“Ang Balaan nga Plano sa Atong Paglambo,” Alang sa Kalig-on sa mga Kabatan-onan, Hulyo 2021, 2–5.
Ang Balaan nga Plano sa Atong Paglambo
Kon atong makita ang mortal nga kinabuhi sa kinatibuk-ang kahulogan, atong makita nga kini dili usa ka pangutana sa “mas maayo ba nga mabuhi o mamatay?” kondili “mas maayo ba nga palamboon ang atong kaugalingon o dili?”
Napanalanginan ko nga makauban sa akong asawa sa pagkatawo sa matag usa sa among mga anak ug maanaa usab sa kamatayon sa matag usa sa akong mga ginikanan. Nasurprisa ko nga mabati ang unsay akong gibati sa panahon sa pagkatawo ug sa panahon sa kamatayon. Gibati nako nga adunay usa ka sagrado nga butang ang nahitabo. Ang atong panahon dinhi sa yuta usa ka bahin sa atong pagpakabuhi nga mahinungdanon sa kahangtoran. Ang langit nagtimaan sa sinugdanan ug sa kataposan sa matag mortal nga kinabuhi.
Unsay kinahanglan natong buhaton samtang ania kita dinhi sa yuta mahimong masabtan lamang pinaagi sa pagkahibalo sa unsay nahitabo sa wala pa ang pagkatawo ug sa unsay mahitabo human sa kamatayon. Kon ang atong kinabuhi dinhi sa yuta mao lamang ang tanan, kitang tanan mahimong “[mo]kaon, [mo]inom, ug [mag]lipay” (2 Nephi 28:7) nga wala kaayoy pagpakabana sa uban. Apan kon atong makita ang mortal nga kinabuhi sa kinatibuk-ang kahulogan, atong makita nga kini dili usa ka pangutana sa “mas maayo ba nga mabuhi o mamatay?” kondili “mas maayo ba nga palamboon ang atong kaugalingon o dili?”1
Ang pagsabot sa plano sa kaluwasan—sa atong kinabuhi sa wala pa ang pagkatawo, sa katuyoan sa atong kinabuhi dinhi sa yuta, sa atong kinabuhi human sa kamatayon—ug sa mahinungdanong tahas nga gibuhat sa atong Manluluwas, si Jesukristo, niana nga plano nagpakita kanato nga Siya motabang kanato niining kinabuhia. Samtang mohimo kita og mga pakigsaad uban Kaniya, atong gibutang ang atong kaugalingon sa dalan sa pakigsaad—ug kita mahimong mas mahisama Kaniya ug sa atong Langitnong Amahan, anam-anam.
Ang Atong Kinabuhi sa Wala Pa dinhi sa Yuta
Ang pagpadayag nagtudlo nga kita espiritu nga mga anak sa Dios ug nga kita nagpuyo uban Kaniya sa dugay nga panahon sa wala pa kita moanhi sa yuta. Ang atong Langitnong Amahan nag-andam og paagi alang kanato aron mahimong sama Kaniya. Kadtong kinsa mipili sa plano sa kaluwasan sa atong Amahan o plano sa kalipay didto sa kinabuhi sa wala pa dinhi sa yuta—nga mao kitang tanan—mipili nga “palamboon ang kaugalingon.”
Si Elder Christofferson uban sa iyang asawa ug mga anak.
Ang Atong Panahon dinhi sa Yuta
Kita mianhi sa usa ka kalibotan nga gilalang sa Dios ug sa Iyang Anak, si Jesukristo. Midawat kita og pisikal nga lawas. Ang pagbaton og lawas importante aron madawat ang himaya nga gitagamtam sa Dios. Kon atong ipakita nga kita motuman sa mga sugo sa Dios, kita “adunay himaya nga idugang diha sa [atong] mga ulo hangtud sa kahangturan” (Abraham 3:26). Kini nagpasabot nga kita mahimong sama sa atong langitnong mga ginikanan ug mopuyo uban kanila sa kahangtoran. Kita naninggit sa kalipay niining mahimayaon nga mga posibilidad.
Kamo ug ako naghulat og dugay nga panahon, apan karon ania na kita dinhi sa yuta. Naglaom kita sa panahon nga kita mabanhaw nga adunay hingpit, imortal nga lawas ug mosulod sa celestial nga gingharian aron makatagamtam og kinabuhing dayon—usa ka butang nga nindot kaayo nga dili gani nato kini mahunahuna. Sa pagkakaron, kita nagkat-on ug naningkamot nga “mobuhat … sa tanan nga mga butang bisan unsa ang isugo sa Ginoo nga [atong] Dios [ngari kanato]” (Abraham 3:25). Tungod kay nasayod kita sa plano sa Dios, nasayod kita nga kini nga mga sugo wala gihatag aron sa pagpugong sa atong kagawasan o kalipay—ang katugbang hinoon. Ang mga sugo mao ang atong giya sa hingpit nga kagawasan ug kalipay.
