“Wan Enjinia blong Givim Glad,” Blong Ol Yut Oli Kam Strong, Jen 2022.
Wan Enjinia blong Givim Glad
Yang man ia we i kam long Jemani i faenem save, ol naes samting, mo glad long evri kaen ples—mo taem hem i faenem, hem i serem ol samting ia.
Patrick i wok long model blong enjin blong trak we hem i mekem.
Ol foto oli kam long Julian Klemm
Patrick L., 16, blong Bavaria, Jemani, i talem se fevret topik blong hem long skul oli matematik, fisiks, mo kemistri. I tru we hem i laekem saens plante, mekem se hem i wantem serem wetem ol narawan taem hem i raetem wan buk abaot fisiks (long saed blong termodaenamik mo wok blong ol magnet, blong talem stret).
Hem i wantem blong kam wan enjinia, mo hem i wantem developem ol teknikel tul olsem ol enjin blong trak. (Blong talem smol nomo, hedkwota blong ol man we oli wokem ol trak olsem BMW mo Audi, oli stap wan aoa longwe long ples we hem i stap laef long hem.)
Be saens i no wan ples ia nomo we Patrick i faenem paoa, mo ol gud samting.
Saens mo Tingting long Maen
Yes, Patrick i lavem bigwan saens, be intres blong hem i go i bitim ol strong tru samting mo ol fomula.
“Mi bin raetem wan buk blong fisiks, be naoia, mi stap raetem wan drim buk,” hem i eksplenem. “Buk we mi stap raetem, i abaot ol majik animol mo wol blong olgeta. Mo afta, i gat samfala yang pipol we oli save stretem ol problem.”
Las projek blong hem, i kamaot long lav blong Patrick from ol drim buk olsem Harry Potter mo ol seri blong Percy Jackson. Blong raetem ol buk, olsem wan saed wok, i wan samting we Patrick i mekem afta we angkel blong hem i talem long hem se bae i wan gudfala samting blong mekem. “Hem i spolem mi wetem glad blong hem,” Patrick i talem.
Glad ia we i spolem hem, i lidim Patrick blong tekem wanem hem i bin lanem abaot ol rul mo ol ril samting blong wol ia, mo raetem wan buk abaot ol samting ia. Mo tu, i mekem se hem i wantem krietem wan stori we i gat plante gud drim samting insaed long hem. Mo i no gat wan samting we i defren long samting ia. I luk olsem se Patrick i save se trutok mo ol naes samting, mo glad, oli save faenem long plante ples. Mo hem i wantem faenem, krietem, mo serem ol samting ia long eni ples we oli stap long hem.
Wol Ia Olsem we Oli Wokem
Patrick i andastanem plante samting abaot ol loa blong fisiks long wol ia. Be tu, hem i lukluk i go bitim wanem we i stap, blong luk wanem we i naes insaed.
Hem i talem: “Bae mi laef kolosap long wan dak bus.” “Hemia i wan gud saed blong stap laef long wan smol taon—yu save go kwik insaed long wan dak bus, mo faenem pis long ples ia.”
Hem i lavem plante long ol smol rod we oli gotru long dak bus, blong wokbaot, o speseli blong ron long baeskel long hem. “Mi laekem blong ron long baeskel. Hem i wan samting we mi laekem tumas,” hem i talem. “Mi ron plante taem long baeskel. Wan taem mi ron long baeskel blong 1200 kilo mita long tu wik.”
Saens i givim insperesen long maen blong Patrick, mo prea i givim insperesen long spirit blong hem. “Mi gat wan strong testemoni abaot prea,” hem i talem. “Yu save toktok long [Papa long Heven] long evri ples.”
Samtaem hem i laekem blong go wokbaot o ron long baeskel long dak bus, wetem ful famli blong hem (Mama, Papa, tu yang brata, mo tu yang sista,) o jes hem wetem papa blong hem nomo. Plante taem, bae hem i stap go hemwan. Be oltaem hem i faenem pis mo naes samting long kriesen aotsaed.
“I naes tumas blong luk san raon long ples ia, speseli taemsan i stap girap,” hem i talem. “Samtaem, yu save luk ol bigbigfala hil, nomata oli stap longwe. Mo taem we san i stap girap i kam antap, mo wetem ol hil, bae yu luk naes red skae, mo i naes tumas.”
