« ប្អូនៗអាចធ្វើវាបាន ! » ដើម្បីកម្លាំងនៃយុវជន ខែ កក្កដា ឆ្នាំ ២០២១ ទំព័រ ២៤–២៦ ។
ចូរមកតាមខ្ញុំ
ប្អូនៗ អាចធ្វើវាបាន !
យើងត្រូវចងចាំអ្វីទាំងអស់ ដែលព្រះវរបិតាសួគ៌ និងព្រះយេស៊ូវគ្រីស្ទបានធ្វើ—និងអ្វីដែលពួកទ្រង់បន្តធ្វើ—ដើម្បីជួយយើងឲ្យទទួលបាននគរសេឡេស្ទាលជាមរតក ។
គោលលទ្ធិ និង សេចក្ដីសញ្ញា ៧៦
« ខ្ញុំ ? នៅក្នុងនគរសេឡេស្ទាល ? ខ្ញុំមិនគិតថា ខ្ញុំអាចធ្វើវាបាននោះទេ » ។
តើប្អូនៗធ្លាប់មានអារម្មណ៍បែបនោះដែរឬទេ ? មែនហើយ វាជារឿងធម្មតា ដើម្បីឆ្ងល់ថាបើយើងល្អគ្រប់គ្រាន់ ជាពិសេសនៅពេលដែលវាហាក់ដូចជាយើងនៅឆ្ងាយពីភាពល្អឥតខ្ចោះនោះ ។ ជួនកាល វាមានអារម្មណ៍ដូចជា យើងមិនអាចទៅដល់នគរសេឡេស្ទាលនោះទេ !
ប៉ុន្តែ សូមកុំបាក់ទឹកចិត្តឡើយ ។ ផែនការរបស់ព្រះវរបិតាសួគ៌ទាំងមូល គឺដើម្បីជួយប្អូនៗឲ្យក្លាយដូចជាព្រះវរបិតាសួគ៌ និងព្រះយេស៊ូវគ្រីស្ទ ហើយរស់នៅជាមួយពួកទ្រង់វិញនៅក្នុងនគរសេឡេស្ទាល ។ ហើយប្អូនៗស្ថិតនៅក្នុងចំណុចប្រសើរជាងឆ្ងាយណាស់ពីអ្វីដែលប្អូនៗគិត ។ ប្រធាន អិម រ័សុល បាឡឺត ប្រធានស្ដីទីនៃកូរ៉ុមនៃពួកសាវកដប់ពីរនាក់ បានរំឭកយើងថា ការរស់នៅជាមួយពួកទ្រង់ម្ដងទៀតគឺ « លើសពីគោលដៅ របស់យើង ទៅទៀត—វាក៏ជាគោលដៅ របស់ពួកទ្រង់ ផងដែរ » ។១
លើសពីអ្វីៗទាំងអស់ ព្រះវរបិតាសួគ៌ និងព្រះយេស៊ូវគ្រីស្ទ មានព្រះទ័យចង់ឲ្យយើងទាំងអស់គ្នារស់នៅក្នុងនគរសេឡេស្ទាលជាមួយពួកទ្រង់ និងក្រុមគ្រួសាររបស់យើង ។ ដំណឹងល្អគឺថា យើងមិនត្រូវទៅទីនោះដោយខ្លួនយើងតែឯកឯងនោះទេ ។ នៅពេលយើងមករកព្រះគ្រីស្ទ ហើយធ្វើតាមទ្រង់ នោះយើងទទួលបានកម្លាំង និងជំនួយដែលយើងត្រូវការ ។ ដោយសារដង្វាយធួនរបស់ទ្រង់ នោះការទទួលបាននគរសេឡេស្ទាលជាមរតក មិនត្រឹមតែអាចធ្វើទៅបាននោះទេ គឺវាអាចធ្វើបាន ។
ដូច្នេះ ដោយសារមានជំនួយរបស់ទ្រង់ ប្អូនៗ អាច ធ្វើវាបាន ! ប្អូនៗអាចធ្វើវាបាន !
