Giunsa Namo Pagsimba

Sa San Diego, USA

Mga litrato gikan sa Getty Images

Hello! Ako si Chace B. Ako 14 anyos, ug ako nagpuyo sa San Diego. Ang San Diego anaa sa habagatang tumoy sa estado sa California, USA. Ang talan-awon nagkalain-lain gayod. Makaplagan sa San Diego ang mga dunggoanan, mga bungtod nga patag ang ibabaw [mesas], mga walog, mga dal-og [canyons], ug mga bungtod. Kasagaran init ra ug hayag ang adlaw sa tibuok tuig.

Himamata ang Akong Pamilya

Ang akong pamilya ug ako nagpuyo sa kabukiran sa San Diego. Nagpuyo ko uban sa akong inahan; sa akong 10 anyos nga igsoong babaye, si Payslie; ug sa akong abuelito ug abuelita (lolo ug lola). Nagpuyo kami sa usa ka uma nga adunay daghang hayop. Naningkamot kami sa pagpuyo og yano kaayo ug kinaraan nga pamaagi sa kinabuhi.

Paghimong Espesyal sa Sakramento

Atol sa COVID-19 nga quarantine, ang Dominggo nahimong kaswal ra kaayo sa panimalay diha sa among mga sopa ug sa among komportable nga mga sinina. Gusto nakong mobuhat og butang aron sa pagseguro nga espesyal ang Dominggo. Nakahukom ko nga himoan ang akong pamilya og kaugalingon namong tray sa sakramento isip usa sa akong espirituhanong mga tumong alang sa bag-o nga programa sa Kabataan ug Kabatan-onan.

Una, mikuha ko og usa ka piraso sa kahoy ug mibarina og mga lungag sa katunga niini aron butangan sa gagmay nga mga baso sa sakramento. Dayon mikulit ko og tray sa pikas katunga aron butangan sa pan. Ang akong abuelita mitabang kanako sa pagliha niini hangtod nga hingpit kining nahamis. Dayon gitaoran namo og gunitanan ug gipintalan ang kahoy.

Sa unang Dominggo giandam namo ang sakramento ug walay makita nga gagmay nga mga baso nga mohaom sa mga lungag diha sa tray. Kaming tanan nangita sulod sa pipila ka oras alang niini. Pagkataudtaod mihukom ko nga maanaa man o walay mohaum nga mga cup moambit gihapon kami sa sakramento. Dili namo kini tugotan nga mopugong kanamo sa pagbalaan sa adlawng Igpapahulay.

Niana nga Dominggo sa dihang miambit kami sa sakramento, kadto adunay mas dakong kahilom, katuyoan, ug balaang pagtahod. Gibati nako nga nahimuot sa tumong nga akong gihimo ug nakab-ot. Ako nasayod ug mibati nga ang akong Langitnong Amahan mapasigarbohon kanako alang sa akong tumong ug sa mga pagpili nga nalambigit niini.

• Makita sa San Diego ang talagsaon nga Torrey pine tree.

  

• Ang San Diego adunay mas daghang abokado kay sa bisan asang dapit sa USA.

• Ang California gianggaan og “The Golden State [Ang Bulawanon nga Estado].”

• Ang Templo sa San Diego California mao ang ika-45 nga templo nga gipahinungod.

  

• Ang Simbahan adunay usa ka misyon sa San Diego, ug kini moabot hangtod didto sa mga utlanan sa Mexico.

• Makita sa San Diego ang Makasaysayanon nga Dapit sa Mormon Battalion sa Simbahan.

  

Sultihi Kami Kon Giunsa Ninyo Pagsimba

Ganahan kaming maminaw kon giunsa ninyo pagsimba kon asa kamo dapit nagpuyo. Padad-i kami og mubo nga paghulagway sa inyong dapit, unsay inyong buhaton sa Igpapahulay, inyong paborito nga mga kalihokan, o bisan unsang butang nga inyong mahunahunaan. Ipadala kini ngadto sa [e-mail].