“Faifekau ʻi he 6 pongipongí,” Ki Hono Fakamālohia ʻo e Toʻu Tupú, Sune 2021, 6–7.
Haʻu, ʻo Muimui ʻIate Au
Faifekau ʻi he 6 pongipongí
Naʻe ʻamanaki ke u talaange ki hoku kaungāmeʻá ʻa e ʻuhinga naʻe pau ai ke u taʻofi ʻa e fetohiʻaki ʻi he telefoní ʻi he efiafí, mo e kiʻi ueʻi au ʻe he Laumālié.
ʻI heʻeku tupu haké, ne u fie maʻu maʻu pē ke u hoko ko ha mēmipa ngāue fakafaifekau. Naʻá ku ʻiloʻi ʻa e mahuʻinga hono vahevahe ʻo e ongoongoleleí mo e kakai ʻoku ʻikai ke tau tui tataú. Naʻá ku lotua foki ha ngaahi faingamālie. Ka neongo iá, naʻe ʻikai ha taha ʻi he kakai naʻá ku ʻiloʻí ʻa ia ne ʻikai ke nau kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ne nau fieʻilo ki ai. Naʻe liliu kotoa ia ʻi he taimi ne u hū ai ki he ako māʻolungá ʻo fetaulaki ai mo Lopí.*
Ne u kaungāmeʻa mo Lopi ʻi he taimi ne mau fakaʻaliʻali ai ʻi ha hiva ʻi he fale faiva ʻo e koló. ʻI heʻene ʻosí, naʻá ma kei fetuʻutaki pē peá ma faʻa ō ʻo ʻeva.
ʻI ha efiafi ʻe taha naʻá ma fetohiʻaki ʻi he telefoní. Naʻá ku fie maʻu ke tuku ā ʻema fetohiʻakí ka u mohe koeʻuhí ko e semineli pongipongi he pongipongi hono hokó.
“Fakamālō atu heʻeta fetohiʻakí, ka ʻoku ʻi ai e meʻa ke u fakahoko pongipongia ʻauhu!” Na‘á ku ʻave ‘a e pōpoakí.
“Ko e hā e taimí?” Ko e fehuʻi ia ʻa Lopí.
Naʻá ku tali atu “5:30 pongipongi.” Naʻe ʻikai ke u fakapapauʻi pe ʻoku totonu ke u fakamatalaʻi ʻa e ʻuhingá, ka naʻá ku ongoʻi ha kiʻi ueʻi mei he Laumālié ke vahevahe.
Na‘á ku pehē ange, “ʻOku fakahoko ʻeku kalasi semineli pongipongia he 6 pongipongi. Ko ha kalasi ia ‘i hoku Siasí ʻa ia ʻoku mau ako ai ʻa e folofolá mo ako fekauʻaki mo e ʻOtuá kimuʻa he taimi akó. ‘Oku ou ongoʻi fiefia maʻu pē ʻi he hili ʻa e kalasí.”
Hili iá, ne u ongo‘i ha toe kiʻi ueʻi ‘e taha: Ne u pehē ange, “ʻOku totonu ke ke haʻu ki ai ʻi ha taimi.”
Naʻe fiefia ʻa Lopi ʻi he taimi ne u fakamatalaʻi ai pe ko e hā ʻa e seminelí. “Ongo fakafiefia ia! Te u lava ʻo ʻaka pasikala atu. Mahalo te u ʻalu atu ʻapongipongi.”
Ne u ʻuluaki fakakaukau ko e fakakata pē ʻa Lopi. Ka ʻi he pongipongi hono hokó ʻi heʻeku aʻu atu mo ʻeku tangataʻeikí ki he feituʻu tauʻanga meʻalelé kimuʻa he 6 pongipongí, naʻe talitali mai ʻa Lopi ʻi tuʻa ʻi he ʻapisiasí mo ʻene pasikalá. Ne u fuʻu ʻohovale.
ʻI he ʻaho ko iá ne ako ʻemau kalasí fekauʻaki mo e ngaahi temipalé ʻi heʻemau ako ʻa e Fuakava Motuʻá. Naʻe saiʻia ʻa Lopi ʻi he kotoa ʻo e lēsoní—naʻá ne saiʻia ʻi he kotoa ʻo e ngaahi fakatātaá pea ako mei he kotoa ʻo e fānau akó fekauʻaki mo e ngaahi founga ʻoku fakatahaʻi ai kitautolu ʻe he ngaahi temipalé mo e ʻOtuá mo hotau ngaahi fāmilí.
Naʻe talitali lelei ʻe he faiakó mo e fānau ako kehé ʻa Lopi neongo naʻe ʻikai ke tomuʻa fakahā mai te ne haʻu. Naʻe toutou haʻu pē ʻa Lopi ʻi he toenga ʻo e taʻu fakaakó. Naʻá ne haʻu foki ki ha ngaahi ʻekitivitī ʻa e toʻu tupú. Naʻá ne kaungāmeʻa mo e toʻu tupu kehe ʻi hoku uōtí mo e siteikí. ʻI he fakaʻosinga ʻo e taʻu fakaakó, naʻa mau omi mo Lopi ki he faeasaiti fakaʻosi ʻa e seminelí ki he taʻú.
ʻI he faʻahitaʻu māfana hono hokó naʻe hiki hoku fāmilí ki ha uooti kehe, ka ʻi he taimi naʻe toe kamata ai ʻa e akó, naʻe kei hoko atu pē ʻa e ʻalu ʻa Lopi ki he seminelí, pea naʻe talitali lelei ia ʻe he kotoa ʻo e kalasí.
Naʻe ʻikai ke kau ʻa Lopi ki he Siasí, ka kimui ange aí, naʻá ma faʻa talanoa maʻu pē fekauʻaki mo e lelei ʻo e meʻa naʻá ne aʻusiá ʻi he taimi ne ma fetaulaki aí.
Naʻe akoʻi au ʻe he aʻusia ne u maʻu ʻi hono fakaafeʻi ʻo Lopi ki he seminelí, ʻoku ʻikai ʻuhinga pē hono vahevahe ʻo e ongoongoleleí ki hono fakaafeʻi e ngaahi kaungāmeʻá ke feʻiloaki mo e kau faifekaú. Ko hono mo‘oní, mahalo he ʻikai ke nau teitei kau ki he Siasí. ʻE lava pē ke faingofua hangē ko hono vahevahe ʻa e meʻa ʻoku hoko ʻi hoʻo moʻuí, ko ha mēmipa ʻo e Siasí. Pea kapau ʻoku nau saiʻia ai, te ke lava ʻo fakaafeʻi kinautolu ke nau ako lahi ange fekauʻaki mo e Siasí.
Kapau ʻokú ke kumi ha ngaahi faingamālie ke vahevahe ai ʻa e ongoongoleleí, feinga ke kamata he meʻa ʻokú ke lolotonga ʻi aí mo e meʻa kuó ke ʻosi fakahokó. ʻOku lahi ʻaupito ha ngaahi founga faingofua ke fakahaaʻi ai hoʻo tuí mo hoʻo fakamoʻoní ʻaki hono vahevahe ʻa e ngaahi meʻa ʻokú ke fakahokó ʻa ia ʻokú ne ʻomi koe ke ke ofi ange ai kia Kalaisí. Falala ki he Laumālié pea te Ne tokoni ke tataki atu koe.