“Pagtuman sa Atong mga Saad,” Alang sa Kalig-on sa mga Kabatan-onan, Hulyo 2021, 32.
Kataposang Pulong
Pagtuman sa Atong mga Saad
Gikan sa usa ka pakigpulong sa Oktubre 2019 nga kinatibuk-ang komperensya.
Paghulagway pinaagi ni Emily Davis
Usa ka gabii sa batan-on pa ako, ang akong mama milingkod tupad kanako diha sa tiilan sa iyang higdaanan ug matinud-anong nakigsulti bahin sa kaimportante sa pagsunod sa Pulong sa Kaalam. Iyang gitutokan ang akong mga mata, ug akong gibati nga mituhop ang iyang mga pulong sa akong kasingkasing: “Pasaligi ko, Ronnie, karon, nga kanunay nimong sundon ang Pulong sa Kaalam.” Ligdong ko nga misaad niana ngadto kaniya, ug ako kanang gituman sa tanan niining mga katuigan.
Nakahukom na kong daan sa pagsunod sa mga balaod sa Dios, ug wala gyod kini kausaban. Ang Ginoo miingon, “Ako, ang Ginoo, mapugos sa pagtuman kon kamo mobuhat sa unsa nga Ako misulti; apan kon kamo dili mobuhat sa unsa nga Ako misulti, kamo dili makaangkon og saad” (Doktrina ug mga Pakigsaad 82:10).
Isip usa ka Apostol ni Ginoong Jesukristo, dapiton ko kamo sa paghunahuna sa mga saad ug mga pakigsaad nga inyong gihimoon uban sa Ginoo, ug sa uban, sa dakong kaligdong, nasayod nga ang inyong pulong maoy inyong garantiya. Mosaad ako ninyo, kon inyo kining buhaton, ang Ginoo moestablisar sa inyong mga pulong ug mopasidungog sa inyong mga buhat samtang kamo maningkamot sa walay kaluya nga kakugi sa pagpalambo sa inyong mga kinabuhi, sa inyong mga pamilya, ug sa Ang Simbahan ni Jesukristo sa mga Santos sa Ulahing mga Adlaw. Magauban Siya kaninyo, ug kamo, uban sa pagsalig, makapaabot nga “pagadawaton ngadto sa langit, nga pinaagi niana [kamo] mahimo nga mopuyo uban sa Dios diha sa usa ka kahimtang sa walay katapusan nga kalipay” (Mosiah 2:41).