Ang Hingpit nga Kalipay ni Kosei

Ni David Dickson

Mga Magasin sa Simbahan

Kini nga batan-ong lalaki gikan sa Japan ganahan nga mopaambit sa ebanghelyo.

Litrato gikan sa Getty Images

Motugtog siya og piano. Mo-sprint siya. Mo-long jump gani siya! Apan dili lamang kadto ang talagsaon nga mga butang mahitungod ni Kosei H., usa ka 17 anyos nga batan-ong lalaki gikan sa Nagasaki, Japan.

“Siya mao ang usa sa labing maayo nga batan-ong mga misyonaryo nga akong nailhan sukad,” miingon si Sister Mckenna Frasure, usa ka bag-ong nauli nga misyonaryo kinsa miserbisyo sa Japan diin nagpuyo si Kosei. “Walay gipalabay nga kahigayonan si Kosei nga makauban ang mga misyonaryo o magpamatuod kang Kristo pinaagi sa mga kalihokan sa Simbahan ug sa social media,” miingon siya.

Para ni Kosei ang mga misyonaryo ang pipila sa iyang labing suod nga mga higala. Ug kini dili ikatingala nga siya mibati niana nga paagi sa higayon nga kamo makaamgo kon unsa siya kalingaw sa pagpaambit sa ebanghelyo.

“Ang misyonaryo nga buhat mao ang akong hingpit nga kalipay,” miingon si Kosei. “Si Nephi mitudlo kanato nga ang bunga sa kahoy sa kinabuhi ‘mao … ang labing madanihon sa tanan nga mga butang’ (1 Nephi 11:22). Ang ubang mga tawo mahimong dili modawat niini nga bunga. Apan, isip usa ka tawo kinsa nasayod sa katam-is sa bunga, gusto nakong ipaambit ang ebanghelyo niadtong naglibot kanako.”

Ang pagpaambit sa mga panalangin sa ebanghelyo tingali mao gayod ang kinadak-an nga talento ni Kosei sa tanan.

Kalamposan sa Social Media

Human sa pagtambong og klase sa pagpangandam sa misyonaryo, mibati si Kosei og mas dakong tinguha sa pagdala sa mga kalipay sa ebanghelyo ngadto sa iyang mga higala. Misugod siya pinaagi sa paggamit sa internet. Usa sa nag-unang mga himan nga gigamit niya sa pagpaambit og mga mensahe ug sulod nga may kalabotan sa ebanghelyo mao ang social media.

Pipila sa iyang mga higala mitubag niini nga mga post sa social media. Usa ka piho nga higala miduol kang Kosei ug miingon, “Interesado ako sa inyong simbahan.”

Kini nga higala usa lamang ka kaila sa una, apan ang ilang panaghigalaay dali nga milambo. “Misugod siya pinaagi sa pagpangutana kanako sa mga kalainan tali sa iyang tinuohan ug sa akoa,” mipasabot si Kosei. “Bisan og dili kaayo ko kanunay nga makaistorya kaniya, nahimo kaming maayo nga managhigala human sa akong pagpaambit sa ebanghelyo diha sa social media.”

Mga Paugnat sa Kusog [Sports], mga Kalingawan, ug Hangtod sa Kahangtoran nga mga Panaghigalaay

Ang social media dili lamang ang paagi nga si Kosei nagpaambit sa iyang pagtuo. Hinumdomi, siya adunay busy nga kinabuhi nga puno sa mga kalihokan. Siya adunay daghan nga kahigayonan nga makighimamat og mga tawo ug makighigala. Ug gamiton niya kadto nga mga oportunidad sa pagpakatap sa hingpit nga kalipay sa ebanghelyo.

“Usa ka higayon giimbitar nako ang usa ka higala sa sports club ngadto sa klase sa pagkat-on og Iningles nga ang mga misyonaryo mao ang nagtudlo didto sa simbahan,” mipasabot si Kosei. “Siya ug ang mga misyonaryo nahimong maayo nga mga higala sa usag usa samtang nagkat-on siya og Iningles.”

Apan, ang mga panag-istoryahanay wala mohunong diha sa mga leksyon sa Iningles.