Wan Nara Kaen Save
Antap long ol tru samting blong saens, mo ol naes samting blong wol ia olsem we oli wokem i stap, Patrick i tekem se trutok i impoten—kaen trutok ia we oli save faenem nomo tru long prea.
“Mi gat wan strong testemoni abaot prea,” Patrick i talem. “Blong stap nildaon, foldem han, mo gat pis mo kwaet taem, mo afta, prea. Ples ia nao bigfala testemoni blong mi i kamaot long hem.”
Hem i eksplenem se testemoni blong hem i kam from wan samting we oli talem long hem long petriakel blesing blong hem. “I talem se mi mas tingbaot oltaem se Papa long Heven i stap kolosap nomo, i stap insaed long prea,” hem i talem. “Yu save wokbaot i go long Hem long eni ples. Hem i stap ia blong yu long evri ples, mo yu save kasem ol ansa long evri ples.”
Eksperiens blong hem blong stap kasem ol ansa long ol prea, i kam antap moa taem we mi tekem samfala step, hem i talem. “Mi filim Tabu Spirit i strong tumas wetem samfala prea. Taem we mi putum ol gol wetem ful tingting, taem mi gat ol kwestin wetem ful tingting, taem we mi gat ful tingting mo sidaon mo afta tekem aksen, olsem we ol skripja oli talem, mo wet mo spendem taem—taem mi save mekem evri samting ia, oltaem mi gat wan strong testemoni, mo mi filim Tabu Spirit.”
Patrick i tingbaot wan taem we hem i talem wan spesel prea. Hem i talem: “Mifala i stap tokbaot Josef Smit plante, mo olsem wanem taem hem i gat 14 yia, hem i bin prea mo i bin kasem wan ansa.” “Mo mi sidaon i stap—mo mi iven go long wan dak bus—mo mi bin prea. Mo mi i bin kasem wan ansa. Afta, mi bin hapi. Mo hemia i bin mekem testemoni blong mi i kam strong moa.”
Serem Wanem we Hem I Save
Semmak olsem we hem i bin stap lukaotem blong serem save blong hem long saed blong saens, mo wanem we hem i stap tingting long maen blong hem, Patrick i stap lukaot tu blong serem save blong hem long saed blong spirit.
Taem hem i gat 12 yia, hem i stat blong spendem taem blong stap helpem ol fultaem misinari. Wan taem tu, hem i bin invaetem wan fren i kam long haos blong hem, blong hem i kasem ol misinari lesen. “Mifala i tokbaot Restoresen. Hem i gat intres. Hem i lisin gud mo i bin tekpat, mo i bin ridim ol skripja. Mifala i bin ridim Jemes 1:5, we Josef Smit tu i bin ridim. Mo mi mekem hem i ridim Josef Smit—Histri. Hem i bin tekpat gud.”
Ol fren blong hem long skul, oli respektem bilif blong hem. Hem i talem se: “Oli no stap agensem Jos, be oli sapotem Jos.” Tija blong hem tu, long relijin klas blong hem i stap sapotem hem. “Tija i ting se i gud tumas blong mi gat bilif long God, mo tu, hem i stap helpem mi blong kasem ol gol blong mi.”
Afta we hem i finisim skul mo i kwalifae blong mekem ol stadi long yunivesiti, Patrick i stap plan tu blong go givim seves long wan fultaem misin. Hem i talem: “Ating, blong mi save rere from, bae mi ridim Prijim Gospel blong Mi. “Bae mi laekem blong mi gogohed, mo rid, mekem ol lesen, mo tu, spendem fulap taem wetem ol misinari.”
Patrick i laekem blong fidim tingting blong maen blong hem. Hem i stap raetem wan buk wetem ol samting we hem i tingting long hem.
I Gudfala
Patrick i bin lanem se i gat plante samting we oli stap we oli “klin, i luk naes, o i gudfala mo i nambawan tru,” mo hem i stap lukaotem olgeta samting ia (Ol Toktok blong Bilif 1:13). Mo taem hem i faenem olgeta samting ia, hem i serem olgeta.
I nomata se i long saed blong saens, tingting long maen, o kriesen, hem i faenem se i gat ol bigfala save mo i gat samting i naes long eni ples we hem i tanem hem i go long hem. Mo hem i faenem save ia we i hae moa, samting we i naes, mo trutok tru long rilesensip we hem i gat wetem Papa long Heven mo Jisas Kraes.