“Plan blong God blong Stap Hapi mo Tabu Fiuja blong Yu,” Blong Ol Yut Oli Kam Strong, Jen 2022.
Plan blong God blong Stap Hapi mo Tabu Fiuja blong Yu
Taem yu andastanem mo stap laef folem plan blong stap hapi, i letem yu kasem tabu fiuja blong yu.
Ol pikja droing oli kam long Albert Espí
?Wanem nao i kam long maen blong yu taem yu harem toktok ia, fiuja? ?Yu tingting long wan samting we oli putum finis i stap, mo yu no save ronwe long hem? ?Yu tingting long wan prapa nogud samting, o wan gudgudfala samting we oli no save jenisim nomata wanem yu mekem? O mebi ?yu tingting long hiro ia insaed long wan muvi o wan buk, we fiuja blong hem i blong komplitim wan resis, sevem wol, o kam wan king o kwin?
Sapos yu lukluk ol diksonari, bae oli save agri long ol defren kaen mining ia; be, taem yumi tokbaot tabu fiuja, yumi stap minim wan defren samting. Hem i no olsem fiuja ia we yu stap ridim insaed long ol buk, o stap wajem long ol muvi; blong kasem tabu fiuja blong yu, hem i posibol from se yu yu wan pikinini blong God, be tu, i nidim blong yu yusum fridom blong yu blong save mekem joes.
God i gat evri paoa long heven mo long wol ia. Ol kavenan we yumi stap mekem wetem Papa blong yumi long Heven oli letem Hem blong i patna blong yumi taem yumi stap wokbaot tru long ol strong win blong laef. Tabu fiuja blong yumi—ful paoa ia we yumi save kasem taem yumi kam patna wetem God—kam posibol tru long plan blong Hem blong stap hapi.
Taem yu andastanem plan we Papa long Heven i gat blong yu stap hapi, hemia i letem yu blong yu luksave aedentiti blong yu, mo stamba tingting blong yu we i no save finis. Mo blong jusum blong mekem mo kipim ol kavenan wetem God, bambae i letem yu blong kasem stamba tingting ia.
Insaed long buk blong Moses, yumi ridim se “God i bin tekemaot Moses i go antap long wan bigfala hil we i hae tumas, mo hem i bin luk God, i luk fes blong hem mo i bin toktok wetem hem” (Moses 1:1–2). Tru long visit ia we i go long Moses stret, God i tijim Moses abaot aedentiti blong hem we i no save finis. Nomata we Moses i gat wan bodi we i save ded, mo hem i no stret evriwan, hem i bin lanem wan impoten samting abaot hemwan: se, i tru, hem i pikinini blong God (luk long Moses 1:6).
Tingbaot Huia Yu
Setan i wantem se yu yu fogetem huia yu. Taem we Setan i stap traem blong daonem tingting blong Moses blong hem i no mekem wok ia we Lod i bin rere blong hem, wetem strong paoa long tingting, Moses i bin ansa: “?Huia yu? From luk, mi mi wan pikinini blong God” (Moses 1:13; oli ademap italik). Nao Moses i talem: “Setan, !yu kamaot long ples ia! Yu no trikim mi.” (Moses 1:16; oli ademap italik).
Long nara toktok, Moses i talem: “Yu no save trikim mi, from mi save huia mi. Yu no gat laet mo glori blong God. ?So, from wanem bae mi wosipim yu mo foldaon long giaman blong yu?”
Neva fogetem se God i lavem yu mo Hem i wantem helpem yu mo blesem yu. Mo Hem nao i gat tru intres long yuwan olsem wan long ol pikinini blong Hem. Plis, tekem taem blong lanem tru mining blong stap olsem wan pikinini blong God. Afta, setem ol gol mo mekem ol joes we bambae oli helpem yu blong laef folem standet blong save ia, evri dei.
Mi Gat Wan Wok blong Yu
Yu gat plante samting mo tingting blong wari long hem. Yu gat ol homwok, ol frensip, ol famli responsabiliti, mo mebi yu gat wan wok. I tru, jalenj blong yu i blong balensem evri impoten rol long laef mo no fogetem bigfala stamba tingting blong yu long laef. God i gat wan wok blong yu mekem (luk long Moses 1:6). Hem i ansa long kwestin ia: “?From wanem mi stap long wol ia?”
Olsem wan pikinini blong God, yu bin kam long wol ia blong kasem wan bodi blong mit mo bun. Wetem bodi ia, yu save jusum blong yu fetful blong folem Jisas Kraes. Yu save jusum blong obei ol komanmen blong God, kasem ol odinens mo mekem mo kipim ol kavenan blong gospel. Taem yu stap mekem ol samting ia, bae i mekem yu rere blong yu kasem tabu fiuja blong yu.
Wetem stamba tingting ia long maen, yu save luk hamas i impoten blong tekem mo kakae sakramen evri wik, blong stadi long ol skripja, mo blong prea evri dei, putum ol gol we oli gat mining, mo givim seves long ol narawan. Ol samting ia oli helpem blong rimaenem yu long risen from wanem yu rili stap ia, mo bae oli helpem yu blong stap klin inaf blong kasem wan revelesen we i blong yuwan, we yu nidim blong yu stap hapi mo stap strong long kavenan rod ia. Taem yu stap sakem sin mo wok strong wetem strong tingting blong stap folem Lod, bambae yu kasem ol daereksen we i blong yuwan, long saed blong evri pat blong laef blong yu.
Traehad blong Stap Kam Huia God I Minim blong Yu Kam
Ol wari mo ol trabol blong wol ia, o sapos yu filim se yu no sef i stap, oli save mekem se yu lusum tingting mo nomo luk impoten rol blong yu long bigfala plan ia blong fasin blong sevem man, we God i putum. Sapos hemia i hapen, mi stap invaetem yu blong kam long Kraes (luk long Moronae 10:32). I no gat wan samting, insaed long plan ia we i no save finis, we i blong God, we i posibol sapos Hem i no stap; mo wetem Hem, evri gud samting i stap nomo long han blong yumi blong kasem.
Blong stap traehad blong stap folem Sevya, i bes wei blong holemtaet wan lukluk long saed blong gospel. Wetem fet mo hop long Hem, yu save gat tras long yuwan mo fesem ol jalenj blong laef. Mo tu, bambae yu save luk samting i klia taem yu mekem ol joes, taem yu stretem ol problem, taem yu wok from ol gol we oli stret mo gud, mo taem yu fesem temtesen.
Ol desisen blong yu bae i talem wanem bae i hapen long taem we i no save finis. Tru long Jisas Kraes, mo gladhat blong Hem we i pem praes from yumi, yu save gat glad long laef ia, mo long nekis laef tu. Yu save kasem tabu fiuja blong yu, we i blong kasem evri samting we Hem i gat, mo stap laef long wan kaen laef ia we Hem i lidim, we i laef we i no save finis, … we i presen blong God we i moa bigwan long evri narafala presen blong hem” (Doktrin mo Ol Kavenan 14:7).