“Gat Tras long Lod,” Blong Ol Yut Oli Kam Strong, Jen 2022.
Gat Tras long Lod
God i stap invaetem yu blong trastem Hem long evri samting.
Samtaem, taem ol had samting oli hapen, yumi stap askem yumiwan sapos yumi save trastem eniwan, wetem God tu. Yumi fraet se maet bae Hem i mekem yumi harem nogud. Gud nius, i we, God i lavem yumi long wan fasin we i stret evriwan. Hem i kaen, mo i gat open hat, mo Hem i ones. Hem i no save jenis, mo yumi save dipen long Hem.
Mo from hemia, yumi save trastem Hem, nomata wanem i stap. Stamba toktok blong yia ia, hem i “Gat Tras long Lod” (Ol Proveb 3:5–6).
Hemia samfala eksampol blong hao, wanwan long mifala insaed long Ol Yang Woman mo blong Ol Yang Man Jeneral Presidensi i kam blong gat tras long Lod.
Michelle D. Craig
Bonnie H. Cordon
Rebecca Craven
Trastem Ol Tingting blong God
Jes samfala dei bifo mi kasem 16 yia, famli blong mi i muv, i krosem kantri. !Mi ting se hemia i no stret taem nating! Taem mi lukluk i gobak, mi save luk klia se samfala long ol bigfala blesing blong famli blong mifala, mo blong miwan, oli bin kam from se mifala i bin muv taem mi mi wan yangfala yet. Yumi no save andastanem taem blong Lod long stret taem we wan samting i hapen, be yumi trastem Hem from se yumi save trastem hat blong Hem mo ol tingting we Hem i gat.
Michelle D. Craig
Trastem Taem blong Lod
From papa blong mi i kasem koling olsem wan misin presiden, mi kasem koling blong mi blong go long wan misin eli, i fastaem long yia we ol sista misinari oli save go long hem. Hemia i minim se bae mi go insaed long misinari trening senta bifo graduesen long hae skul. Long mi, taem ia i no foldaon stret, be mi kasem wan strong konfemesen long saed blong spirit, se bae mi gat tras long Lod. Mi mekem. Mo ol samting oli kamaot i stret nomo.
Blong stap trastem Lod, i minim blong muv fored iven taem we rod ia i no kamaot klia fulwan.
Bonnie H. Cordon
Trastem God long Ol Taem we Oli Had
Taem mi stap groap, papa blong mi i gat wan Ami ofisa we i lukluk long saed blong fasin blong kasem wok. Nogud saed blong wok blong hem, i we hem i mas go long wo. Mi bin gat 13 yia taem we papa blong mi i aot i go long Vietnam blong nambatu taem. Fraet ia se bae hem i no kambak, oltaem i stap long maen blong mi, be i semmak tu long tras we mi gat long Lod. Bifo hem i aot, papa blong mi i givim wan blesing blong wan papa long mi, mo i talem gud long mi se Lod bae i stap wetem mi, mo bae i helpem mi taem papa blong mi i stap longwe. Mi bin filim pis. Nomata we mi no save gud se bae papa blong mi i kambak sef o no, mi bin gat tras se evri samting bae i oraet, nomata wanem bae i hapen.
Rebecca Craven
Ahmad S. Corbitt
Steven J. Lund
Bradley R. Wilcox
Putum Tras long Yuwan I Go long God
Taem we mi bin joenem Jos taem mi bin yangfala, mi disaed blong givim laef, taem mo hat blong mi i go long Lod. Nomata we, kaen komitmen olsem, blong wan ful laef, i mekem mi filim se mi fraet, mi bin save se i wan raet samting blong mekem. Mi bin filim se Papa blong yumi long Heven i bin wantem hemia blong mi, mo mi bin gat pis taem mi stap mekem hemia. Mi mo glad tumas se mi bin jusum blong trastem God mo letem Hem i win insaed long laef blong mi. Mi mi sua se, sapos mi bin dipen long save blong miwan, laef blong mi bae i no rij bigwan wetem ol glad, hapines mo pis.
Ahmad S. Corbitt
Trastem Insperesen we I kam long Lod
Afta we mi go long misin blong mi, mi filim blong joenem ami, be i no blong gobak long kolej. !Hemia i las samting we mi bin wantem mekem! Mi harem se tingting i fasfas, be mi bin lanem blong trastem God, mo mi gat inaf fet blong harem Hem mo obei long Hem. Mi kam wan soldia blong tri yia.
Plante gudfala samting, insaed long laef blong mi, oli kamkamaot from desisen ia blong mi, we i tekem tu blong mi mitim fiuja waef blong mi.
Steven J. Lund
Trastem Ol Kwaet Toktok blong Spirit blong Tekem Aksen Naoia
Afta we mi tijim ol klas sikis blong tri yia, mi bin lanem se sapos mi tij blong fo moa yia, bae skul distrik bae i pem pat blong skulfi blong mi blong mi kasem masta digri blong mi. I luk olsem se hemia i wan gudfala plan—kasem taem we Spirit i talem long mi blong mi risaen long wok blong mi mo gobak mo kasem digri blong mi naoia. Waef blong mi i kasem semfala filing, mekem se mitufala i muv fored. Bae i minim se bae mitufala i pem skulfi blong mitufala, mitufalawan. Be, from se mitufala i bin mekem, oli bin tekem mi long wok long BYY—Provo, blong mi tij. Windo blong janis ia we i open, bae i no save open sapos mitufala i wet samfala yia moa. Mitufala i no save se ol samting bae oli go olsem wanem, be Lod i bin lidim ol plan blong mitufala, semmak olsem we Hem i bin promesem.
Bradley R. Wilcox