« ស្នាមជក់ ៧ យ៉ាងដើម្បីបានជីវិតដែលកាន់តែរីករាយ » ដើម្បីកម្លាំងនៃយុវជន ខែ កក្កដា ឆ្នាំ ២០២១ ទំព័រ ៨–១១ ។
ស្នាមជក់ ៧ យ៉ាងដើម្បី បានជីវិតដែលកាន់តែរីករាយ
ជំហានសាមញ្ញៗ ដែលប្អូនៗធ្វើជារៀងរាល់ថ្ងៃ ដើម្បីបន្ថែមទៅក្នុងជីវិតរីករាយមួយ ។
រចនារូបភាពដោយ ខាធី ដុកគ្រីល
« មើលនែ៎ ! កូនគូររូបនេះជូនម៉ាក់ ! » កូនប្រុសខ្ញុំបាននិយាយ ពេលដែលគាត់បានកាន់រូបភាពរបស់គាត់នៅចំពីមុខខ្ញុំ ។ ក្រដាសនោះប៉ះនឹងច្រមុះខ្ញុំ ហើយពណ៌ទាំងអស់នោះមើលទៅឡើងព្រិល ។ វាមិនអាចទៅរួចទេក្នុងការមើលអ្វីឲ្យឃើញច្បាស់នោះ ។
ពេលដែលខ្ញុំទាញក្រដាសគំនូរនោះចេញពីមុខខ្ញុំ នោះស្នាមពណ៌ដែលព្រិលៗនោះបានប្រែជាច្បាស់វិញ ។
គាត់បានសួរថា « តើម៉ាក់គិតយ៉ាងណាដែរ ? »
កូនប្រុសរបស់ខ្ញុំបានចំណាយពេលរាប់ម៉ោងដើម្បីគូរនូវអ្វីដែលគាត់បានគិតថា ជាការពិពណ៌នាជាក់ស្ដែងពីយើងទាំងពីរនាក់—លើកលែងតែសក់របស់ខ្ញុំមិនមែនពណ៌លឿងទេ ។
គាត់បានជួយបន្ថែមថា « ខ្ញុំអត់មានពណ៌ត្នោតគ្រប់គ្រាន់ទេ ។ ហើយម្យ៉ាងទៀត ពណ៌លឿងជាពណ៌ដែលរីករាយជាង » ។
ពេលដែលខ្ញុំបានសម្លឹងមើលដិតដល់ទៅលើគម្រោងរបស់គាត់ ខ្ញុំអាចមើលឃើញថា កូនប្រុសរបស់ខ្ញុំបានគូររូបភាពនេះដោយសេចក្ដីស្រឡាញ់យ៉ាងណា ។ ខ្ញុំមិនអាចរាប់ចំនួនស្នាមជក់ថាមានប៉ុន្មាននោះទេ ។ វាមានច្រើនពេក ។ ហើយគាត់ត្រូវណាស់ រូបខ្ញុំមើលទៅពិតជារីករាយណាស់—រួមទាំងសក់ពណ៌លឿងផង ។
សូមគិតអំពីរូបគំនូរមួយដែលប្អូនៗបានឃើញ ។ ប្អូនៗនឹងឃើញថា សរសៃជក់តែមួយមិនអាចគូសជាគំនូរស្រស់ស្អាតបានឡើយ ។ តាមពិតទៅ នៅពេលប្អូនៗសម្លឹងទៅស្នាមជក់តែមួយ វាមិនមានអ្វីគួរឲ្យស្ងើចសរសើរទាល់តែសោះ ។ ទោះជាយ៉ាងណា នៅពេលប្អូនៗផ្ដុំវាទាំងអស់បញ្ចូលគ្នា នោះប្អូនៗនឹងទទួលបានកិច្ចការសិល្បៈមួយដ៏ស្រស់ស្អាតខ្លាំងណាស់ ។១
