“Papa long Heven I Save Mi,” Blong Ol Yut Oli Kam Strong, Jen 2022.
Stamba Toktok Ia mo Mi
Ol yut oli serem olsem wanem oli stap laef folem ol toktok we oli stap long Stamba Toktok blong Ol Yang Woman, mo hemia blong Aronik Prishud
Papa long Heven I Save Mi
“Mi mi wan boe blong God.”
Taem we mi bin stap kamp wetem papa, mitufala i bin gat wan taem we bae mi neva fogetem. Mitufala i wokbaot folem saed blong wan bigfala hil, let long wan naet, mo faenem wan ples blong sidaon tugeta. Taem mitufala i stap lukluk i go long ful skae long naet ia, olgeta sta we oli saen gud we mi neva bin luk, oli raonem mitufala. Mitufala i sidaon blong wan longfala taem, mo talem nem blong ol planet, mo nem blong ol sta we oli grup tugeta blong mekem wan paten, wan afta narawan.
Taem mi stap lukluk long yunives long fored blong mi, mi filim se mi smol we mi smol, mo mi no impoten. Mi no save pikjarem nomo se hamas moa planet i gat i stap— “ol wol we i no gat en blong olgeta,” ?stret? ?Mi mi huia komperem long evri samting ia?
Mi bin askem papa blong mi sapos i gat wan nara kaen laef antap ia, insaed long yunives, mo filing blong mi i harem se i tumas finis, jes blong tingting long hemia. Maet hem i ridim ol tingting blong mi, from se hem i ansa simpol nomo se: “Mi mi save hemia nomo. Papa long Heven i mekem plante moa kriesen, olsem we yu save luk. Be, aot long evri kriesen blong Hem, Hem i lavem yu, yuwan.
“Hem i luk evri samting we yu stap go tru long hem, mo Hem i wantem, bitim evri samting, se Hem i pat blong laef blong yu. Hem i wantem blong tekem glad i kam long yu, mo Hem i wantem helpem yu gobak stap laef wetem Hem blong oltaem.
Mi stil filim se mi smol tumas anda long bigbigfala skae long naet ia, be mi bin bilivim testemoni blong papa blong mi. Mi mi no nating long ae blong Papa long Heven. Mo Hem i wantem stap insaed long laef blong mi.
Mi tingbaot wanem we Presiden Dieter F. Uchtdorf, we long tetaem ia hem i Seken Kaonsela long Fas Presidensi, i bin tijim: “I gat wan samting we i no go tugeta wetem man: sapos yumi komperem long God, man i nating nomo; be yet, yumi minim evri samting long Hem.”1
Semmak olsem skae ia we i fulap long sta, ol kriesen blong God, i no gat en long olgeta—be i semmak tu long lav ia we Hem i gat long wanwan pikinini blong Hem. Long wanwan long yumi. Samtaem, mi tingting i gobak long tetaem ia we mi bin sidaon long wan bigfala hil ia, we mi sapraes tumas. Maet mi mi nating komperem long God, be Hem i no tingting long wei ia. Mi mi boe blong Hem, mo Hem i save mi.
Hem we i raetem hemia i stap long Kalifonia, YSA.