“Nganong Kinahanglan nga Kamo Maglipay,” Alang sa Kalig-on sa mga Kabatan-onan, Hulyo 2021, 6.
Dali, Sunod Kanako
Nganong Kinahanglan nga Kamo Maglipay
Pagmalipayon! Ang Ginoo mihatag kaninyo og rason sa paglipay.
Ang Ginoo mihatag kanato og daghang imbitasyon. Ug sa kanunay Iyang balik-balikon ang mga importante. (Pananglitan, kapila man ka higayon nga Siya miingon og sama niini “Duol kamo kanako”?)
Usa ka imbitasyon nga inyong makita nga gibalik-balik diha sa mga kasulatan mao ang: “Paglipay.”
Ang Ginoo usahay mosulti niini kon ang Iyang mga katawhan naningkamot sa pagsunod Kaniya apan nagsagubang og oposisyon ug mga pagsulay. Ug kon Siya nagdapit kanato sa paglipay, Siya sa kasagaran naghatag og mga rason sa Iyang pag-awhag kanato nga magmalipayon. Pananglitan, sa usa ka higayon Siya miingon:
“Paglipay, kay Ako mogiya kaninyo. Ang gingharian mainyo ug ang mga panalangin niana mainyo, ug ang mga katigayunan sa kahangturan mainyo” (Doktrina ug mga Pakigsaad 78:18).
Ato kining tukion:
“Paglipay, kay [Unang rason] Ako mogiya kaninyo. [Ika-2 nga rason] Ang gingharian mainyo ug [Ika-2a nga rason] ang mga panalangin niana mainyo, ug [Ika-3 nga rason] ang mga katigayunan sa kahangturan mainyo” (Doktrina ug mga Pakigsaad 78:18).
Dinhi ang Ginoo nagpahinumdom kanato sa Iyang giya ug mga panalangin. Kana ang pipila ka maayong mga rason para maglipay.
Ania pay lain nga ehemplo:
“Pagmalipayon, mga bata; kay [Unang rason] Ako anaa sa inyong taliwala, ug [Ika-2 nga rason] Ako wala mobiya kaninyo” (Doktrina ug mga Pakigsaad 61:36).
Ug lain pa:
“Paglipay, ug ayaw kahadlok, kay [Unang rason] Ako ang Ginoo anaa uban kaninyo, ug [Ika-2 nga rason] [Ako] mobarug [uban] kaninyo” (Doktrina ug mga Pakigsaad 68:6).
Ang Ginoo nagpahinumdom kanato nga Siya anaa sa duol kanato ug motabang kanato kon kita maningkamot sa pagsunod Kaniya ug mohimo sa Iyang buhat. Dayon kita makapadayon nga masaligon ug, oo, malipayon. Total, ang plano sa Langitnong Amahan mao man ang “laraw sa kalipay” (Alma 42:8, 16), ug ang pagsunod sa mga sugo sa Ginoo mao ang pagsunod “subay sa matang sa pagkamalipayon” (2 Nephi 5:27).
Bisan kon ang atong mga pagsulay mosugod sa pagpasagmuyo kanato, kon kita magtinguha sa pagsunod sa Ginoo, Siya moawhag kanato sa paglipay. Ug Siya naghatag kanato og pipila ka maayong mga rason alang niini.