ការស្វែងរកសុភមង្គលនៅក្នុងជីវិតគឺស្រដៀងនឹងការគូរគំនូរមួយដែរ ។ មានស្នាមជក់តូចៗ ដោយចេតនានានា ឬជាសកម្មភាពទាំងឡាយប្រចាំថ្ងៃ ដែលយើងអាចធ្វើបាន ដើម្បីបង្កើតជីវិតមួយដែលពោរពេញទៅដោយសុភមង្គល ។ វាមិនអាចមានតម្លៃដោយឯកឯង ឬធ្វើតែម្ដងបាននោះទេ ទាំងនេះហាក់ដូចជាមិនមានអ្វីអស្ចារ្យជាពិសេសនោះទេ ។ ប៉ុន្តែ ពេលយើងផ្ដុំវាបញ្ចូលគ្នាម្ដងហើយម្ដងទៀតនៅក្នុងការខិតខំប្រឹងប្រែងប្រចាំថ្ងៃ និងប្រចាំសប្ដាហ៍ នោះវាអាចបង្កើតជាជីវិតដ៏រីករាយយ៉ាងបរិបូរមួយ ។
នេះជាស្នាមជក់ ឬជាសកម្មភាពប្រាំពីរយ៉ាង ដែលប្អូនៗអាចកែលម្អ ដើម្បីទទួលបានសុភមង្គលកាន់តែច្រើនឡើងនៅក្នុងជីវិតរបស់ប្អូនៗ ។
ស្នាមជក់ទី ១ ៖ រាប់អានជាមួយមនុស្សដែលជួយលើកស្ទួយគ្នា ។
សុភមង្គលទាក់ទងនឹងមនុស្សដែលប្អូនៗប្រាស្រ័យទាក់ទងច្រើនណាស់ ។ ចំណុចនេះមិនមែនមានន័យថា ប្អូនៗមិនអាចធ្វើជាមិត្តភក្ដិនឹងមនុស្សដែលពេលខ្លះមិនសប្បាយចិត្តនោះទេ ។ តាមពិតទៅ យើងទាំងអស់គ្នាជួបនឹងភាពមិនរីករាយម្ដងម្កាលផងដែរ ។
ប៉ុន្តែ សូមប្រាកដថា ប្អូនៗចំណាយពេលជាមួយនឹងមនុស្សដែលលើកស្ទួយ និងបំផុសគំនិតដល់ប្អូនៗ ។ មិត្តល្អដែលជួយប្អូនៗឲ្យរស់នៅតាមបទដ្ឋានរបស់ព្រះអម្ចាស់ អាចធ្វើឲ្យមានភាពខុសប្លែកគ្នាយ៉ាងខ្លាំងមួយដល់សុភមង្គលរបស់ប្អូនៗ ។ ហើយសូមព្យាយាមធ្វើជាមិត្តភក្ដិម្នាក់ដែលលើកស្ទួយដល់មនុស្សដទៃទៀតផងដែរ ។ ប្អូនៗអាចធ្វើឲ្យមានភាពខុសប្លែកគ្នាយ៉ាងខ្លាំងមួយក្នុងជីវិតរបស់មនុស្សដទៃទៀតផងដែរ ។
ស្នាមជក់ទី ២ ៖ ប្រើប្រាស់តន្ត្រីដើម្បីបង្កើនសុភមង្គលរបស់ប្អូនៗ ។
តន្ត្រីមានឥទ្ធិពលដ៏មានអំណាចទៅលើសតិរបស់ប្អូនៗ ។ វាអាចផ្លាស់ប្តូរគីមីវិទ្យានៅក្នុងខួរក្បាលរបស់ប្អូនៗ ។ តន្ត្រីល្អនឹងជួយប្អូនៗឲ្យមានអារម្មណ៍វិជ្ជមាន រីករាយ និងបំផុសគំនិត ។ សូមបង្កើតបញ្ជីបទចម្រៀងដែលរីករាយ លើកទឹកចិត្ត និងបំផុសឲ្យមានសេចក្ដីជំនឿ ដែលប្អូនៗអាចស្ដាប់ជាទៀងទាត់ ។
ស្នាមជក់ទី ៣ ៖ ចេញទៅខាងក្រៅ ។
ការរីករាយនឹងការបង្កបង្កើតរបស់ព្រះ គឺជាការព្យាបាលដល់វិញ្ញាណ និងរូបកាយរបស់យើង ។ វាសំខាន់ណាស់ដល់សុភមង្គលរបស់ប្អូនៗ ក្នុងការយកពេលជាទៀតទាត់សម្រាកពីទូរទស្សន៍ កុំព្យូរទ័រ និងអេក្រង់ទូរសព្ទ ដើម្បីចេញទៅខាងក្រៅ ហើយរីករាយនឹងពន្លឺព្រះអាទិត្យ រុក្ខជាតិ និងសត្វដែលនៅជុំវិញខ្លួនប្អូនៗ ។ ចេញទៅក្រៅដើរជាមួយនឹងក្រុមគ្រួសារ និងមិត្តភក្ដិរបស់ប្អូនៗ លេងល្បែងនៅខាងក្រៅ អាន និងសិក្សានៅខាងក្រៅ ។ ប្អូនៗនឹងភ្ញាក់ផ្អើលចំពោះអារម្មណ៍ដែលប្អូនៗមាន នៅពេលប្អូនៗធ្វើដូច្នោះ ។
