“Stap Faenem Jisas Kraes Insaed long OlTesteman,” Blong Ol Yut Oli Kam Strong, Jen 2022.

Kam Folem Mi

Stap Faenem Jisas Kraes Insaed long OlTesteman

I Kam long Marissa Widdison

Ol Magasin blong Jos

Hemia ol trifala wei we yu save lukaotem Sevya taem yu stap stadi long OlTesteman long yia ia.

Pikja

Jisas Kraes

Pop tes: ?Wijwan buk blong skripja i stap tokbaot Jisas Kraes? aah. Yumi traem luk:

Buk blong Momon hem i wan narafala testeman abaot Jisas Kraes.

Doktrin mo Ol Kavenan i wan grup blong ol mesej we oli kam long Hem i go long Josef Smit mo ol nara profet.

Niu Testeman i tokbaot ol defren taem blong laef blong Hem.

?Be olsem wanem long OlTesteman? ?Hem i stap tij abaot Jisas Kraes tu, o nogat?

!Yes! Wanem i tru i stap, i we, insaed long OlTesteman, Sevya i traehad moa blong stap helpem ol disaepol blong Hem blong oli andastanem rol blong Hem: “Nao Jisas i stat long buk blong Moses, mo i gotru long ol tok blong ol profet, i talemaot gud long tufala, olgeta tok blong Baebol we oli bin raetem blong tokbaot hem.” (Luk 24:27).

Hemia ol trifala wei we yu save lukaotem Jisas Kraes taem yu stap luklukgud insaed long OlTesteman long yia ia.

1. Ol skripja we oli tokbaot Jisas Kraes, be oli yusum wan defren nem.

Long OlTesteman, plante taem oli singaotem Jisas se “Masta” o “Hae God.” Insaed long ol vesen blong Baebol we Jos i pablisim, insaed i gat ol futnot we oli save helpem yu blong andastanem taem we i gat wan ves we i tokbaot Jisas Kraes. Eksampol, taem we Moses i stap toktok wetem God long wan smol bus we faea i laet long hem, (luk long Eksodas 3:6), ol futnot oli talemaot klia se hem i bin stap toktok wetem Sevya.¹ Presiden Russell M. Nelson i bin leftemap yumi blong stadi long ol defren nem mo ol defren taetol blong Kraes we oli yusum insaed long ol skripja.²

2. Ol samting mo ol taem we oli mekem yumi tingbaot Jisas Kraes.

Plante skripja long OlTesteman oli yusum ol simbol we oli save tijim yumi abaot Jisas Kraes, mo oli mekem yumi tingbaot help ia we Hem i stap givim long yumi. Eksampol:

Plante skripja oli tokbaot ol taem we ol fetful pipol oli kasem komanmen blong mekem sakrifaes blong ol animol olsem pat blong wosip blong olgeta. Eksampol: sapos ol pikinini blong Isrel oli makem doa blong olgeta wetem blad blong smol sipsip, bambae oli kasem proteksen blong oli no kasem wan nogud bigfala sik. Olgeta sakrifaes ia, oli mekem yumi tingbaot se Jisas Kraes i bin letem Hemwan blong oli kilimded Hem, olsem pat blong Atonmen blong Hem blong winim ded long saed blong spirit, mo tu ded blong bodi. (Luk long Eksodas 12:13.)
Long wan taem, wan profet, we nem blong hem i Elaeja, i mas go haed long draeples. Hem i harem nogud mo hem i talem se hem i wantem ded. Taem hem i stap slip, olsem wan merikel, i gat bred mo wota i kam stap, i mekem hem i kam strong long saed blong bodi, mo tu long saed blong filing blong hem, we i inaf blong hem i gohed. Hemia i save mekem yumi tingbaot se Jisas Kraes i Wota Ia we I Stap Laef, mo i Bred blong Laef, stamba blong hop mo laef. (Luk long 1 King 19:1–8.)
“Tok blong yu i olsem laet . Oltaem hem i stap soemaot rod blong mi, mo i stap lidim mi;” hemia toktok blong wan we i raetem Ol Sam (Sam 119:105). Mo Maeka i bin testifae: “Naoia yumi stap long tudak, be Hae God bambae i givim laet long yumi” (Maeka 7:8). Toktok blong olgeta i mekem yumi tingbaot se Jisas Kraes i Laet blong Wol, we i stap lidim yumi i gobak long hom blong yumi long heven.

Taem yufala i stap rid, maet bae yufala i save faenemaot ol nara samting we oli save mekem yufala i tingbaot Jisas Kraes mo paoa blong Hem blong save sevem yumi. Olsem we taem famli blong Noa i sef, i no draon long bigfala wota from oli stap long bigfala sip, o taem we Jona i kasem sam taem blong sakem sin taem we hem i bin stap long bel blong welfis. Olgeta taem ia, oli save mekem yumi tingbaot se Sevya i save tekem yumi i gotru long ol strong win blong laef, mo i save givim long yumi sam janis blong kambak long stret rod. (Luk long Jenesis 7:1; Jona 1:17.)

3. Ol ves we oli stap talem profesi abaot taem we Jisas Kraes bae i bon i kam long wol ia.

Tedei, yumi stap lukluk fored i go, mo yumi stap rere from Seken Kaming blong Jisas Kraes. Long wan semmak wei, ol profet blong taem blong OlTesteman oli bin lukluk fored i go, mo oli bin raet abaot fas taem we bae Hem i kam, we i taem ia we bae Hem i bon i kam long wol. Eksampol:

Wan profet, we nem blong hem i Balam i tokbaot olsem wanem “wan sta … bambae i aot long Isrel i kam olsem wan bigfala sta” (Namba 24:17). Hemia i minim se Sevya bae i bon i kam long wol ia we bae Hem i kamaot long laen blong Jekob (o Isrel).
Wan profet, we nem blong hem i Natan i talem long King Deved se Jisas Kraes bae i kamaot long laen blong Deved—se bae laen blong hem “bambae oli kam king blong [olgeta]” (2 Samuel 7:13).
Profet Aesea i bin raetem sam long ol toktok we oli save gud long hem long OlTesteman, we oli tokbaot Sevya. Sam long ol toktok blong hem, oli yusum long wan singsing blong Handel we oli singaotem Mesaea, we plante taem oli stap singsing long hem long Krismes taem. (Luk long Aesea 7; 9; 40; 53.)

Pikja

gel we i stap ridim ol skripja wetem tojlaet

Wetem smol praktis, bambae yu save faenem Jisas Kraes truaot long OlTesteman long yia ia. Hem i lavem yufala, wanwan long yufala, semmak olsem we Hem i bin lavem Adam mo Iv, Eron mo Miriam³—mo plante moa narawan taem we, Hemwan, i bin givhan long olgeta mo yumi save ridim long ol histri ia blong bifo we oli givim insperesen. Wetem fet long Jisas Kraes, mo wetem help we i kam long wanwan long yumi, !hemia bae i wan gudfala yia blong skripja stadi!