១០ ) ។ យ៉ូសែប ស្ម៊ីធបានបង្ហាញអ្វីមួយនៅត្រង់នេះ ដែលជាមូលដ្ឋានគ្រឹះនៃផែនការរបស់ព្រះវរបិតាសួគ៌ ៖ ព្រះវរបិតាសួគ៌សព្វព្រះទ័យឲ្យយើងប្រែក្លាយដូចជាទ្រង់ ។
បុគ្គលិកលក្ខណៈ និងអត្តចរិតរបស់លោកតែងតែច្បាស់លាស់ជានិច្ច
របៀបដែលយ៉ូសែប ស៊្មីធបានបង្ហាញខ្លួនលោក ផ្ដល់ជាគំនិតមួយឲ្យយើងដឹងថា លោកគឺជានរណា ហើយតើលោកមានលក្ខណៈជាមនុស្សម្នាក់បែបណា ជាព្យាការីម្នាក់យ៉ាងណាដែរ ។ នេះគឺជារឿងសំខាន់ ពីព្រោះទំនាក់ទំនងជាមួយនឹងមនុស្ស ធ្វើឲ្យយើងមានទំនាក់ទំនងនឹងគោលគំនិតកាន់តែងាយស្រួល ។ បុគ្គលិកលក្ខណៈរបស់យ៉ូសែបបានឆ្លុះបញ្ចាំងនៅក្នុងការបង្រៀនរបស់លោក ។
ឧទាហរណ៍ ៖
ទោះបើជាទូទៅយ៉ូសែប ស្ម៊ីធមានអត្តចរិតរួសរាយតាំងពីកំណើតក្ដី ( សូមមើល យ៉ូសែប ស្ម៊ីធ —ប្រវត្តិ ១:២៨ ) ក៏លោកមិនធ្វើការដោយទន់ជ្រាយដែរ នៅពេលដែលព្រះអម្ចាស់បានបង្គាប់អ្វីមួយនោះ ។ លោកបានរៀនតាមរយៈបទពិសោធន៍ពីផលវិបាកនៃការវង្វេងចេញពីបទបញ្ញត្តិបែបនោះ ( ឧទាហរណ៍ សូមមើល គោលលទ្ធិ និង សេចក្ដីសញ្ញា ៣:៤–៩ ) ។ ខ្ញុំគិតថា ការលាយឡំគ្នានៃចរិតរួសរាយ និងការចង់ឲ្យគេដឹងពីភាពជាសិស្សដែលមានគំនិតមុតមាំបែបនេះ—ហើយបើនិយាយផ្ទាល់ខ្លួនទៅ វាស្រដៀងនឹងខ្ញុំណាស់ ។
ឥឡូវនេះ ក្នុងនាមជាព្យាការីនៃការស្ដារឡើងវិញ យ៉ូសែប ស៊្មីធត្រូវបានបង្គាប់ឲ្យបង្រៀនអំពីសេចក្ដីពិតដែលបានបើកសម្ដែងមកពីព្រះ ដែលភាគច្រើនវាថ្មីចំពោះមនុស្សគ្រប់គ្នា ។ យ៉ូសែបត្រូវព្យាយាមជួយមនុស្សឲ្យរៀនអំពីសេចក្ដីពិតថ្មីៗទាំងនេះ ។ ប៉ុន្ដែពេលខ្លះ វាតឹងចិត្តខ្លាំងណាស់ ។ មានពេលមួយ លោកបានមានប្រសាសន៍ ៖
« មានការពិបាកយ៉ាងខ្លាំងដើម្បីដាក់អ្វីមួយឲ្យចូលក្នុងខួរក្បាលរបស់មនុស្សជំនាន់នេះ ។ វាប្រៀបដូចជាការពុះកំណាត់ឈើនឹងនំប៉័ងពោតមួយដុំ ហើយពុះល្ពៅមួយរកដង្កូវ ។ សូម្បីតែពួកបរិសុទ្ធក៏នៅតែយឺតនឹងយល់ដែរ » ( Teachings: Joseph Smith ទំព័រ ៥៤០ ) ។
