“Mi Save Hamas Mi Impoten,” Blong Ol Yut Oli Kam Strong, Jen 2022.
Stamba Toktok Ia mo Mi
Ol yut oli serem olsem wanem oli stap laef folem ol toktok we oli stap long Stamba Toktok blong Ol Yang Woman, mo hemia blong Aronik Prishud
Mi Save Hamas Mi Impoten
“Mi mi wan gel blong papa mo mama long heven we Tufala i lavem mi tumas.”
Foto i kam long Christina Smith
Long plante pat blong Jamaeka, ol studen olsem mi oli mas mekem wan eksam blong save go long hae skul we oli wantem. Ol fren blong mi, mo mi, i bin stadi had, blong mekem se mifala evriwan i save go long bes hae skul. Mekem se mi stat blong gat tu tingting se bae mi save mekem o no, mama blong mi, oltaem, i stap leftemap tingting blong mi. Hem i mekem mi tingbaot se mi mi wan long ol pikinini blong Papa long Heven, mo bambae Hem i helpem mi blong gohed long stret rod.
Taem we ol risal blong eksam blong mi oli kambak, !mi kasem hae mak ia we mi save kasem! Mi mi glad bitim mak, !from we hemia i minim se mi save stap wetem evri fren blong mi!
Be, i no longtaem afta, mi faenemaot se wan fren blong mi i no gat wan mak we i inaf. Mifala evriwan i harem nogud se hem i no save kam wetem mifala. Be mi bin glad blong tingbaot wanem mama blong mi i bin tijim mi. Fren blong mi i wan gudfala gel blong Papa long Heven, mo bambae God i helpem hem tu, i nomata wanem risal blong tes.
Gladglad blong mi i finis taem fren blong mi i stat blong talem evriwan se mi nao mi no naf blong go kasem hae skul ia—se hem nao i sapos blong tekem ples blong mi. Plante long ol fren blong mi oli tekem saed blong hem, mo oli stop blong wokabaot wetem mi. Mi stat blong gat tu tingting long miwan. ?Mi rili inaf blong mi go long skul ia?
Mi tingting i gobak long wanem mama blong mi i bin tijim mi: se i no gat tu pikinini olsem mi, we oli mekem mi folem huia i Papa.
Naoia, mi stap long niu skul, mo mi gat sam niu fren. Oli sapotem mi mo oli mekem mi mi tingbaot hamas nao mi mi impoten. Mi bin lanem se i nomata wanem we ol nara pipol oli stap talem abaot mi. Mi mi hapi taem we mi stap traem blong kam huia we God i wantem mi blong kam—from se, hemia nao huia mi mi wantem kam olsem.
Hem we i raet i stap long Jamaeka.