“7 Ka Paagi nga Mosangpot sa mas Malipayon nga Kinabuhi,” Alang sa Kalig-on sa mga Kabatan-onan, Hulyo 2021, 8–11.
7 Ka Paagi nga Mosangpot sa mas Malipayon nga Kinabuhi
Ang yano nga mga lakang nga imong mabuhat sa matag adlaw madugang ngadto sa usa ka malipayon nga kinabuhi.
Mga paghulagway pinaagi ni Katy Dockrill
“Tan-awa! Ako kining gihimo para nimo!” miingon ang akong anak nga lalaki samtang gigunitan niya ang iyang hulagway diha gayod sa atubangan sa akong nawong. Ang papel misikit na sa akong ilong ug ang tanang kolor lubog nang tan-awon. Imposible kadto nga maklaro ang bisan unsang butang.
Akong gisibog ang dibuho, ang lubog nga kolor naklaro na.
“Unsay imong hunahuna?” nangutana siya.
Ang akong anak nga lalaki migahin og daghang oras sa pagdibuho sa unsay iyang pagtuo nga tinuod nga panagway namong duha—gawas lang sa akong buhok nga dili dalag [yellow].
“Kulang man ang akong brown,” dugang pa niya. “Ug ang dalag mas makalingaw man sab nga kolor.”
Samtang mitan-aw ko pag-ayo sa iyang proyekto, akong nakita kon giunsa sa pagdibuho sa mahigugmaong paagi sa akong anak nga lalaki kini nga hulagway. Dili nako maihap ang gidaghanon sa agi sa brutsa. Daghan ra kaayo. Ug husto siya, malipayon gyod ko tan-awon—lakip na sa dalag nga buhok.
Paghunahuna og usa ka dibuho nga imong nakita. Inyong makita nga matag usa ka agi sa brutsa nakapanindto niini og maayo. Gani, kon inyong tan-awon ang usa ka agi sa brutsa mismo, dili gayod kini -makapadayeg. Apan, kon inyong hiusahon kining tanan, makuha ninyo ang usa ka maanindot kaayong obra maestra.1
Ang pagpangita og kalipay sa kinabuhi susama ra ngadto sa dibuho. Adunay mga ginagmay, tinuyo nga agi sa brutsa, o inadlaw-adlaw nga mga kalihokan, nga atong mabuhat aron mamugna ang usa ka kinabuhi nga puno sa kalipay. Gigamit man kini nila o nahimo sa makausa lang, kining mga butanga dili kaayo makita nga nakadugang sa katalagsaon. Apan kon atong hiusahon kini balik-balik sa inadlaw-adlaw ug sinemanang mga paningkamot, kini makamugna og puno sa kalipay nga kinabuhi.
Ania ang pito ka agi sa brutsa o mga kalihokan nga inyong mapalambo aron makamugna og dugang nga kalipay sa inyong kinabuhi.
Unang paagi: Paliboti ang inyong kaugalingon sa Makapadasig nga mga tawo.
Ang kalipay adunay dakong kalabotan sa mga tawo nga inyong gikauban. Wala kini magpasabot nga dili na kamo mahimong makighigala sa mga tawo kinsa dili malipayon usahay. Gani, kitang tanan makasinati og kasub-anan sa matag karon ug unya.
Apan siguroa nga mogahin kamo og panahon uban sa mga tawo kinsa makapabayaw ug makapadasig kaninyo. Ang maayong mga higala nga motabang kaninyo sa pagsunod sa mga sumbanan sa Ginoo makahimo og dakong kalainan sa inyong kalipay. Ug maningkamot nga mahimong usa ka makapabayaw nga higala ngadto sa uban. Makahimo usab kamo og dakong kalainan sa mga kinabuhi sa uban.
Ika-2 nga paagi: Paggamit og musika aron madugangan ang inyong kalipay.
Ang musika adunay gamhanang epekto sa inyong hunahuna. Tinuod nga makapahapsay kini sa inyong hunahuna. Ang maayong musika makatabang kaninyo nga makabaton og positibo nga pagbati, kalipay, ug kadasig. Paghimo og usa ka lista [playlist] sa malipayon, makapadasig, ug makapalig-on sa pagtuo nga mga kanta nga kanunay ninyong paminawon.
Ika-3 nga paagi: Mogawas.