នេះគឺជាប្រធានបទដ៏សំខាន់បំផុតមួយសម្រាប់យ៉ូសែប ស៊្មីធ ។ វាប្រាកដជាមានអ្វីជាច្រើនដែលលោកចង់ឲ្យមនុស្សដឹង និងយល់ ហើយឱបក្រសោបវា ព្រមទាំងរស់នៅតាម—តែពួកគេមិនអាចធ្វើបាន ។ ប៉ុន្ដែដំណើររឿងប្រៀបប្រដូចសាមញ្ញមួយមកពីទាហានជួរមុខរបស់សហរដ្ឋអាមេរិកនៅសតវត្សរ៍ទីដប់ប្រាំបួនបានគូរជារូបភាពដ៏អស្ចារ្យមួយ ហើយបើកជាកូនបង្អួចមួយអំពីអត្តចរិតរបស់យ៉ូសែប ស៊្មីធ ។
មានផ្នែកជាច្រើនផ្សេងទៀតអំពីបុគ្គលិកលក្ខណៈរបស់យ៉ូសែប ស្ម៊ីធដែលឆ្លុះបញ្ចាំងនៅក្នុងការបង្រៀនរបស់លោក ។ ឧទាហរណ៍ សេចក្ដីស្រឡាញ់របស់លោកចំពោះមិត្តភក្ដិ ៖ « ដួងចិត្តរបស់ខ្ញុំគួរតែស្រឡាញ់អ្នកទាំងនោះ ហើយដៃរបស់ខ្ញុំគួរតែធ្វើការងារសម្រាប់អ្នកទាំងនោះ ដែលស្រឡាញ់ និងធ្វើការងារសម្រាប់ខ្ញុំ ហើយនឹងបានឃើញថាមានចិត្តស្មោះត្រង់ចំពោះមិត្តរបស់ខ្ញុំ » ( Teachings: Joseph Smith ទំព័រ ៤៦២ ) ។
ឬសណ្ដានចិត្ត និងចិត្តសប្បុរសរបស់លោក ៖ មានម្ដងនោះពេលពួកបុរសបានថ្លែងពីអារម្មណ៍សោកស្ដាយរបស់ពួកគេចំពោះបុរសម្នាក់ ដែលផ្ទះបានឆេះ នោះយ៉ូសែបបានតបភ្លាមៗថា « ខ្ញុំសោកស្ដាយចំពោះបងប្រុសម្នាក់នេះចំនួនប្រាំដុល្លារ តើបងប្អូនទាំងអស់គ្នាសោកស្ដាយប៉ុន្មានដែរ ? » ( Teachings: Joseph Smith ទំព័រ ៤៦០ ) ។
បន្ទាប់មកគឺ សេចក្ដីស្រឡាញ់របស់លោកចំពោះគ្រួសារ សេចក្ដីទៀងត្រង់ ការបន្ទាបខ្លួន ទំនុកចិត្ត សេចក្ដីយុត្តិធម៌ និងស្មើភាពគ្នា សេចក្ដីជំនឿនៅក្នុងពេលមានឧបសគ្គ និងការរងទុក្ខ ។ លោកមានទាំងអស់ ដែលបានបង្ហាញស្របតាមសេចក្ដីពិតដ៏អស់កល្បជានិច្ច និងគោលការណ៍ទាំងឡាយដែលត្រូវរស់នៅតាម ។
លោកគឺជាព្យាការីរបស់ខ្ញុំ
