“ʻOku faingataʻa kiate au ke u feohi lelei mo ʻeku ongomātuʻá. Te u fakatupulaki fēfē homau vā fetuʻutakí?” Ki Hono Fakamālohia ‘o e Toʻu Tupú, Sune 2021, 30–31.
Ngaahi Fehuʻi mo e Talí
“ʻOku faingataʻa kiate au ke u feohi lelei mo ʻeku ongomātuʻá. Te u fakatupulaki fēfē homau vā fetuʻutakí?”
Kamata he Fanga Kiʻi Meʻa Iiki mo Faingofuá
“Fakahaaʻi hoʻo ʻofa kiate kinautolú ʻo fakafou ʻi he ngaahi ngāué. Lotu fakataha ‘i he taimi maʻu me‘atokoní. Tokoni kiate kinautolu ‘i he ngaahi ngāue fakaʻapí. Lotua kinautolu. ʻE hoko maʻu pē ʻetau ongomātuʻá ko ʻetau ongomātuʻá ia, pea te tau hoko maʻu pē ko ʻena fānau. Ako ke fakaʻapaʻapaʻi kinaua pea talangofua. ʻOku ʻikai teitei fuʻu tōmui ke fakaleleiʻi ho vā fetuʻutaki mo kinauá.”
Nikki F., taʻu 20, Mindanao, ʻOtu Filipainí
Ke Ke Angaʻofa
“Feinga ke ke ʻiloʻi pe ko e hā e meʻa ʻoku saiʻia ai hoʻo ongomātuʻá. Ko e meʻa ʻe taha naʻe tokoni maʻu pē kiate aú, ko hono tokangaʻi ha pō vaʻinga fakafāmili. Kapau te ke feinga ke kiʻi angaʻofa ange, pea faʻa fakafanongo lahi ange, te ke lava ke fakaleleiʻi e ngaahi vā fetuʻutakí.”
Viliami S., taʻu 12, Vesīniá, USA
ʻAhiʻahiʻi Fakataha ʻa e Ngaahi Meʻa Foʻoú
“Te u feinga ke ʻilo ʻa e ngaahi meʻa ʻoku ou faitatau ai mo ʻeku ongomātuʻá, hangē ko e mūsiká, sipotí, pe feimeʻatokoní, hili iá peá u kumi ha ngaahi faingamālie ke fakahoko fakataha mo kinaua ʻa e ngaahi meʻa ko iá. ʻE lava ke fakafiefia ʻa e fengāueʻaki ʻi ha ngaahi meʻa ʻoku nau takitaha saiʻia mo manako aí.”
‘Ivi D., taʻu 16, Uēlesi, Pilitānia
Fakafanongo
“Ko ha meʻa te ke lava ʻo fakahoko, ko e fakafanongo ki hoʻo ongomātuʻá mo talangofua ki heʻena ngaahi tuʻutuʻuní. ʻOku tau fakakaukau he taimi ʻe niʻihi ʻoku tau tonu, ka ʻe lava ke ola lelei ʻa e faleʻi ʻetau ongomātuʻá ʻi he ʻamuí. Ko e taha foki ia ʻo e Ngaahi Fekau ʻe Hongofulú ke “fakaʻapaʻapa ki hoʻo tamaí mo hoʻo faʻeé” (‘Ekesōtosi 20:12). Te tau ofi ange ai ki heʻetau Tamai Hēvaní mo ʻetau ongomātuʻá ʻi he talangofua ki he fekau ko ʻení.”
Seti S., taʻu 14, ‘Olikoni, USA
Ako Folofola Fakafāmilí
“ʻE lava ke fakaleleiʻi ʻaki ʻa e fanga kiʻi meʻa faingofua hangē ko e lotu fakafāmilí mo hono ako fakataha ʻo e Haʻu, ʻo Muimui ʻIate Au. ʻE hoko ia ko e meʻa ke mou faaitaha ai pea te ke ongoʻi e takaua ʻa e Laumālié. ʻI hoʻomou ako fakatahá, ʻe fakamālohia ai ʻa e ngaahi vā fakafāmilí. Te ke maʻu ai ha fakamoʻoni ʻoku taʻengata mo mahuʻinga ʻa e ngaahi fāmilí.”
Fātima S., ta‘u 16, Piula, Pelū
Ngāue Koeʻuhí ko e ʻOfá
“ʻOku ʻikai teitei hoko ko ha fakakaukau kovi ke ke fakahoko ha ngaahi ngāue fakaʻapi ʻe niʻihi ʻo ʻikai ke ke tatali ke na toki talaatu ke ke fakahoko kinautolu. Kapau ʻoku ʻi ai ha meʻa ʻoku ʻita ai hoʻo ongomātuʻá, hangē ko hano fakamoleki ha taimi lahi ʻi ha meʻangāue fakaʻilekitulōniká. ʻAi ke na ʻilo ʻokú ke tokanga ki heʻena fakakaukaú ʻaki haʻo feinga ke fakangatangata ʻa e taimi ʻi he meʻangāué. Fakahaaʻi kiate kinaua ʻokú ke tokanga ʻaki haʻo tuku haʻo taimi ke mou feohi ai. ʻE lahi ange ʻa e falala atu hoʻo ongomātuʻá kiate koé pea ʻe lelei ange hoʻomou feohí.”
Justice C., 18, ʻIutā, USA