Siya Mihatag og Manluluwas
Bisan pa niana, ang kinabuhi lisod. Kitang tanan masayop samtang nagkat-on kita sa pagpuyo pinaagi sa hugot nga pagtuo. Apan ang Dios misaad kanato sa wala pa ang paglalang sa yuta nga mohatag Siya og usa ka Manluluwas aron sa pagluwas kanato gikan sa sala ug kamatayon. Pinaagi sa Iyang kaugalingong pag-antos ug kamatayon—Iyang Pag-ula—si Jesukristo mibayad alang sa atong mga sala ug nagtanyag kanato sa gasa sa paghinulsol. Busa, kon kita maghinulsol, Siya mopasaylo sa atong mga sala ug molimpyo kanato gikan sa mga epekto niini. Ug pinaagi sa Iyang Pagkabanhaw, ang Manluluwas mihatag kanato sa gasa sa atong kaugalingong pagkabanhaw ug imortalidad.
Mangluhod Ang Tanang Tuhod, ni J. Kirk Richards
Pagsubay sa Dalan sa Pakigsaad
Sama nga kita natawo sa pisikal nga paagi dinhi niining mortal nga kalibotan, kinahanglan kitang matawo pag-usab sa espirituhanong paagi ngadto sa gingharian sa langit. Buhaton nato kini pinaagi sa pagpakita og hugot nga pagtuo diha kang Kristo, paghinulsol, pagpabunyag, ug pagdawat sa Espiritu Santo. Kini mao ang sinugdanan sa usa ka espirituhanon nga pagbag-o nga molungtad sa tibuok natong kinabuhi dinhi sa yuta. Usahay gitawag nato kini nga “molahutay hangtod sa kataposan,” nga nagpasabot nga maningkamot kita sa pagtuman sa atong pakigsaad sa bunyag sa pagkamasulundon sa atong tibuok kinabuhi, nga maghinulsol kon gikinahanglan ug mopadayon pag-usab. “Oo, ug ingon sa kanunay nga ang akong mga katawhan maghinulsol,” miingon si Jesus, “Ako mopasaylo kanila sa ilang mga kalapasan batok kanako” (Mosiah 26:30).
Kamo Makasalig sa Tabang sa Dios
Sa inyong kinabuhi sa wala pa matawo, gipili ninyo ang Dios, gipili ninyo si Kristo, gipili ninyo nga “palamboon ang kaugalingon” uban sa tabang Nila. Ug kamo makasalig sa tabang Nila. Ang mga sakop sa Dios nga Kapangulohan dili mga nag-obserbar nga walay pagpakabana sa atong mga kinabuhi. Walay kataposan ang paghigugma Nila kanato ug mogamit sa gahom Nila aron sa pagtabang kanato, kutob sa atong itugot. Kanunay Silang motahod sa atong kabubut-on, apan naghinam-hinam Sila sa pagpanalangin kanato. Mipasalig si Jesus kanato, “Ako dili makalimot kaninyo, O balay ni Israel. Tan-awa, Ako mikulit kaninyo diha sa mga palad sa akong mga kamot”(1 Nephi 21:15–16).
Mahimong Mas Maayo sa Hinay-hinay
Ang uban mibati nga ang celestial nga gingharian usa ka tinuod nga paglaom alang sa uban apan murag dili alang kanila. Ang tinuod, walay usa nga mosarang kon wala ang grasya ni Jesukristo. Salamat na lang, makagamit kamo sa Iyang grasya. Si Jesus miingon kanato nga nabuntog Niya ang kalibotan. Uban sa inyong bunyag ug ubang mga pakigsaad, gibugkos ninyo ang inyong kaugalingon ngadto Kaniya aron nga uban Kaniya, mabuntog usab ninyo ang kalibotan.
Dili ninyo kinahanglang makab-ot ang pagkahingpit dinhi sa yuta. Gitandi kini ni Propeta Joseph Smith sa pagkatkat og hagdanan: magsugod kamo sa ubos ug motikang sa kada ang-ang sa pagkat-on ug pagsunod sa mga baroganan sa ebanghelyo. Ug kana nga pagkat-on, mitudlo siya, nagpadayon lapas pa niining kinabuhia—“Dili ang tanan mahimong masabtan dinhi sa kalibutan.”2
Bisan unsa nga mga kahuyang, mga kalisod, o pag-antos nga atong atubangon dinhi sa yuta, nagsaad ang Dios sa Iyang matinud-anong mga anak nga walay panalangin nga ihikaw kon kita magpabilin sa dalan sa pakigsaad (o mobalik dayon niini). Dayon kining tanan magmalamposon. Mao kana ang balaan nga plano sa atong paglambo!