ប្រាកដណាស់ យ៉ូសែប ស៊្មីធនៅតែរងការវាយប្រហារ និងការរិះគន់រហូតមកដល់ពេលសព្វថ្ងៃនេះ ។ ប៉ុន្ដែដូចជាលោកបានមានប្រសាសន៍ថា « ខ្ញុំមិនដែលប្រាប់អ្នកថា ខ្ញុំឥតខ្ចោះនោះទេ ប៉ុន្ដែពុំមានកំហុសនៅក្នុងវិវរណៈដែលខ្ញុំបានបង្រៀននោះទេ » ( Teachings: Joseph Smith ទំព័រ ៥២២ ) ។ យើងអាចធ្វើជាសាក្សីដ៏មុតមាំអំពីការពិតថា លោកគឺជាព្យាការីម្នាក់ ។ ខ្ញុំឃើញថាវាងាយស្រួលដើម្បីថ្លែងទីបន្ទាល់អំពី យ៉ូសែប ស៊្មីធ—មិនមែនដោយសារមានចម្លើយងាយមួយចំពោះសំណួរទាំងអស់ ដែលមនុស្សអាចចោទសួរអំពីលោកនោះទេ ប៉ុន្ដែដោយសារខ្ញុំបានសិក្សាអំពីវិវរណៈរបស់លោក និងការបង្រៀនជាព្យាការីទាំងឡាយ ហើយបានមានអារម្មណ៍ពីព្រះវិញ្ញាណបរិសុទ្ធ ដែលថ្លែងទីបន្ទាល់ថាវាគឺជាការពិត ។ គឺដូចជាយ៉ូសែបផ្ទាល់ធ្លាប់បាននិយាយ ៖
« ខ្ញុំអាចភ្លក់រសជាតិនៃគោលការណ៍នៃជីវិតដ៏នៅអស់កល្បជានិច្ច ហើយបងប្អូនក៏អាចធ្វើបានដូចគ្នាដែរ ។ វាត្រូវបានប្រទានមកខ្ញុំតាមរយៈវិវរណៈនៃព្រះយេស៊ូវគ្រីស្ទ ហើយខ្ញុំដឹងថា នៅពេលខ្ញុំប្រាប់បងប្អូនពីពាក្យពេចន៍នៃជីវិតដ៏នៅអស់កល្បទាំងនេះ ដូចដែលវាត្រូវបានប្រទានមកខ្ញុំ នោះបងប្អូននឹងភ្លក់ដឹងវា ហើយខ្ញុំដឹងថា បងប្អូនក៏ជឿលើវាដែរ ។ បងប្អូននិយាយថា ទឹកឃ្មុំផ្អែមឆ្ងាញ់ ហើយខ្ញុំក៏និយាយដូច្នេះដែរ ។ ខ្ញុំក៏អាចភ្លក់វិញ្ញាណនៃជីវិតដ៏នៅអស់កល្បបានផងដែរ ។ ខ្ញុំដឹងថាវាល្អ ហើយនៅពេលខ្ញុំប្រាប់បងប្អូនអំពីការណ៍ទាំងនេះ ដែលត្រូវបានប្រទានមកខ្ញុំតាមរយៈការបំផុសគំនិតពីព្រះវិញ្ញាណបរិសុទ្ធ នោះបងប្អូននឹងទទួលយកថាវាផ្អែមមែន ហើយរីករាយកាន់តែខ្លាំងឡើងៗ » ( Teachings: Joseph Smith ទំព័រ ២៥២ ) ។
ខ្ញុំបានភ្លក់ភាពផ្អែមល្ហែមនោះហើយ ។ វាត្រូវបានចែកចាយមកខ្ញុំដោយព្យាការីរបស់ខ្ញុំ គឺយ៉ូសែប ស៊្មីធ ។ ហើយដូចជាប្រធានណិលសុនបានថ្លែងដែរ លោកគឺជាព្យាការីរបស់ប្អូនៗផងដែរ ។ ប្អូនៗអាចធ្វើការសិក្សាយ៉ាងម៉ត់ចត់អំពីជីវិត និងការបង្រៀនរបស់លោកនៅឆ្នាំនេះក្នុងសៀវភៅ ចូរមកតាមខ្ញុំ ។ រួចហើយប្អូនៗអាចធ្វើជាសាក្សីអំពីសេចក្ដីពិតដ៏ផ្អែមនេះ ដែលលោកបានជួយប្អូនៗឲ្យភ្លក់ ។