“Fakafehokotakí,” Ki Hono Fakamālohia ʻo e Toʻu Tupú, Sune 2021, takafi muʻa ki lotó.
Fakafehokotakí
‘Āmoni S.
13, Samaika
Laʻitā meia Christina Smith
Ko ha tokotaha vaʻinga soka au. ʻI he akoako vaʻinga soká, ʻoku ʻai ʻe he faiakó ke mau fakahoko ha ngaahi sivi lahi ʻo e kātakí mo e fakamālohisinó. ʻOku ou ongoʻi fiefia ʻi he taimi ʻoku ou fokotuʻu ai ha ngaahi taumuʻa pea ikunaʻi kinautolú.
Naʻá ku fokotuʻu ha taumuʻa fakalaumālie ke u ʻāʻā ʻi he taimi ʻoku ou lotu ai ʻi he poʻulí. Naʻá ku anga ʻaki ʻeku tokoto pē ʻi hoku mohengá ʻi he taimi ʻoku ou lotu aí, ka ko e taimi ní ʻoku ou tangutu pe tūʻulutui. Naʻá ku feinga foki ke liliu ʻa e meʻa ʻoku ou lea ʻaki ʻi heʻeku lotú pea ʻoua ʻe toutou lea ʻaki ʻa e meʻa tatau. Kuo tokoniʻi au ʻe he taumuʻa foʻoú ni ke u ongoʻi fiefia ange ʻi he poʻulí he kuo faifai peá u fakakakato ʻa e ngaahi lotú!
ʻOku fuʻu leʻo lahi hoku kaungāʻapí, ko ia ai ʻoku lava pē ke faingataʻa ke fanongo ki he leʻo ʻo e Laumālié. ʻOku ou faʻa ongoʻi he taimi ʻe niʻihi hangē ʻoku ou toki lava pē ʻo ongoʻi ʻa e Laumālie Māʻoniʻoní ʻi he taimi ʻoku ou ʻi he tuʻunga malangá ai ʻo fai ha lea, tufa ʻa e sākalamēnití, pe lotu ʻi he poʻulí. Ka ʻoku fokotuʻu ʻe heʻeku ongomātuʻá ha ngaahi sīpinga lelei ʻi homau ʻapí, ʻaki hono faʻa fakahoko ʻa e ako folofola fakafāmilí mo hono fokotuʻu ʻa e ʻū fakatātā ʻo Sīsū Kalaisí pea mo e Tohi ʻa Molomoná ʻi homau peitó. Ko e taimi kotoa pē ʻoku ou sio ai ki he ngaahi fakatātā ko iá, ʻoku fakamanatu mai kiate au ʻa e lotú mo e ako folofolá, pea ʻoku tokoniʻi au ʻe he ngaahi meʻa ko iá ke u ongoʻi ʻa e Laumālié foki.