Paoa blong Wan Fren blong Lidim Tingting

I Kam long Jolie Hatch

Ol taem blong mi taem mi yangfala, oli bin had tumas, be God i bin sendem wan fren i kam long mi blong i helpem mi tru long taem ia.

Pikja droing i kam long Judy Bloomfield

Longtaem i kam, mi stap filim se mi mi stap miwan nomo long wol ia. Papa mo mama blong mi i bin divos taem mi bin wan bebi, afta, sam yia i pas, mama blong mi i mared bakegen mo mifala i muv 6437 kilometa aot long Jojia, YSA, i go long Oregon, YSA. Hem i wan bigfala jenis blong wan gel we i gat naen yia, blong hem i gotru long hem, speseli wetem tiun long voes, we plante pikinini oli no akseptem.

Taem mi muv i go long bigfala klas long Praemeri, mi mitim Nicole.^* Wantaem nomo, mi filim wan gudfala paoa, mo pis we i stap wetem hem—wan samting we mi misim. !Mi save se mi mas kam fren wetem gel ia!

Taem mitufala i stap wokbaot tugeta moa, Nicole i kam wan ples we i sef blong stap long hem, wan ples blong mi aot long fasin blong stap miwan. Taem mi wokbaot i go insaed long hom blong hem, i olsem se mi stap wokbaot i go insaed long wan defren laef evriwan: Spirit blong God i fulumap evri kona. I gat ol pikja blong Sevya mo ol bigfala ston blong ol bilding long evri ples. (Afta, mi jes lanem se hemia oli ol tempol.) Misinari wok blong Nicole i stat taem hem i invaetem mi nomo blong go long haos blong hem, mo hem i no iven save.

Stap Wan Fren mo Stap Biliv

Nicole i bin givhan long mi, jes taem hem i stap olsem fren blong mi nomo. Hem i givim Buk blong Momon long mi, mo mitufala i stat rid tugeta insaed long trak blong hem afta long skul.

Buk blong Momon i stat blong fulumap ol hol insaed long laef blong mi. Be mi stil filim se mi stap miwan. Mi mi no memba blong Jos blong Nicole, be tu, mi mi no pat fulwan long relijin blong papa mo mama blong mi.

Long wan kaen fasin, Nicole i askem mi blong prea, mo blong askem God sapos Buk blong Momon i tru. Mi neva bin prea laod, mekem se mi no gat eni aedia long wanem mi mas talem. Be mi jes go aotsaed mo stat toktok. Mi askem God sapos Jos blong Nicole i wan raet jos blong mi tu. Taem mi finisim kwestin blong mi, mi filim ful bodi blong mi i kolkol. Mi bin save, we i no gat tu tingting long maen blong mi, se Buk blong Momon i tru, mo Jos ia i stretwan long mi.

Mi gat 15 yia taem mi kasem witnes ia. Long ol nekis yia we oli kam afta, mi bin biliv, nomata se papa mo mama blong mi oli no gat intres long Jos. Be mi no bin stap miwan long bilif blong mi, from se Nicole i stap ia yet blong i sapotem mi.

Niu Bilif, Niu Kwestin

Afta we mi graduet long hae skul, mi muvaot i go long Yuta, YSA. Nicole i bin stap ia finis, mo hem i wari mo stap wet long mi blong mi go, blong mekem se mi save stat blong tekem ol misinari lesen. Mi bin gat wan plan blong mi baptaes long 19 yia blong mi—we i sikis wik taem—mo Nicole i talem gud long mi se bae hem i stat ia wetem mi long ful taem ia.

Taem ol misinari oli stat blong tijim mi, kwiktaem mi luksave se mi no save tumas abaot Jos. Mi bin ridim mo lavem Buk blong Momon, be kwiktaem, oli bin stap tokbaot presen we i Tabu Spirit, plan blong fasin blong sevem man, blong kam olsem God, mo plante moa niu samting long mi. I plante tumas blong mi tekem long wan semmak taem.

Be Nicole i bin save gud mi. Bae hem i eksplenem wanem we ol elda oli bin stap tijim long wan wei we hem i save se bambae mi mi andastanem. Long ol fasfala lesen ia, ol samting we hem i bin tekem taem blong eksplenem, oli ol risen ia from wanem mi bin stap.

Nao Mi Mi Pat

Nicole i bin sapotem mi long saed blong spirit i go kasem dei ia we mi bin baptaes—mo afta tu. Hem i bin helpem ol memba blong wod mo ol misinari blong mekem plan blong mekem se mi save baptaes long dei we mi kasem 19 yia. Taem mi bin kamaot long wota, mo luk plante long ol pipol oli givim bigfala smael long mi, mi nomo filim se mi stap miwan. Bae mi neva fogetem filing ia, se mi mi blong Lod mo Jos blong Hem.

Mi stap lan yet aot long fet mo frensip blong Nicole, we i stap oltaem. Hem i soem long mi, stat long stat, se misinari wok i no nidim wan nem tag. Misinari wok blong Nicole i stat insaed long hat blong hem, taem hem i go aot mo toktok long wan gel wetem hevi trabol, we i bin nidim wan smael.

Hem we i raet i stap long Yuta, YSA.

• Oli jenisim nem.