Direkta sa Punto

Sa unsa kaha nahisama ang celestial nga gingharian?

Glory in Degrees [Mga Ang-ang sa Himaya], ni Annie Henrie

Bisan og kita wala makabaton sa tanang detalye mahitungod sa celestial nga gingharian, ang Ginoo mipadayag og pipila ka gamhanang mga kamatuoran mahitungod niini. Ania ang pipila sa mga butang nga atong nahibaloan:

• Ang pagpuyo didto nagpasabot nga mopuyo sa presensya sa Langitnong Amahan ug ni Jesukristo nga dunay usa ka hingpit, nabanhaw nga lawas ug magpuyo sa matang sa kinabuhi sama sa Ilang pagpuyo. Kini nga kinabuhi mao ang “usa ka kahimtang nga walay katapusan ang kalipay” (Mosiah 2:41) ug “kahingpitan sa hingpit nga kalipay” (3 Nephi 28:10).

• Kadtong mopuyo didto “nahimo nga hingpit pinaagi ni Jesus”, ug ang “tanan nga mga butang ila” (Doktrina ug mga Pakigsaad 76:59, 69).

• Anaa niini ang labing dako nga himaya sa bisan unsa nga gingharian. Ang himaya niini gipahisama ngadto sa kahayag sa adlaw.

• Ang samang matang sa mga relasyon nga ania kanato dinhi maanaa didto, lakip na ang mga relasyon sa pamilya, lamang kini “pagaubanan sa walay katapusan nga himaya” (Doktrina ug mga Pakigsaad 130:2).

• Kini dunay tulo ka ang-ang. Ang labing taas nga ang-ang mao ang dapit diin mopuyo ang mga tawo kinsa nasilyo sa mahangturon nga kaminyoon ug nagmatinuoron sa ilang mga pakigsaad (tan-awa sa Doktrina ug mga Pakigsaad 131:1–4).

• Ang yuta makadawat og usa ka celestial nga himaya (tan-awa sa Doktrina ug mga Pakigsaad 88:17–20).