“Unsaon nako sa paghunong sa pagduha-duha sa akong kaugalingong bili?” Alang sa Kalig-on sa mga Kabatan-onan, Hulyo 2021, 30–31.
Mga Pangutana ug Mga Tubag
“Unsaon nako sa paghunong sa pagduha-duha sa akong kaugalingong bili?”
Sama sa Pagtan-aw sa Langitnong Amahan
“Matag adlaw, mag-ampo ko sa Langitnong Amahan ug mohangyo Kaniya sa pagtabang nako nga motan-aw sa akong kaugalingon sama sa Iyang pagtan-aw kanako. Dayon ako maminaw og maayo samtang ang Espiritu naghatag kanako og positibong mga mensahe gikan sa Dios mahitungod sa akong bili ug pagkatawo, ug ako mosulti niini nga mga pulong sa akong kaugalingon diha sa samin. Kining yano nga kalihokan usa ka paagi nga kita makakonektar sa langit ug masayod nga ang Langitnong Amahan ug si Jesukristo nahigugma kanato ug mituo kanato.”
Madeleine M., 14, New York, USA
Paghigugma sa Atong mga Kalahian
“Kanunay kong naningkamot sa paghinumdom nga ako minahal nga anak sa Dios. Naningkamot kong dili mokomparar sa akong kaugalingon ngadto sa uban, tungod kay makapahimo kining mas lisod nga motuo sa akong kaugalingong bili. Ang Dios mihimo kanato nga lahi ug matahom sa atong kaugalingong paagi, ug kadto nga mga kalahian mga maayong butang.”
Brooke D., 14, Alberta, Canada
Usa ka Panalangin nga Wala Maamgohi
“Kita maghunahuna kanunay nga ang pagkahuyang o pagkaadunay depekto makapahimo kanato nga walay bili. Sa pagkatinuod, kita gipanalanginan aron kita makabuntog niini ug mahimong mas maayo nga mga bersyon sa atong kaugalingon pinaagi sa pagpaubos ug sa pagpalambo sa kaugalingon. Kon atong lihokon ang mga butang nga lisod para nato, ang Ginoo makakita ug moganti sa atong mga paningkamot. Maningkamot lang ug dili gayod mohunong.”
Ricardo R., 17, Chihuahua, Mexico
Atong Balaang Potensyal
“Wala nay ikatandi pa sa pagkahibalo nga isip mga anak sa buhi nga Dios, kita mahimong sama Kaniya. Makapausab kini sa tanan! Kon kita makahunahuna og dili maayo nga makapahimo nato nga magduhaduha sa atong bili, hinumdumi nga kadtong mga hunahunaa nagagikan kang Satanas, dili sa Dios. Kita adunay walay kinutuban nga potensyal ug balaanon nga kinaiya, sama sa atong Langitnong Amahan. Siya misalig ug nahigugma sa matag usa kanato sa tinagsa-tagsa.”
Alexandre S., 16, Minas Gerais, Brazil
Dakong Responsibilidad
“Samtang maningkamot ko sa pagtuon ug pagpamalandong sa mga kasulatan ug sa mga pulong sa buhing mga propeta, akong mabati ang Espiritu Santo uban kanako, nga nagpahinumdom kanako nga ako minahal nga anak nga babaye sa langitnong mga ginikanan ug nga ang Dios adunay mahinungdanon nga plano alang kanako. Si Presidente Nelson kanunay nga nagpakita kanato sa dagkong mga responsibilidad nga anaa kanato niining ulahing mga adlaw ug nga ang Dios misalig kanato ug nasayod unsa ang atong mahimo.”
Mirian P., 16, Paraná, Brazil
Pagbuhat og mga Butang nga Inyong Ganahan
“Kon kita magsugod sa pagduhaduha sa atong kaugalingong bili, makapangita kita og tabang gikan sa ubang mga tawo. Apan una, atong sugdan ang pagtarong sa atong kaugalingong panghunahuna. Mahimo kita nga mag-ehersisyo, makigdait sa mga higala ug pamilya sa maayo nga paagi, o maghimo og kalihokan nga kita malingaw. Kini makatabang kanato nga makaamgo nga kita mga anak sa Dios, kinsa naghatag kanato og bili ug talento.”
