“Mga Pag-ampo mahitungod sa Goggles sa Paglangoy,” Alang sa Kalig-on sa mga Kabatan-onan, Hulyo 2021, 27.
Lig-on nga mga Pundasyon
Mga Pag-ampo mahitungod sa Goggles sa Paglangoy
Paghulagway pinaagi ni Toby Newsome
Dihay kausa miuban ako sa akong papa ngadto sa Sigatoka, Fiji—usa ka nindot nga dapit nga langoyan diha sa kadagatan. Nagdiborsyo ang akong mga ginikanan, mao nga ang akong mama wala miuban kanamo. Sa wala pa kami mibiya, gipalitan ko niya og goggles nga tapol [purple] ang kolor. Tinuod, goggles lang kini, apan nagdahom siya nga ampingan nako kini ug dad-on kini og balik.
Sa kataposan sa ikaduhang adlaw sa Sigatoka, namatikdan nako nga wala na nako ang akong goggles. Nabalaka ko nga nawani ni nako sa dagat. Ang unang butang nga akong gihimo mao ang pag-ampo nga akong makit-an ang akong goggles. Mibati ako og kalinaw ug nasayod nga ang tanan mahimong OK ra.
Ang tawo nga akong gisultihan mao ra ang akong igsoon nga lalaki. Dili siya motuo sa Dios ug kasagaran misaway sa akong mga gituohan tungod kay ako lang ang miyembro sa Ang Simbahan ni Jesukristo sa mga Santos sa Ulahing mga Adlaw sa akong pamilya. Miingon siya, “Ay, dili na nimo kadto makuha og balik.” Giingnan nako siya, “Nag-ampo ko mahitungod niini, ug nasayod ko nga ang akong mga pag-ampo matubag.”
Pagkasunod adlaw akong gisuhid ang tubig samtang milangoy kami. Sa dihang panahon na nga mouli, wala pa gihapon nako makit-i ang akong goggles. Gidawat nako nga tingali dili na nako makit-an kini ug nagpasalamat sa Langitnong Amahan alang sa Iyang paghupay ug kalinaw.
Dayon misinggit og kalit ang akong igsoon nga lalaki. Giisa niya ang tapol nga goggles!
Ang akong igsoon nga lalaki dili gihapon motuo sa ebanghelyo, apan mapasalamaton ako alang sa kahupayan, kalig-on, ug kasegurohan nga moabot kon akong ibutang ang akong hugot nga pagtuo diha sa Langitnong Amahan ug ni Jesukristo.
Shreya S., Suva, Fiji