“Te u lava fēfē nai ʻo ongoʻi loto-fakatōkilalo kae ʻikai ke u ongoʻi ʻoku holo ai hoku mahuʻingá?” Ki Hono Fakamālohia ʻo e Toʻu Tupú, Sune 2021, 31.
ʻAi Hangatonu
Te u lava fēfē nai ʻo ongoʻi loto-fakatōkilalo kae ʻikai ke u ongoʻi ʻoku holo ai hoku mahuʻingá?
Kuo fekau maʻu pē ʻe he ʻEikí ki he kakaí ke nau fakavaivaiʻi kinautolu ʻi Hono ʻaó pea faʻa fakatokanga kiate kinautolu ʻi he taimi ʻoku ʻikai ke nau loto-fakatōkilalo feʻunga aí (vakai, Tokāteline mo e Ngaahi Fuakava 67:10).
Me‘apango, ʻoku ongoʻi ʻe he kakai ʻe niʻihi ko hono fakavaivaiʻi kinautolú ʻoku ʻuhinga ia ko hono tukuhifo kinautolu. Ka ʻoku ʻikai ke moʻoni ia.
“ʻOku ʻikai ko e ʻuhinga e loto-fakatōkilaló ʻoku ʻikai hatau mahuʻinga, taʻeʻuhinga, pe siʻisiʻi pē hotau mahuʻingá. … “ʻOku ʻikai maʻu e loto-fakatōkilaló he fakaʻofaʻia pē ʻiatekitautolú; [ka] ʻoku maʻu e loto-fakatōkilaló ʻi hono fakasiʻisiʻi e fakakaukau ʻo fekauʻaki pē mo kitautolú. ʻOku maʻu ia ʻi hono fai ʻetau ngāué ʻaki e loto ke tauhi ki he ʻOtuá mo hotau kāingá.”1
‘I he taimi ʻoku tau loto-fakatōkilalo mo‘oni aí, ʻe kamata ke tau fakatupulaki ha ‘apasia moʻoni pea mo e ‘ofa ki he Tamai Hēvaní, ʻo ʻiloʻi ko Ia ʻa e māfimafí, mo e tokaima‘anangá, mo e ʻofa ki he kakai kotoa pē. ʻOku totonu ke tau fakamālō heni koeʻuhí ko e kotoa ʻo ʻetau ngaahi meʻafoakí mo e ngaahi tāpuakí, kau ai ʻa e meʻaʻofa ʻo Hono ʻAlo ko Sīsū Kalaisí. Hili iá te tau fie maʻu ke tauhi ki he ʻOtuá mo e niʻihi kehé. ʻI heʻetau fakahoko ʻení, ʻe ʻiate kitautolu ʻa e Laumālie Māʻoniʻoní, pea te tau fiefia ange mo ongoʻi lelei ange fekauʻaki mo kitautolu foki.