Carlos V., Mexico
Ila-ilaha ang Imong Kaugalingon
“Akong nakita nga mas sayon ang paghigugma sa akong kaugalingon tungod kay ako migahin og panahon sa paghunahuna kon kinsa ko. Ang akong lolo usa ka higayon misulti nako, “Ikaw kinahanglan nga mabuhi alang sa kahangturan, busa ikaw kinahanglan nga makig-uban sa tawo nga sama nimo.” Akong gisunod kana nga tambag ug naningkamot nga mahimong kinamaayohan nga bersyon sa akong kaugalingon. Karon mobati ko nga mas masaligon tungod kay nasayud ko unsay akong gusto, asa ko maayo, ug unsay akong gituohan. Malipay ko kon maningkamot ko nga mahimong tawo nga gusto sa Langitnong Amahan.”
Sarah Nielson, Utah, USA
Hinumdumi Kon si Kinsa Ka
“Naghunahuna ko sa kanta sa primary nga Ako Anak sa Dios.” Nagpahinumdom kini kanako nga ako nahatagan og mga gasa ug mga talento sa pagtabang sa kalibotan nga maandam alang sa Ikaduhang Pag-anhi sa Ginoo. Ang bahin sa kada usa diha niini talagsaon ug mahinungdanon, ug kitang tanan mga milagro sa kinabuhi sa usag usa. Kamo sa pagkatinuod usa ka milagro niining kinabuhia ngadto sa tanan nga naglibot kaninyo. Kon ugaling inyong makalimtan ang mahitungod niini, hunahunaa ang tanang butang nga gibuhat ni Jesus dinhi sa Yuta ug sulayi sa pagsunod ang Iyang ehemplo. Sa higayon nga mobati kamo og kaguol o kawalay bili, pangita og tawo nga matabangan kinsa mibati og sama sa imong gibati, ug kamo mobati nga mabayaw.”
Brigham M., Mexico
Balaan nga Pagtugot
“Kon maminaw ko sa Dios, motabang Siya kanako sa paghunong sa pagduhaduha sa akong personal nga bili. Ang ubang mga tawo dili hingpit nga makasabot sa akong bili, apan ang Dios makasabot, ug ako mosalig Kaniya. Kon tugotan nako ang mga tawo sa akong palibot nga mohukom sa akong bili, ang ako rang mabuhat mao ang pagtuo sa ilang mga pulong ug maghunahuna og dili maayo bahin sa akong kaugalingon. Apan kon akong isalikway ang ilang negatibong mga pulong, dili na ko kinahanglan nga magduhaduha sa akong kaugalingong bili. Akong nakat-onan nga wala na ko magkinahanglan sa ilang pagtugot. Matag usa kanato adunay tiunay nga bili isip mga anak sa atong Langitnong Amahan. Kinahanglan kita nga mopahinumdom sa atong kaugalingon niana, ilabi na kon walay usa nga mohimo.”
Anna G., 23, France
Pagkamasaligon diha sa Ebanghelyo
“Sa social media, makita nako ang tanang matang sa mga tawo kinsa ingon og hingpit, o mas maayo pa nako. Ang pagsunod sa ebanghelyo nakatabang nako nga makapalambo og kinaiya sa pagkamapasalamaton mahitungod kon si kinsa ako. Kon ako nagsunod sa mga baruganan sa Ebanghelyo sama sa hugot nga pagtuo, paghinulsol, ug pagpamalandong sa mga kasulatan, mobati ko og talagsaon. Dili nako mabati ang panginahanglan sa pagtandi sa akong kaugalingon ngadto sa uban, ug sa kataposan, ako mas masaligon gayod.
Alexandra R., Mexico
Pasayloa ang Inyong Kaugalingon
“Kita dili kanunayng maghunahuna nga angayan kita sa pagpasaylo, tungod kay nasayod man kita sa mga sayop nga atong nahimo. Apan kita tawhanon—kita makahimo og sayop ug padayon kita nga makahimo niini. Nagkinahanglan kita nga magmapasayloon sa atong kaugalingon, tungod kay ang tanan angayan nga tagaan og ikaduhang higayon. Kita kinahanglan nga motan-aw sa atong kaugalingon sama sa pagtan-aw sa mga tawo kinsa nagmahal kanato. Atong makita ang usa ka talagsaon ug maanindot kaayo nga tawo nga angayan sa walay kondisyon nga gugma bisan unsa pa ang mahitabo.
Valerie J., Mexico