Ang pagtagamtam sa mga gilalang sa Dios makaayo gayod sa atong mga espiritu ug lawas. Importante kini sa inyong kalipay nga kanunayng mogahin og panahon nga mopalayo sa telebisyon, computer, ug sa screen sa cellphone mogawas ug motagamtam sa init sa adlaw, mga tanom, ug mga hayop sa inyong palibot. Makigpanglakaw uban sa inyong pamilya ug mga higala, magdula sa gawas, magbasa ug magtuon sa gawas. Mahingangha kamo kon unsa ka nindot ang inyong bation kon inyo kining buhaton.
Ika-4 nga paagi: Katulog og sakto.
Ang Ginoo miingon nga ang pagkatulog importante sa kahimsog sa imong panghunahuna ug sa lawas (tan-awa sa Doktrina ug mga Pakigsaad 88:124). Sama sa usa ka bateriya sa cellphone nga kinahanglang i-recharge pag-usab, ang inyong utok nagkinahanglan og katulog aron molihok og tarong. Sama sa inyong pagtakda og oras sa pagbangon sa buntag, siguroa usab nga motakda og oras alang sa inyong pagkatulog (ug ayaw pagbitbit og cellphone!).
Ika-5 nga paagi: Pagpakig-istoryahanay sa tawo mismo.
Ang paggamit sa pag-text ug social media sa pagpakigsulti sa inyong mga higala ug pamilya maayo man. Apan ang pagpakig-istoryahanay sa tawo mismo adunay mahimo diha sa inyong panghunahuna ug sa espiritu nga dili mahimo sa elektronik nga komunikasyon. Siguroa nga kamo makig-istorya uban sa inyong pamilya ug mga higala. Paggahin og panahon sa pagpaminaw ug pagpakig-istorya niadtong anaa sa inyong palibot.
Ika-6 nga paagi: Kanunay nga mag-ehersisyo ug maningkamot nga mokaon og makapahimsog.
Ang inyong utok molihok lang uban sa husto nga pagkaon nga inyong gihatag niini. Ang mga pagkaon nga miagi og taas nga proseso ug adunay daghang asukar nga (usahay nailhan nga junk food) mahimong lamian apan makapahimo sa inyong panghunahuna ug kalawasan nga mobati og kaluya. Ang maayong balita mao nga kon kamo mokaon og mas daghang prutas, mga utanon, ug tibuok nga mga lugas, ang inyong gana alang sa pagkaon og junk food mokunhod. Ang Ginoo mihatag kanato og usa lang ka lawas, busa mas maayo nga ampingan nato kini!
Ika-7 nga paagi: Mag-ampo ug Mamalandong.
Ang Ginoo ug ang Iyang mga propeta ug mga apostoles kanunayng mitambag kanato sa paggahin og panahon sa pag-ampo ug magmalinawon. Ang pag-ampo ug pagpamalandong positibong makaapekto sa mga dapit sa utok diin makasinati kamo og kalipay. Kon mogahin kamo og regular nga pagpamalandong ug pag-ampo, ang inyong kalipay madugangan og gamay sa matag higayon. Sa paglabay sa taas nga panahon, inyong mabantayan ang dakong kalainan kon unsa ka malinawon ug kamasaligon ang inyong bation.
Nangita og Dugang nga mga Ideya?
Kining pito ka paagi mao lamang ang pipila sa inadlaw-adlaw nga mga lakang nga mahimo natong tanan aron ang atong mga lawas ug mga espiritu mapuno sa kalipay. Alang sa dugang nga mga nga ideya, tan-awa sa Alang sa Kalig-on sa mga Kabatan-onan nga booklet sa pagtino sa mga baruganan nga nakapahimo ninyo o sa uban nga malipayon sa nangagi. Unsa ang inyong gibati nga angayng buhaton aron mahiusa kadtong mga butang sa mas makanunayong paagi diha sa inyong inadlaw-adlaw nga kinabuhi?
Hinumdumi kanunay nga ang labing gamhanan nga tinubdan sa kalipay mao ang atong Manluluwas, si Jesukristo. Bisan unsa pay inyong kahimtang, Siya andam sa pagpanalangin ug sa pagtabang kaninyo sa inyong mga kalisdanan. Siya motabang kaninyo nga makakaplag og kalipay nga inyong gilaoman.