ស្នាមជក់ទី ៤ ៖ គេងឲ្យបានគ្រប់គ្រាន់ ។
ព្រះអម្ចាស់បានមានព្រះបន្ទូលថា ការគេងគឺសំខាន់ចំពោះសុខភាពនៃសតិអារម្មណ៍ និងសុខភាពខាងរូបកាយរបស់ប្អូនៗ ( សូមមើល គោលលទ្ធិ និងសេចក្ដីសញ្ញា ៨៨:១២៤ ) ។ ដូចជាថ្មទូរសព្ទដែលត្រូវការសាកថ្មដែរ ខួរក្បាលរបស់ប្អូនៗត្រូវការការគេងដើម្បីដំណើរការឲ្យបានត្រឹមត្រូវ ។ ដូចជាប្អូនៗកំណត់ម៉ោងរោទ៍ដើម្បីភ្ញាក់ពីគេងនៅពេលព្រឹកដែរ សូមប្រាកដថាកំណត់ម៉ោងសម្រាប់ប្អូនៗដើម្បីចូលគេងផងដែរ ( ហើយកុំយកទូរសព្ទទៅជាមួយប្អូនៗ ! )
ស្នាមជក់ទី ៥ ៖ មានការជួបសន្ទនាដោយផ្ទាល់យ៉ាងជ្រាលជ្រៅ ។
ការប្រើប្រាស់ការផ្ញើរសារ និងប្រព័ន្ធផ្សព្វផ្សាយសង្គមដើម្បីនិយាយជាមួយមិត្តភក្ដិ និងក្រុមគ្រួសាររបស់ប្អូនៗអាចជារឿងអស្ចារ្យ ។ ប៉ុន្តែការជួបសន្ទនាដោយផ្ទាល់អាចជួយដល់សតិ និងវិញ្ញាណរបស់ប្អូនៗ ដែលការសន្ទនាតាមអេឡិចត្រូនិចមិនអាចធ្វើបាន ។ ត្រូវប្រាកដថា ប្អូនៗប្រាស្រ័យទាក់ទងជាមួយក្រុមគ្រួសារ និងមិត្តភក្ដិរបស់ប្អូនៗ ។ យកពេលវេលាដើម្បីស្ដាប់ និងនិយាយជាមួយមនុស្សនៅជុំវិញខ្លួនប្អូនៗ ។
ស្នាមជក់ទី ៦ ៖ ហាត់ប្រាណឲ្យបានទៀងទាត់ ហើយព្យាយាមទទួលទានអាហារដែលមានសុខភាព ។
ខួរក្បាលរបស់ប្អូនៗអាចដំណើរការនៅពេលប្អូនៗផ្ដល់អាហារឲ្យវាប៉ុណ្ណោះ ។ អាហារដែលឆ្លងកាត់ដំណើរការកែច្នៃច្រើន ហើយមានជាតិស្ករច្រើន ( ជួនកាលត្រូវបានស្គាល់ថាជា អាហារគ្មានជីវជាតិ ) អាចមានរស់ជាតិឆ្ងាញ់ ប៉ុន្តែជាញឹកញាប់វាធ្វើឲ្យសតិ និងរូបកាយរបស់fuelមានអារម្មណ៍ថាយឺតយ៉ាវ ។ ដំណឹងល្អនោះគឺថា នៅពេលដែលប្អូនៗញ៉ាំផ្លែឈើ បន្លែ និងធញ្ញជាតិ នោះការឃ្លានអាហារគ្មានជីវជាតិនឹងកាត់បន្ថយ ។ ព្រះអម្ចាស់ប្រទានរូបកាយតែមួយដល់យើង ដូច្នេះ យើងត្រូវថែរក្សាវាឲ្យបានល្អ !
