“Makahimo Kamo Niini!” Alang sa Kalig-on sa mga Kabatan-onan, Hulyo 2021, 24–26.
Dali, Sunod Kanako
MakahimoKamo Niini!
Kinahanglan natong hinumduman ang tanan nga nahimo sa Langitnong Amahan ug ni Jesukristo—ug unsa ang padayon pa Nila nga gihimo—aron sa pagtabang kanato nga makapanunod sa celestial nga gingharian.
Doktrina ug mga Pakigsaad 76
“Ako? Sa celestial nga gingharian? Murag dili ko makahimo niini.”
Naghunahuna ka ba og sama niana? Nan, normal lang nga maghunahuna kon igo na ba ang atong kamaayo ilabi na nga murag layo pa kaayo kita sa pagkahingpit. Usahay mobati kita nga ang celestial nga gingharian dili makab-ot!
Apan ayaw pagpakawala sa kadasig. Ang tibuok tumong sa plano sa Langitnong Amahan mao ang pagtabang kaninyo nga mahimong sama sa Langitnong Amahan ug ni Jesukristo ug mopuyo kauban Nila didto sa celestial nga gingharian. Ug mahimo kaayo ninyo kini kay sa inyong gihunahuna. Si Presidente M. Russell Ballard, Akting nga Presidente sa Korum sa Napulog Duha ka mga Apostoles, mipahinumdom kanato nga ang makapuyo pag-usab uban Kanila “labaw pa kini kay sa ato lang nga tumong—kini Ila usab nga tumong.”1
Labaw pa sa bisan unsang butang, ang Langitnong Amahan ug si Jesukristo gusto nga kita mopuyo sa celestial nga gingharian uban Kanila ug sa atong mga pamilya. Ang maayong balita mao nga kita dili kinahanglan nga moabot didto nga mag-inusara. Kon kita moduol kang Kristo ug mosunod Kaniya, makadawat kita og kalig-on ug tabang nga atong gikinahanglan. Tungod sa Iyang Pag-ula, ang pagpanunod sa celestial nga gingharian dili lamang posible, lagmit gayod nga mahitabo kini.
Busa, uban sa Iyang tabang, kamo maka himo niini! Makahimo Kamo Niini!
Ang Plano sa Dios alang sa Tanan
Aron makasulod sa celestial nga gingharian, kinahanglan kitang magbaton og hugot nga pagtuo diha ni Jesukristo ug magtinguha sa pagpalambo niananga pagtuo. Kinahanglan kitang maningkamot nga mag-usab ug maghinulsol sa matag adlaw. Kinahanglan kita nga magpabunyag ug modawat sa gasa sa Espiritu Santo—ug kanunay mohinumdom ni Jesukristo ug mobag-o sa atong mga pakigsaad. Kinahanglan kita nga molahutay hangtud sa kataposan. Kon mao kini ang mga butang nga inyong gitinguha ug gipaningkamotan, kamo anaa na sa inyong dalan aron mahimong usa sa makapanunod sa celestial nga gingharian.
Agi og dugang, si Presidente Dallin H. Oaks, Unang Magtatambag sa Unang Kapangulohan, mitudlo nga kadtong kinsa takus sa labing taas nga ang-ang sa celestial nga gingharian mao “kadtong kinsa nakakab-ot sa labing taas nga gikinahanglan alang niining gingharian, lakip ang pagkamatinud-anon sa mga pakigsaad nga gihimo didto sa templo sa Dios ug ang kaminyoon sa kahangturan.”2 (Makakat-on kamo og dugang mahitungod niini pinaagi sa pagbasa sa Doktrina ug mga Pakigsaad 76:50–70,92–96).
Kon kini makapahibulong kaninyo—o makapabalaka—mahitungod sa inyong pagpangandam nga makapanunod sa celestial nga gingharian, hinumdumi nga kini usa ka panaw. Sa matag adlaw nga kita mopili nga mahimong mas mahisama sa atong Langitnong Amahan ug ni Jesukristo mao kana ang adlaw nga kita mas nagpaduol ngadto sa pagkahimong usa ka mas celestial nga tawo—ug mas nagpaduol ngadto sa celestial nga gingharian. Siyempre, adunay mga sipyat, kasaypanan, ug mga sala natong tanan. Ang pagsalig kang Jesukristo samtang maghinulsol kita sa matag adlaw mao ang importante. Kini nga panaw usa ka panaw nga puno sa paglaom tungod sa tanan nga nahimo Niya ug sa atong Langitnong Amahan—ug unsa ang padayon pa Nila nga gihimo—aron sa pagtabang kanato nga makaabot didto.
