“Pagsulat Samtang Magtuon,” Alang sa Kalig-on sa mga Kabatan-onan, Hulyo 2021, 18–19.
Pagsulat Samtang Magtuon
Ang pagsulat sa unsay naa sa inyong hunahuna samtang magtuon sa mga kasulatan makatabang gayod kanimo nga makat-on.
“Matag higayon nga akong sugdan sa pagbasa ang mga kasulatan, makatulog ko!” usa ka misyonaryo misulti sa iyang presidente sa misyon. “Mora na ang mga kasulatan og usa ka tambal nga pangkatulog!”
Mitubag ang iyang presidente, “Magsulat ka ba kon magbasa ka?”
“Dili,” miingon ang misyonaryo.
“Sayon ra nga makatulog o maganoy ang imong hunahuna ngadto sa laing butang kon magbasa lang ka,” miingon ang presidente, “apan dili kini mahitabo kon magsulat ka!”
Ang tambag nga gihatag niining presidente sa iyang misyonaryo nga naglisod nakahimo og dakong kalainan. Busa kon nangita ka og bag-ong paagi sa pagpalig-on sa imong pagtuon sa kasulatan, sulayi kini. Samtang magsulat ka mahitungod sa unsay imong gibasa, imong mamatikdan ang imong kaugalingon nga mas alisto sa imong gibuhat ug mas makat-on usab og maayo.
Ania ang pipila ka paagi nga among nasuta nga mapuslanon kaayo.
Brother Steven Lund:
Mag-andam ko daan og papel kon magbasa ko. Kon ang Espiritu moaghat kanako atol sa akong pagtuon, akong isulat kadtong mga pag-aghat.
Nakuha nako ang ideya gikan ni Elder Richard G. Scott (1928–2015) sa Korum sa Napulog Duha ka mga Apostoles, kinsa miingon: “Isulat ang importanting mga butang nga imong nakat-onan gikan sa Espiritu. Imong masuta nga kon isulat nimo ang bililhon nga mga pagbati, kasagaran mas daghan pa ang moabot. Usab, ang kahibalo nga imong maangkon magamit sa tibuok nimong kinabuhi” (“To Acquire Knowledge and the Strength to Use It Wisely,” Ensign, Hunyo 2002, 32).
Ako nasayod nga kining mga butanga tinuod. Samtang nangandam ko og mga pakigpulong ug mga leksyon, ako dili lang motan-aw sa mga kasulatan apan ngadto usab sa unsay akong nasulat samtang gibasa kini.
Brother Ahmad Corbitt:
Ganahan kong magtuon subay sa hilisgutan. Mobasa ko sa mga kasulatan gikan sa sinugdanan hangtod sa kataposan, apan ganahan usab kong mobasa sumala sa mga hilisgutan nga tun-anan. Pananglitan, mogamit ko sa Topical Guide sa pagpangita sa mga kasulatan kabahin sa hugot nga pagtuo o sa pagpundok sa Israel. Unya dili lang ko basta magsulat, apan isulat nako unsay akong nakat-onan aron makasiguro nga ako nakasabot gayod niini. Kanunay kong natingala nga mas masabtan nako og maayo ang mga butang kon ako kining buhaton. Magpili usab ko og pipila ka kasulatan nga memoryahon.
Brother Bradley Wilcox:
Ako adunay usa ka journal sa pagtuon diin akong masulat ang mga kasulatan diha sa akong kaugalingong mga pulong. Pananglitan, “Kay ang kinaiyanhon nga tawo mao ang usa ka kaaway sa Dios” (Mosiah 3:19) mahimong “Kay ang mga mapahitas-on ug dili mahinulsulon nga tawo mipili nga mahimong usa ka kaaway sa Dios, apan ang Dios dili iyang kaaway. Ang Dios mao ang iyang suod nga higala.”
Mosulat usab ko og mga pangutana. Kini mahimong mga pangutana nga akong gihunahuna sa dili pa ko mobasa, o kini mahimong mga pangutana nga misantop sa hunahuna sa unsay akong gibasa. Bisan hain nga paagi, nakapahimo kini nako nga maka-focus.
Ang Gahum sa Pagsulat sa Inyong mga Hunahuna
Matag usa kanamo sa among kapangulohan magtuon sa mga kasulatan sa lahi nga paagi, apan kami magsulat samtang amo kining buhaton!
Ang pagbasa makatabang kanamo nga masabtan og maayo ang mga hunahuna ug pagbati. Importante kana. Ug kon kami mamulong o mosulat, among madiskobrihan ug mapahayag ang mga hunahuna ug mga pagbati gikan sa kahiladman. Kami mobati nga kana makatabang kanamo nga mas mapahaum sa indibidwal nga panginahanglan ang mga kamatuoran sa ebanghelyo.
Usa ka batan-ong lalaki nakadiskobre niining kamatuoran sa iyang kaugalingon mismo sa dihang siya gihangyo sa paghatag og pakigpulong diha sa panagtigom alang sa sakramento. Nakadungog siya og daghan pang mga tawo nga naghatag og mga pakigpulong apan dili makahinumdom sa mga detalye. Kining higayona lahi. Sa dihang siya misulat og usa ka latid sa iyang kaugalingong pakigpulong, wala lang kini makatabang niya sa paghatag og han-ay nga pakigpulong, apan iya kining nahinumduman sa taas nga panahon.
Ang samang butang mahimong mahitabo sa inyong pagtuon sa kasulatan. Kon makatulog ka inig abli nimo sa imong mga kasulatan, mao kana ang panahon sa pagmata. Sulayi ang pagkuha og lapis, ballpen, o cellphone, o computer ug sugdi ang pagsulat. Mahingangha ka sa unsay kalainan nga mahimo niini!