“?Olsem wanem oli krietem wol ia?,” Blong Ol Yut Oli Kam Strong, Jen 2022.
Go Stret long Poen
?Olsem wanem oli krietem wol ia?
“Bifo we bifo olgeta, God i mekem skae mo graon” (Jenesis 1:1). ?Olsem wanem nao Hem i bin mekem? Hemia sam long ol samting we yumi save:
Jisas Kraes i bin mekem wol ia. Papa long Heven i bin lidim wok ia, we i Kriesen; Jisas Kraes i kareaot wok ia tru long paoa blong prishud. “Tru long Wan Stret Pikinini Ia Nomo blong mi, mi bin krietem … wol ia” (Moses 2:1).
Wol ia, oli yusum ol samting we oli bin stap finis mo oganaesem olgeta, be oli no krietem aot long nating. “Bae yumi tekem olgeta samting ia, mo bae yumi mekem wan wol” (Ebraham 3:24).
Kriesen bin hapen long sikis step. I gat samfala samting oli hapen long wanwan step blong Kriesen ia. Olsem, ol plant oli kam long wan step, ol animol blong solwota mo ol pijin oli kam long wan nara step, mo ol nara animol mo ol pipol, oli kam long ol nara step.
Ol step blong Kriesen ia, i tekem wan longfala taem we yumi no save gud long hem. Long ol skripja, samtaem oli singaotem ol step ia se oli “ol dei,” be hemia i no minim se hem i 24 aoa long wan dei. Wan histri i tokbaot “ol taem” (luk long Ebraham 4). Yumi no save se i longfala olsem wanem.
Ol kwestin we yumi gat abaot Kriesen, bambae God i ansarem olgeta. “Long dei ia taem bae Lod i kam, bambae hem i soemaot evri samting—ol samting abaot wol ia, mo abaot fasin we Lod i bin mekem wol ia” (Doktrin mo Ol Kavenan 101:32–33).