“Ang akong higala misugod sa paghunahuna kon nganong kini nga mga misyonaryo, kinsa hapit kaedad ra niya, naghimo og boluntaryo nga buhat ug nagserbisyo isip mga misyonaryo sa Japan. Ang iyang sunod nga pangutana mao ang unsay nakapadasig sa mga misyonaryo sa pagserbisyo. Nakapaminaw na siya karon og mga leksyon sa misyonaryo ug adunay komunikasyon gihapon sa mga misyonaryo pinaagi sa video chat.”

Matag higayon nga iyang hisgotan ang ebanghelyo uban sa iyang mga higala, naningkamot si Kosei sa pagpahaom sa unsay iyang ipaambit base sa ilang interes. “Sama pananglit, maghisgot ko og una mahitungod sa unsay mahitabo human sa kamatayon, unsay katuyoan sa kinabuhi, o kon aduna bay Dios,” miingon siya. “Dayon akong mapahiangay, base sa ilang interes.”

Siyempre, nasayod siya nga dili tanan ang mainteresado. Aduna usab siyay mga kapakyasan, sama ni bisan kinsa. Usa ka adlaw, human nga ang pipila sa iyang mga higala nangutana kaniya kabahin sa Simbahan, misulay si Kosei sa pagpaambit og iapod-apod nga materyal [handout] sa Simbahan sa usa kanila. “Apan, kana nga higala midagan pagawas sa klasehanan ug gikataw-an ko og maayo gikan didto sa pasilyo.

“Nakapaguol kana kanako og maayo,” miingon si Kosei.

Apan siya wala motugot nga ang pagkadismaya mopugong kaniya. Nasayod siya nga unsay iyang gipaambit mopanalangin sa ilang kinabuhi hangtod sa kahangtoran kon sila maminaw.

Ang Hingpit nga Kalipay nga Nakapadasig Kaniya

“Gibati nako ang hingpit nga kalipay diha sa mga pagtulun-an ni Kristo,” miingon si Kosei. “Kon wala pa ako masayod niana nga mga pagtulun-an, aduna unta koy kinabuhi nga walay tinuod nga kalipay.”

Samtang iyang gibalanse ang iyang daghan nga mga kalihokan ug mga interes, nahibalo si Kosei kon unsaon sa pagprayoridad. “Ang ebanghelyo ni Jesukristo nagdala og paglaom sa atong kinabuhi ug nagpadayag sa tanang butang nga kinahanglan natong buhaton,” miingon siya. “Bisan kon mobati kita og kaguol o kalisod, ang sinsero nga pag-ampo magdala og kalinaw ug motabang kanato nga makabaton og positibo nga kinaiya.”

Mao nga matinguhaon kaayo siya sa pagpaambit sa ebanghelyo sa matag higayon nga iyang makaplagan. Gusto niya nga masinati sa uban kon unsay natagamtaman niya sa matag adlaw! “Nanghinaot ko gikan sa kinahiladman sa akong kasingkasing nga unta daghang tawo ang makabaton sa oportunidad nga makasinati niining tinuod nga kalipay,” miingon siya.

Unsay Labing Mahinungdanon

Dayag lang, ang pagpaambit sa ebanghelyo dili mokuha sa tanan niyang panahon. Kugihan kaayo si Kosei sa iyang ubang mga tumong sa kinabuhi. Matag adlaw nagbansay siya og maayo sa pagdagan ug sa pagpakusgan. Kon gikinahanglan niya nga morelaks, motugtog siya sa piano. Malingaw usab siya sa pagbisita sa kinaiyahan ug sa paggahin og panahon uban sa iyang pamilya. “Diha sa kinaiyahan uban sa akong mga igsoon—dili gayod ako makalimot sa adlaw nga nakakuha kami og isda ug gikaon kini!” miingon siya.

Bisan pa nianang tanan, nagpadayon si Kosei sa paggahin og panahon alang sa unsay labing mahinungdanon.

Ug siya adunay gamay nga tambag alang ni bisan kinsa nga gusto nga mobuhat sa ingon: “Makadawat kita og giya kon mosunod kita sa mga sugo. Kon ato kining buhaton, mahimo kitang lig-onon sa Ginoo. Ang mga kahadlok ug mga kabalaka mapulihan og paglaom ug pagsalig. Kon atong ablihan ang atong mga baba nga dili ikaulaw ang ebanghelyo, ang mga tawo makaila sa Kristohanong gugma ug mapuno sa hingpit nga kalipay.”