“Takos Ba Ako?” Alang sa Kalig-on sa mga Kabatan-onan, Hulyo 2021, 22–23.
Takos Ba Ako?
Usa ako ka biktima sa pag-abuso kutob sa akong mahinumdoman. Nakaapekto ba kana sa unsay pagtan-aw sa Ginoo kanako?
Paghulagway pinaagi ni Trent Gudmundsen
Sa makita sa publiko, ang akong pagkabata normal lang gayod.
Misimba kami ug mitambong sa tanan namong mga miting ug mga kalihokan sa Simbahan. Mieskwela ko ug nakigdula sa akong mga higala. Isip usa ka tin-edyer, gibuhat nako ang tanang butang nga gibuhat sa mga tin-edyer. Milaag ko uban sa akong mga higala ug miapil sa choir ug drama club. Miapil ko sa prom. Apan adunay makalilisang nga sekreto ilawom nianang malipayon, normal nga kinabuhi nga makita sa gawas.
Sukad sa higayon nga mga dos anyos ako, usa ako ka biktima sa sekswal nga pag-abuso sa akong duha ka magulang nga lalaki. Giabuso usab nila ang akong mga igsoon nga babaye. Bata pa kaayo kami aron makasabot sa unsay nanghitabo, apan samtang nagkadako ang akong pangidaron, nagsugod ako nga makasabot og gamay. Mibati ako nga walay espirituhanon nga kahayag ug hugaw sa moral nga paagi sa matag higayon nga kauban nako ang akong mga igsoon nga lalaki.
Midako ang Akong Kalibog
Human sa pagtambong og klase sa Young Women diin nagtudlo sila mahitungod sa moralidad, nakasabot ako sa kahulugan sa hiyas ug kaputli. Naminaw ako sa akong mga lider nga nangamuyo kanako ug sa uban sa akong klase nga magpabilin nga limpyo sa moral nga paagi.
Naghunahuna ako, “Unsaon man nako nga mahimong limpyo sa moral nga paagi?” Kutob sa akong mahinumdoman, ako usa ka biktima sa sekswal nga pag-abuso. Dili nako malikayan nga maghunahuna kon unsay pagtan-aw sa Ginoo kanako. Mahiyason ba ako nga batan-ong babaye? Takos ba ako nga makig-date sa matarong nga mga batan-ong lalaki sa akong ward ug eskwelahan? Ang pag-abuso ba nga akong nasinati nakapahimo kanako nga dili takos sa kaminyoon sa templo?
Naghunahuna ko niini og maayo. Dili nako masabtan nga makonsiderar ko nga dili mahiyason tungod kay kon unsa man ang nahitabo kanako dili akong pagbuot. Nganong dili man nako mabati nga mahiyason? Dili ba ako takos sa gugma sa Ginoo? Nagkinahanglan ba ako og paghinulsol?
Misulay Ko nga Kalimtan na Lang
Ako sa tinuoray wala kahibalo. Gibati nako nga dili ako ang angayan nga basolon, apan sa samang higayon, gibati nako nga hugaw sa moral nga paagi ug gipakaubos ug hingpit nga gipakaulawan. Dili nako makuha ang kaisog sa pagsulti sa akong mga ginikanan o ni bisan kinsa. Misulay ako sa pipila ka higayon, apan naulaw kaayo ko ug wala ako kahibalo unsaon sa paglitok sa mga pulong. Misulay ko nga kalimtan na lang nga kini nahitabo.
Sa dihang 15 anyos ko, ang akong manghod nga mga babaye nakakaplag sa kaisog nga wala kanako. Nakig-istorya sila sa usa ka magtatambag sa eskwelahan. Sa wala madugay, ang usa sa akong mga igsoon nga lalaki gidakop ug gisilotan og tulo ka tuig nga pagkabilanggo. Apan gihapon, sulod sa katuigan human niana, nag-antos ako sa samang mga kahadlok nga ako dili mahiyason o dili takos.
Nakaplagan Nako ang Kaisog sa Pagpangayo og Tabang
Sa kataposan, usa ka adlaw nakabaton ko sa kaisog sa pagpakigkita sa akong bishop. Mipasabot siya nga ang Ginoo wala naghimo kanako nga may tulubagon alang sa tanang sekswal nga mga buhat nga gipugos kanako isip usa ka bata ug batan-ong babaye. Mipasalig siya kanako nga kini dili gayod nako sala. Nagbarog ako nga walay mansa sa atubangan sa Ginoo. Mahiyason gihapon ako!
Uban sa pipila ka pagtambag gikan sa mga propesyonal ug tabang gikan sa akong bishop, ako nakahimo gayod sa pagbiya sa pag-abuso—ug sa kasakit ug pag-antos nga nahimo niini. Karon ako gayod adunay usa ka malipayon ug normal nga kinabuhi. Naminyo ako sa templo ngadto sa usa ka matarong nga lalaki, ug malipayon kaming nagpadako sa among pamilya.
Hinoon, usahay ang nangagi mobalda sa akong hunahuna, ug akong mahinumdoman ang kasakit nga akong gibati samtang namalandong ko sa akong katakos.
Naghunahuna ako kon pila pa ka batan-on ang anaa diha sa usa ka sitwasyon sama sa akong nasinati, nga mibati og kaulaw ug gipakaubos, nga naghunahuna mahitungod sa ilang hiyas ug kon asa sila mohaom sa plano sa Dios.
Ngadto niini nga mga batan-on gusto ko nga moingon, ang Ginoo nahigugma kaninyo.
Naguol Siya og maayo sa unsay nahitabo kaninyo.
Nasayod Siya nga dili kamo ang angayan nga basolon.
Nasayod Siya nga kamo tinud-anay nga mahiyason.
Motabang Siya kaninyo nga makakaplag sa kaisog ug kalig-on nga magpakabuhi uban sa kalipay.