ស្នាមជក់ទី ៧ ៖ អធិស្ឋាន និងពិចារណា ។
ព្រះអម្ចាស់ និងព្យាការី និងសាវករបស់ទ្រង់ បានផ្ដល់ការប្រឹក្សាដល់យើងជាញឹកញាប់ឲ្យយកពេលវេលាដើម្បីអធិស្ឋាន ហើយនៅស្ងៀម ។ ការអធិស្ឋាន និងការសមាធិជះឥទ្ធិពលជាវិជ្ជមានដល់ផ្នែកនានានៃខួរក្បាល ដែលនៅក្នុងនោះប្អូនៗទទួលបាននូវសុភមង្គល ។ ប្រសិនបើប្អូនៗយកពេលវេលាជាទៀងទាត់ ដើម្បីពិចារណា និងអធិស្ឋាន នោះសុភមង្គលរបស់ប្អូនៗនឹងកើនឡើងបន្តិចម្ដងៗរាល់ពេល ។ ក្នុងរយៈពេលដ៏យូរ អ្នកនឹងកត់សម្គាល់ឃើញនូវភាពខុសប្លែកដ៏ធំមួយ ពីរបៀបដែលអ្នកមានអារម្មណ៍សុខសាន្ត និងមានទំនុកចិត្ត ។
រកមើលគំនិតបន្ថែមទៀត មែនទេ ?
ស្នាមជក់ទាំងប្រាំពីរនេះ គឺគ្រាន់តែជាជំហានប្រចាំថ្ងៃមួយចំនួន ដែលយើងទាំងអស់គ្នាអាចធ្វើបាន ដើម្បីបំពេញសុភមង្គលឲ្យរូបកាយ និងវិញ្ញាណរបស់យើង ។ សម្រាប់គំនិតបន្ថែមទៀត សូមមើលកូនសៀវភៅ ដើម្បីកម្លាំងនៃយុវជន ដើម្បីកំណត់រកមើលគោលការណ៍ទាំងឡាយ ដែលបានធ្វើឲ្យប្អូនៗ និងអ្នកដទៃទៀតរីករាយកាលពីមុន ។ តើប្អូនៗទទួលអារម្មណ៍បំផុសគំនិតឲ្យធ្វើអ្វីខ្លះ ដើម្បីបញ្ចូលចំណុចទាំងនោះឲ្យកាន់តែខ្ជាប់ខ្ជួនទៅក្នុងជីវិតប្រចាំថ្ងៃរបស់ប្អូនៗ ?
ចូរចងចាំជានិច្ចថា ប្រភពដ៏ធំបំផុតនៃក្ដីសុភមង្គល គឺនៅក្នុងព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ។ មិនថាកាលៈទេសៈរបស់ប្អូនៗយ៉ាងណានោះទេ ទ្រង់ត្រៀមរួចជាស្រេច ដើម្បីប្រទានពរជ័យដល់ប្អូនៗ និងជួយប្អូនៗឲ្យឆ្លងកាត់រាល់ការលំបាកទាំងឡាយរបស់ប្អូនៗ ។ ទ្រង់នឹងជួយប្អូនៗស្វែងរកសុភមង្គល ដែលប្អូនៗសង្ឃឹមចង់បាន ។