ផែនការរបស់ព្រះគឺសម្រាប់ មនុស្សគ្រប់គ្នា
ដើម្បីចូលក្នុងនគរសេឡេស្ទាល យើងត្រូវតែមានសេចក្ដីជំនឿលើព្រះយេស៊ូវគ្រីស្ទ ហើយព្យាយាមបង្កើនសេចក្ដីជំនឿនោះ ។ យើងត្រូវពុះពារផ្លាស់ប្ដូរ និងប្រែចិត្តជារៀងរាល់ថ្ងៃ ។ យើងត្រូវទទួលពិធីបុណ្យជ្រមុជទឹក និងទទួលអំណោយទាននៃព្រះវិញ្ញាណបរិសុទ្ធ—ហើយចងចាំព្រះយេស៊ូវគ្រីស្ទ និងរំឭកសេចក្ដីសញ្ញារបស់យើងជាទៀងទាត់ ។ យើងត្រូវប្រកាន់ខ្ជាប់រហូតដល់ទីបំផុត ។ ប្រសិនបើ ទាំងនេះគឺជាអ្វីដែលប្អូនៗប្រាថ្នាចង់បាន ហើយកំពុងពុះពារដើម្បីបានវា នោះប្អូនៗកំពុងនៅលើផ្លូវនៃការក្លាយជាមនុស្សម្នាក់ដែលទទួលបាននគរសេឡេស្ទាលជាមរតកហើយ ។
បន្ថែមពីលើនោះទៅទៀត ប្រធាន ដាល្លិន អេក អូក ទីប្រឹក្សាទីមួយនៅក្នុងគណៈប្រធានទីមួយ បានបង្រៀនថា អស់អ្នកទាំងឡាយដែលមានភាពស័ក្ដិសមនឹងទទួលបាន កម្រិតខ្ពស់បំផុត នៃនគរសេឡេស្ទាល គឺជា « អស់អ្នកដែលបានបំពេញតាមការតម្រូវដ៏ខ្ពស់បំផុតសម្រាប់នគរនោះ រួមទាំងភាពស្មោះត្រង់នឹងសេចក្ដីសញ្ញាទាំងឡាយដែលបានធ្វើនៅក្នុងព្រះវិហារបរិសុទ្ធរបស់ព្រះ និងអាពាហ៍ពិពាហ៍សម្រាប់ភាពអស់កល្បជានិច្ចផងដែរ » ។២ ( ប្អូនៗអាចរៀនបន្ថែមទៀតអំពីការណ៍នេះ ដោយអាន គោលលទ្ធិ និង សេចក្ដីសញ្ញា ៧៦:៥០–៧០, ៩២–៩៦ ) ។
ប្រសិនបើការណ៍នេះធ្វើឲ្យប្អូនៗឆ្ងល់—ឬព្រួយបារម្ភ—អំពីការរៀបចំខ្លួនរបស់ប្អូនៗ ដើម្បីទទួលបាននគរសេឡេស្ទាលជាមរតក នោះសូមចងចាំថា វាជាការធ្វើដំណើរមួយ ។ ជារៀងរាល់ថ្ងៃ ដែលយើងជ្រើសរើសដើម្បីឲ្យក្លាយកាន់តែដូចជាព្រះវរបិតាសួគ៌ និងព្រះយេស៊ូវគ្រីស្ទ គឺជាថ្ងៃមួយដែលយើងខិតកាន់តែជិតដល់ការក្លាយជាមនុស្សសេឡេស្ទាលកាន់តែច្រើនឡើយ—និងកាន់តែខិតជិតទៅនគរសេឡេស្ទាលផងដែរ ។ ពិតណាស់ នឹងមានការផ្លាំងភ្លាត់ កំហុសឆ្គង និងអំពើបាបសម្រាប់យើងទាំងអស់គ្នា ។ ការពឹងផ្អែកលើព្រះយេស៊ូវគ្រីស្ទនៅពេលដែលយើងប្រែចិត្តជារៀងរាល់ថ្ងៃគឺជាគន្លឹះមួយ ។ ការធ្វើដំណើរនេះគឺជាការធ្វើដំណើរដ៏មានក្ដីសង្ឃឹម ដោយសារតែអ្វីៗទាំងអស់ដែលទ្រង់ និងព្រះវរបិតាសួគ៌របស់យើងបានធ្វើ—និងអ្វីដែលពួកទ្រង់បន្តធ្វើ—ដើម្បីជួយយើងឲ្យទៅដល់ទីនោះ ។
យើងមានព្រះអង្គសង្គ្រោះ
