“Ngaahi Founga ʻe 5 ke Vahevahe ai ʻa e Ongoongoleleí,” Ki hono Fakamālohi ʻo e Toʻu Tupú, Sune 2021, 32.
Lea Fakaʻosí
Ngaahi Founga ʻe 5 ke Vahevahe ai ʻa e Ongoongoleleí
1. ʻUnu ke Ofi ki he ʻOtuá
Ko hoʻo ofi ange ki heʻetau Tamai Hēvaní, ko e lahi ange ia ʻo ʻEne maama mo e fiefia ʻe hā mai meiate koé. ʻE fakatokangaʻi ʻe he niʻihi kehé pea te nau fifili leva ki ai.
2. Fakafonu ʻAki Ho Lotó ha ʻOfa ki he Niʻihi Kehé
Feinga ke faʻifaʻitaki ki he ‘ofa ʻa Kalaisí pea manava‘ofa ki he niʻihi kehé. ʻOfa mo ngaohi leleiʻi kinautolu ko ha fānau ʻa e Tamai Hēvaní.
3. Feinga ke Fononga he Hala Fakaākongá
Ko e lahi ange hoʻo ʻofa ki he ʻOtuá mo ʻEne fānaú, ʻe pehē pē mo hoʻo tukupā ke muimui kia Sīsū Kalaisí. ʻE fie maʻu ke ako ʻa e fononga fakaākongá. ʻE hoko leva hoʻo talanoa mo e niʻihi kehé kau ki hoʻo tuí ko ha meʻa angamaheni mo fakanatula. ʻE hoko leva ʻa e ongoongoleleí ko ha konga pau mo mahuʻinga ʻi hoʻo moʻuí pea ngali kehe ka ʻikai talanoaʻi ia mo e niʻihi kehé.
4. Vahevahe e Meʻa ʻi Ho Lotó
Ko e hā pē ha founga ʻe ngali fakanatula mo angamaheni kiate koé, vahevahe ki he kakaí e ʻuhinga ʻoku mahuʻinga ai kiate koe ʻa Sīsū Kalaisi mo Hono Siasí.
5. Falala ki he ʻEikí ke Fakahoko ʻEne Ngaahi Maná
ʻOku ʻikai ko ho fatongiá ke fakaului e kakaí. Ko e fatongia ia ʻo e Laumālie Māʻoniʻoní. Ko ho fatongiá ke ‘ofa ki he ʻOtuá pea mo ho ngaahi kaungāʻapí. Fakahaaʻi ʻeni ʻaki hono fakaafeʻi kinautolu ke nau omi ʻo mamata, omi ʻo tokoni, pea nau omi ʻo kau. ʻE fakahoko ʻe he ʻOtuá ha ngaahi mana ʻo fakafou ʻiate koe ke tāpuekina ʻaki ʻEne fānau maʻongoʻongá.