“‘E Lava Ke Fakanatula Hoʻo Vahevahe ʻa e Ongoongoleleí,” Ki Hono Fakamālohia ʻo e Toʻu Tupú, Sune 2021, 6.
Haʻu, ʻo Muimui ʻIate Au
‘E Lava Ke Fakanatula Hoʻo Vahevahe ʻa e Ongoongoleleí
Ngaahi tā fakatātā ʻa Kayela Larsen
Ko ia ‘okú ke fie vahevahe ʻa e ongoongoleleí ka ʻoku ʻikai ke ke ʻilo ʻa e meʻa ke faí. ʻOku ʻikai ke ke tuenoa. ʻOku ongoʻi pehē ha kakai tokolahi.
Ko ha fakapulipuli ʻeni ʻoku ʻikai fakapulipuliʻi: ʻoku ʻikai fie maʻu ia ke faingataʻa! Ko hono moʻoní, ʻoku tau faʻa ʻai ke faingataʻa ange ia kiate kitautolu ʻaki e tōtuʻa ʻetau fakakaukauʻi iá pe tōtuʻa ʻetau feingá.
Ko e meʻa mahuʻingá ke ke ngāue pē ki he meʻa te ke ala lavá. Faitotonu, anga‘ofa, pea loto-fiemālie ke vahevahe ʻa hoʻo tuí mo e niʻihi kehé. ʻI hoʻo fai iá, te ke fakatokangaʻi te ke maʻu ha ngaahi faingamālie lahi ange ke vahevahe ʻa e meʻa ʻokú ke maʻú. ʻOua ʻe fakamālohiʻi ia. ʻOku pehē ʻe ʻEletā Tieta F. ʻUkitofa, “Kumi maʻu pē ha faingamālie ke vahevahe ai hoʻo tuí mo e kakaí ʻi ha ngaahi founga fakanatula mo angamaheni.” 1
ʻE lava ke ke ako heni mei ha ongo mēmipa ʻe toko ua ʻokú na vahevahe ʻa e founga naʻe hoko ai ʻeni ʻi heʻena moʻuí. ʻI hoʻo lau ʻena ongo talanoá, fakakaukau fekauʻaki mo e founga ʻe ala fokotuʻu mai ʻe heʻena ngaahi aʻusiá ʻa e founga te ke lava fakanatula pē ʻo moʻui ʻaki mo vahevahe ʻa e meʻa ʻokú ke tui ki aí—pea faitāpuekina ai ha ngaahi moʻui ʻi he hala fonongá.