ព្រះអង្គសង្គ្រោះបានប្រទានផ្លូវសម្រាប់យើង ដើម្បីត្រឡប់ទៅព្រះវរបិតាសួគ៌របស់យើងវិញ ។ យ៉ូសែប ស៊្មីធ បានពិពណ៌នាអំពីពួកអ្នកទាំងឡាយដែលរស់នៅក្នុងនគរសេឡេស្ទាលថា « បានទទួលទីបន្ទាល់ពីព្រះយេស៊ូវ » និងបាន « ធ្វើឲ្យល្អឥតខ្ចោះតាមរយៈព្រះយេស៊ូវ … ដែលបាននាំមកនូវដង្វាយធួនដ៏ល្អឥតខ្ចោះនេះ តាមរយៈការច្រួចព្រះលោហិតរបស់ព្រះអង្គផ្ទាល់ » ( គោលលទ្ធិ និង សេចក្ដីសញ្ញា ៧៦:៥១, ៦៩ ) ។
ការក្លាយជាល្អឥតខ្ចោះនៅក្នុងព្រះយេស៊ូវគ្រីស្ទ ពុំមានន័យថា យើងមិនដែលធ្វើខុសនោះឡើយ ។ វាមានន័យថា យើងប្រែចិត្ត ហើយព្យាយាមធ្វើឲ្យល្អជាងមុនបន្តិចជារៀងរាល់ថ្ងៃ ដោយការពឹងផ្អែកលើព្រះអង្គសង្គ្រោះ និងព្រះចេស្ដានៃដង្វាយធួនរបស់ទ្រង់ ដើម្បីជួយយើងផ្លាស់ប្ដូរ ។ កាលដែលយើងធ្វើដូច្នេះ ព្រះគុណរបស់ទ្រង់អនុញ្ញាតឲ្យយើងរីកចម្រើនទៅកាន់កម្រិតដែលខ្ពស់បំផុតនៃនគរសេឡេស្ទាល ជាកន្លែងដែលយើងនឹងរស់នៅជាមួយទ្រង់ ជាមួយព្រះវរបិតាសួគ៌ និងក្រុមគ្រួសាររបស់យើងជារៀងរហូត ។ យើងក៏នឹងទទួលបាននូវអ្វីទាំងអស់ដែលព្រះវរបិតារបស់យើងដែលគង់នៅស្ថានសួគ៌មានផងដែរ ។ គ្មានអ្វីអាចធ្វើទៅបានឡើយបើមិនមានព្រះអង្គសង្គ្រោះទេនោះ ។
យើងមានសាសនាចក្រ
ប្រធាន អូក បានបង្រៀនថា សាសនាចក្រមាននៅទីនេះផងដែរ « ដើម្បីជួយបុត្រាបុត្រីទាំងអស់របស់ព្រះឲ្យយល់ពីសក្ដានុពលរបស់ពួកគេ និងសម្រេចបាននូវជោគវាសនាដ៏ខ្ពស់បំផុតរបស់ពួកគេ » ។ សាសនាចក្រនេះបង្កើតឡើងដើម្បីផ្ដល់ដល់បុត្រា និងបុត្រីរបស់ព្រះ នូវមធ្យោបាយដើម្បីចូលទៅក្នុង និងទទួលបានការលើកតម្កើងនៅក្នុងនគរសេឡេស្ទាល » ។៣ ការណ៍នេះត្រូវបានធ្វើឡើងតាមរយៈការគោរពប្រតិបត្តិដល់ពិធីបរិសុទ្ធ និងសេចក្ដីសញ្ញានៃដំណឹងល្អ ។
ពិធីបរិសុទ្ធ និងសេចក្ដីសញ្ញាទាំងនេះ តម្រូវឲ្យមានបព្វជិតភាព ដែលមានតែនៅក្នុងសាសនាចក្រពិតរបស់ព្រះតែប៉ុណ្ណោះ ។ នៅក្នុងវិធីទាំងនេះ និងវិធីផ្សេងៗទៀត ព្រះអម្ចាស់ និងសាសនាចក្ររបស់ទ្រង់ជួយយើងនៅក្នុងការធ្វើដំណើររបស់យើង ដើម្បីក្លាយទៅជាមនុស្សល្អបំផុតដែលយើងអាចធ្វើទៅបាន ដើម្បីឲ្យដួងចិត្តរបស់យើងត្រូវបានរៀបចំ សម្រាប់ទទួលមរតកទាំងអស់ដែលព្រះវរបិតាសួគ៌មាន ហើយទទួលបានជីវិតដ៏នៅអស់កល្បជានិច្ច ។
បន្តទៅមុខទៀត ហើយកុំបោះបង់ចោលឡើយ !