Kita Adunay Manluluwas
Ang Manluluwas naghatag og paagi aron kita makabalik sa atong Langitnong Amahan. Si Joseph Smith mihulagway niadtong kinsa mopuyo sa celestial nga gingharian isip “nakadawat sa pagpamatuod ni Jesus” ug “nahimo nga hingpit pinaagi ni Jesus … kinsa nagbuhat niini nga hingpit nga pag-ula pinaagi sa pagpaagas sa iyang kaugalingon nga dugo” (Doktrina ug mga Pakigsaad 76:51, 69).
Ang mahimong hingpit diha ni Jesukristo wala magpasabot nga kita dili na gayod masayop. Kini nagpasabot nga kita maghinulsol ug maningkamot nga mas mahimong maayo sa hinay-hinay matag adlaw, mosalig sa Manluluwas ug sa gahom sa Iyang Pag-ula aron sa pagtabang kanato nga mausab. Kon kita mobuhat niini, ang Iyang grasya makatugot kanato sa pag-uswag ngadto sa labing taas nga ang-ang sa celestial nga gingharian diin kita makapuyo uban Kaniya, sa Langitnong Amahan, ug sa atong mga pamilya hangtud sa kahangtoran. Madawat usab nato ang tanan nga anaa sa atong Amahan sa Langit. Walay usa niini ang mahimong posible kon wala ang Manluluwas.
Kita Adunay Simbahan
Si Presidente Oaks mitudlo nga ang Simbahan ania usab aron sa “pagtabang sa tanang mga anak sa Dios nga makasabot sa ilang potensyal ug makab-ot ang ilang labing taas nga padulngan. Kining simbahan anaa aron mahatagan ang mga anak sa Dios nga mga lalaki ug anak nga mga babaye og paagi nga makasulod ug mahimaya ngadto sa celestial nga gingharian.”3 Mahimo kini pinaagi sa pagkamasulundon sa mga ordinansa ug mga pakigsaad sa ebanghelyo.
Kini nga mga ordinansa ug mga pakigsaad nagkinahanglan sa pagkapari, nga anaa lamang sa tinuod nga Simbahan sa Dios. Niini ug sa ubang mga paagi, ang Ginoo ug ang Iyang Simbahan makatabang kanato sa atong panaw aron kita makahimo sa atong labing maayo aron ang atong mga kasingkasing usa ka adlaw maandam nga makapanunod sa tanan nga anaa sa Langitnong Amahan ug makaangkon og kinabuhing dayon.
Padayon, ug Ayaw Paghunong!
Kini nga panaw paingon sa celestial nga gingharian puno sa paglaom, apan dili kini kanunayng sayon. Ang Langitnong Amahan nasayod niana. Siya ug si Jesukristo misaad sa pagtabang ug paglig-on kanato sa matag lakang diha sa dalan.
Litrato gikan sa Getty Images
Mao nga padayon, ug ayaw paghunong. Kita makaangkon og tabang samtang maningkamot kita sa pagsunod sa Manluluwas, pagpuyo sa paagi nga kita mahimong takos nga modawat ug mobuhat sa mga pag-aghat gikan sa Espiritu Santo, ug pag-ila kon asa dapit kita mahimong molambo. Samtang kita magpadayon sa kinabuhi uban sa hugot nga pagtuo diha ni Jesukristo ug maghinulsol kon kinahanglan natong buhaton, ang atong Langitnong Amahan motabang kanato nga mausab kita alang sa kaayohan.
Ang pagkahimong takos sa celestial nga gingharian dili matuman sa usa lamang ka dakong buhat. Resulta kini sa makanunayon nga pagpili sa pagsunod sa Manluluwas ug sa pagsalig diha sa paglaom ug kasiguroan nga moabot gikan sa Iyang ebanghelyo.
Busa, kon kamo maningkamot sa pagsunod sa Manluluwas ug nabalaka gihapon kon makaabot ba kamo ngadto sa celestial nga gingharian, ang tanan nga mga timailhan nagpunting ngadto sa dakong “Oo! Makahimo kamo niini!” Mao kini ang gusto sa Langitnong Amahan alang kanatong tanan! Ug sama sa gitudlo ni Presidente Oaks, kining tanan posible “tungod sa gugma sa Dios alang sa iyang mga anak ug tungod sa pag-ula ug pagkabanhaw ni Jesukristo, ‘kinsa naghimaya sa Amahan, ug nagtubos sa tanan nga mga binuhat sa iyang mga kamot’ [Doktrina ug mga Pakigsaad 76:43].”4