“Oli blong Mi, mo Mi Mi Save Olgeta,” Blong Ol Yut Oli Kam Strong, Jen 2022.
Kam Folem Mi
“Oli blong Mi, mo Mi Mi Save Olgeta”
Foto i kam long Getty Images
?Yu yu bin filim se yu yu no impoten? Maet yu bin filim olsem taem yu bin stap tingting long hamas pipol i stap insaed long wol ia, o taem yu bin stap luk se i gat hamas sta long skae. ?Yu yu bin askem yuwan finis sapos God i rili save huia yu mo laef blong yu i olsem wanem? Sapos i olsem, nao Moses i gat wan mesej blong yu.
Long wan visen, God i bin soem long Moses evri smol samting abaot wol ia, mo evri pipol we bambae oli laef insaed long hem. Mo “namba blong olgeta i bigwan, oli fulap semmak long sanbij long so blong solwota” (Moses 1:28). Nao God i talem long Moses se Hem i bin mekem “ol wol we i no gat namba blong hem” (Moses 1:33)—mo ol kriesen blong Hem oli plante moa antap long wol ia.
Ating Moses i filim se hem i sapraes tumas taem we hem i bin luk evri samting ia. Maet hem i tingting long hemwan: ?Wea nao ples blong mi long medel blong plante kriesen olsem? Mo ?olsem wanem nao God i mekem blong lukaotem fulap samting olsem?
Ansa blong God i simpol nomo: “Mi kaontem evri samting” ?Olsem wanem? “Oli blong mi, mo mi mi save olgeta” (Moses 1:35). God i bin save se huia i Moses, olsem we Hem i save evriwan long ol pikinini blong Hem, mo tu, evriwan long ol kriesen blong Hem. Evriwan long olgeta ia, oli blong Hem—ol sta, sanbij, mo speseli ol pikinini blong Hem we oli stap long wol ia. Olgeta nao oli stamba risen blong Hem i mekem wol ia. Blong oli kasem laef we i no save finis, i wok ia we i moa impoten long God.
“From luk, hemia i wok mo glori blong mi—blong mekem man i nomo save ded mo i kasem laef we i no save finis” (Moses 1:39).
Semmak olsem we Moses i bin lanem se wea nao ples blong hem insaed long plan ia blong God, yu tu, !yu mas save se God i save yu! Blong stap helpem yu blong gobak long Hem, hemia nao i wok mo glori blong Hem. ?From wanem? From se yu yu blong Hem. !Mo hemia i no wan smol samting!