ការធ្វើដំណើរឆ្ពោះទៅកាន់នគរសេឡេស្ទាលនេះ គឺពោរពេញទៅដោយក្តីសង្ឃឹម ប៉ុន្តែវាមិនងាយស្រួលជានិច្ចនោះទេ ។ ព្រះវរបិតាសួគ៌ត្រាស់ដឹងពីរឿងនោះ ។ ទ្រង់ និងព្រះយេស៊ូវគ្រីស្ទ បានសន្យាដើម្បីជួយ និងពង្រឹងយើងនៅគ្រប់ជំហាននៅតាមផ្លូវនោះ ។
រូបថតមកពី Getty Images
ដូច្នេះ សូមបន្តទៅមុខទៀត ហើយកុំបោះបង់ចោលឡើយ ។ យើងនឹងមានជំនួយ កាលដែលយើងពុះពារដើម្បីធ្វើតាមព្រះអង្គសង្គ្រោះ រស់នៅឲ្យមានភាពស័ក្ដិសមដើម្បីទទួល និងធ្វើតាមការបំផុសគំនិតពីព្រះវិញ្ញាណបរិសុទ្ធ និងដឹងពីកន្លែងណាដែលយើងត្រូវកែលម្អ ។ កាលដែលយើងឆ្លងកាត់ជីវិតដោយមានសេចក្ដីជំនឿលើព្រះយេស៊ូវគ្រីស្ទ ហើយប្រែចិត្តនៅពេលដែលយើងត្រូវប្រែចិត្ត នោះព្រះវរបិតាសួគ៌របស់យើង នឹងជួយយើងឲ្យផ្លាស់ប្ដូរបានកាន់តែប្រសើរឡើង ។
ការមានភាពស័ក្ដិសមដើម្បីចូលទៅក្នុងនគរសេឡេស្ទាល ពុំអាចសម្រេចបានតែនៅក្នុងទង្វើអស្ចារ្យតែមួយឡើយ ។ វាជាលទ្ធផលនៃការជ្រើសរើសយ៉ាងខ្ជាប់ខ្ជួន ដើម្បីធ្វើតាមព្រះអង្គសង្គ្រោះ និងពឹងផ្អែកទៅលើសេចក្ដីសង្ឃឹម និងការអះអាងដែលមកពីដំណឹងល្អរបស់ទ្រង់ ។
ដូច្នេះ ប្រសិនបើប្អូនៗពុះពារធ្វើតាមព្រះអង្គសង្គ្រោះ ហើយនៅតែព្រួយបារម្ភ ថាតើប្អូនៗនឹងអាចទៅដល់នគរសេឡេស្ទាល ឬអត់ នោះសញ្ញាទាំងអស់ចង្អុលទៅកាន់ឃ្លាដ៏លាន់រំពងថា « មែនហើយ ! ប្អូនៗអាចធ្វើវាបាន ! » នេះគឺជាអ្វីដែលព្រះវរបិតាសួគ៌មានព្រះរាជបំណងសម្រាប់យើងទាំងអស់គ្នា ! ហើយដូចជាអ្វីដែលប្រធាន អូក បានបង្រៀន ថាវាអាចធ្វើទៅបាន « តាមរយៈសេចក្ដីស្រឡាញ់របស់ព្រះសម្រាប់បុត្រាបុត្រីទ្រង់ និងតាមរយៈដង្វាយធួន និងការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ‹ ដែលសរសើរតម្កើងព្រះវរបិតា ហើយសង្គ្រោះ អស់ ទាំងការនៃព្រះហស្តទ្រង់ › [ គោលលទ្ធិ និង សេចក្ដីសញ្ញា ៧៦:៤៣ ] » ។៤