I no gat fulap samting we mi laekem we ol pipol long yut grup blong mi oli laekem tu. ?Hao nao mi save filim se mi joen gud moa wetem olgeta?

Go Toktok o Helpem Wan

“Mi filim se mi joen moa wetem ol narawan taem mi rili traem blong spendem taem wetem olgeta wanwan, i no jes taem mifala i stap long wan grup nomo. Sapos yu wantem faenem wan blong yu fren gud wetem, go toktok o helpem wan we yu luk se hem i nidim wan fren. !Maet bae yu faenem se yu yu kasem moa bitim olgeta!”

Latyanna P., 17 yia, Singapo

Serem Wanem Yu Intres long Hem

“Plante long olgeta insaed long yut grup blong mi oli gat ol defren samting we oli gat intres long hem. Mi laekem blong stap askem olgeta abaot wanem ol intres long hem from se i soem se mi mi kea long olgeta. Afta, givim wan janis long olgeta blong oli askem yu abaot ol samting we yu yu gat intres long olgeta. Blong joen wetem ol pipol, i tekem taem—!gohed blong mekem hemia!”

Erin F., 18 yia, Yuta, YSA

Faenem Samting we Yufala I Agri long Hem

“Sapos yu wantem gat wan rilesensip we i kolosap moa wetem grup blong ol fren blong yu, faenem ol samting we oli gud mo oli gat mining, we yufala i save mekem tugeta, iven sapos i no gat plante samting. Yu save faenem wan samting we yufala i laekem blong mekem long fri taem blong yufala. Askem help we i kam long Papa long Heven, mo bambae Hem i givim insperesen long yu.”

Carla V., 12 yia, Peru

Laekem Wanem I Defren long Yufala

“Moa mi spendem taem wetem ol pipol insaed long yut grup blong mi, !moa mi laekem wanem i spesel abaot olgeta! Mi lanem olsem wanem blong givim seves long olgeta long wan moa gud wei, we i helpem mi tu blong kam kolosap moa long olgeta mo long Jisas Kraes. Yumi evriwan i ol pikinini blong Papa blong yumi long Heven; mekem se yumi gat fulap samting we i semsemmak bitim wanem we yumi ting long hem.”

Sarah M., 16 yia, Oregon, YSA

Traem Niu Samting

“Jes gohed blong stap olsem wan fren mo gohed blong stap toktok wetem olgeta. Gohed blong traem ol niu samting, mo yu kam pat moa long grup. Wan boe long wod blong mifala, hem i no laekem spot tumas, be oltaem, hem i stap plei wetem mifala. Afta, mifala i mekem ol samting we hem i gat intres long hem, olsem blong mekem ol majik trik, o sakem kad. Blong traem niu samting i wan gudfala wei blong filim se yu joen wetem ol narawan.”

Jarren M., 17 yia, Nova Skotia, Kanada

Go Aot mo Toktok

“Blong go aot mo toktok, mo helpem wan insaed long yut grup blong yu we i stap long wan taem blong nid. Taem yumi traem blong stap wan eksampol blong lav ia blong Sevya, bae i helpem yumi blong kam blong joen moa wetem wanwan long yumi.”

Joshua C., 20 yia, Faleniu, Ameriken Samoa

Stap Olsem we Yu Stap

“Wetem taem, bambae yufala i faenem ol samting we yufala i laeklaekem, be maet i no save hapen kwiktaem. Be blong wet long hemia i hapen, yu save konek long taem blong ol aktiviti mo ol samting we oli hapen ova long wik. !Gat gud taem long ol aktiviti! !Jusum blong tekpat, mo stap olsem yu stap!”

Hannah W., 18 yia, Nova Skotia, Kanada