“Stap Winim Ol Trik Fasin blong Setan,” Blong Ol Yut Oli Kam Strong, Jen 2022.
Kam Folem Mi
Stap Winim Ol Trik Fasin blong Setan
Setan i stap mekem evri samting we hem i save mekem blong trikim yumi. Tangkyu tumas, yumi gat tabu help blong stap longwe long ol trap blong hem.
Wan man blong mekem majik i kilim fingga blong hem mo wan balong i lus long fored blong ae blong yumi.
!Sapraes!
Afta, hem i pulum wan rabet aot long wan hat we i emti, mo i mekem wan samting i kamkamaot blong i go wetem.
!Tru ia! ?Hao hem i mekem hemia?
Ol man blong majik oli faenemaot olsem wanem blong mekem ol pipol oli biliv se oli witnesem wan samting we i no posibol, be long ril laef, oli luk nomo wanem we majik man ia i wantem olgeta blong luk.
Yes. !Hemia nao! Ol man blong majik oli no rili katem haf bodi blong olgeta we oli wok wetem olgeta. Oli faenem wan kleva wei blong trikim yumi blong tingting se yumi bin luk wan samting we i no rili hapen. Sikret i stap insaed long ol giaman lukluk, mo giaman tingting.
Nomata oli mekem evri samting ia blong gat wan gud taem mo blong entetenem ol man, i gat ol nara kaen giaman lukluk mo tingting we oli ol denja—tugeta long bodi, mo long spirit.
Wan Denja Man blong Giaman long Ae mo Giaman long Tingting
Setan i enemi blong evri samting we i stret mo gud; mo hem i no wantem eniwan blong folem Papa long Heven mo Jisas Kraes. Hem i wantem yumi blong yumi harem nogud tumas olsem we hem i stap (luk long 2 Nifae 2:27).
Blong mekem hemia i kamtru, bae Setan i stap mekem evri samting we hem i save mekem blong mekem yumi gat kwestin, o blong mekem se bae yumi no wantem save long ol trutok we oli no save finis. Hem i wok we hem i no stop blong mekem yumi konfius mo stap bilivim se gud samting i nogud, mo nogud samting i gud (luk long Aesea 5:20). From hemia nao, samtaem yumi save hem olsem papa blong ol giaman, mo bigfala man blong trikim man (luk long Moses 4:4). Mo hem i bin stap mekem hemia blong wan longfala taem.
Foldaon
Insaed long Garen blong Iden, God i bin talem long Adam mo Iv blong tufala i no kakae frut we i kamaot long tri blong save gud mo nogud. Sapos tufala i kakae, bae tufala i mas aot long Garen blong Iden, mo bae tufala i ded long en. Be God i talem long tufala se tufala i save mekem joes blong tufala (luk long Moses 3:16–17).
Setan i wantem blong prapa spolem plan ia blong God. Hem i bin traem hemia taem hem i temtem Iv blong kakae frut we i no blong kakae. Hem i bin giaman, mo i talem se bae Iv i no save ded (we i agensem wanem we God i bin talem.) Hem i talem tu ol haf trutok long Iv (luk long Moses 4:11).
Long en, tugeta, Adam mo Iv tufala i kakae frut ia mo God i sakemaot tufala long ples ia we Hem i bin stap long hem. Ol skripja oli singaotem hemia “ded blong spirit.” Mo tu, tufala i kam we tufala i save ded, we i minim se bodi blong tufala i save ded. Hemia oli save hemia olsem Foldaon.
Olsem ol laen blong Adam mo Iv, yumi tu, yumi seperet long ples ia we God i stap long hem, mo bae yumi gotru long ded blong bodi. Mo tu, bae oli testem yumi tru long ol had samting blong laef, mo ol temtesen blong Setan.
Hemia bae i oli harem olsem se hem i wan nogud samting, be Foldaon i wan impoten pat blong plan blong Papa long Heven. Hem i givim yumi wan janis blong lanem samting, mo groap taem yumi yusum fridom blong yumi blong mekem joes, blong save jusum blong mekem gud. Mo from Jisas Kraes mo Atonmen blong Hem, yumi save sakem sin taem yumi stap sin mo stap rere blong kasem laef we i no save finis. Evri samting we i bin hapen wetem Foldaon ia, Jisas Kraes i mekem i kam stret evriwan. Setan i no bin stopem plan ia blong God.
Stap Winim Ol Trik Fasin blong Setan
Setan i stap gohed blong traem blong trikim yumi, mo giaman long yumi. Hemia samfala wei we hem i mekem hemia:
1. Temtesen
Setan i laekem blong putum ol tingting we oli no klin, mo oli no kaen long rod blong yumi. Hem i wantem se ol samting ia oli go insaed long maen blong yumi, mo oli mekem yumi tekem aksen folem. Yumi save stanap agensem temtesen taem yumi talem long Setan blong gowe (luk long mesej blong Elda Stevenson long pej 4). Wan long ol bigfala proteksen blong yumi agensem temtesen, hem i blong prea (luk long Alma 13:28; 3 Nifae 18:15). Yumi save ridim mo stadi tu olgeta skripja. Oli tekem Spirit i kam insaed long hat blong yumi, blong talem kwaet long yumi se wanem nao i tru, mo i mekem yumi strong moa agensem eni temtesen long fiuja.
2. Ol Giaman Fasin mo Fasin blong Trikim Man
Samtaem, Setan i stap talem ol samting olsem: “Yu neva mekem wan samting i stret,” “Yu mekem tumas sin blong Lod i save fogivim yu,” “Hem i no posibol blong jenis,” o “Yu gud blong nating mo i no gat man i rili kea long yu.”
Olgeta kaen toktok olsem, oli ol giaman. !Yu no bilivim ol toktok ia! Hemia nao trutok: God i lavem yu mo i stap glad long yu from se yu yu pikinini blong Hem. !Yu yu gud tumas! Yu gat plante samting we yu save kasem yet, mo taem yu stap folem Hem, !bambae fiuja blong yu bae i wan gudwan! Iven taem we yu mekem ol mistek, yu stil save gat hop, mo, tugeta wetem Kraes, ol samting oli save tanem raon.
Oltaem bae yu save dipen long Setan blong hem i talem ol giaman long yu. Mo tu, yu save dipen long Spirit se bae, oltaem, bae Hem i talem trutok long yu (luk long Jekob 4:13). Hemia i wan risen from wanem hem i impoten blong traehad blong oltaem gat Spirit i stap wetem yumi.
Yumi save faenemaot tu, mo stanap agensem ol giaman blong Setan, tru long fasin blong stap ridim ol skripja oltaem, mo ol mesej blong ol lida blong Jos. Yu save faenem ol skripja we oli stap leftemap tingting, o ol kwot we oli mekem yumi tingbaot ol trutok we oli sakemaot ol giaman blong Setan. Yu save lanem olgeta baehat, o putum olgeta long wan ples we bae yu save luk olgeta oltaem.
3. Lusum Hop
Setan i laekem tumas taem yumi slakem tingting blong yumi. Hem i wantem yumi blong bilivim se, wanem i stap putum daon yumi, bae i stap ia nao blong oltaem. Be hemia i no tru.
Elda Jeffrey R. Holland blong Kworom blong Olgeta Twelef Aposol i bin tijim se Setan i wantem yumi blong bilivim hemia from se “[Setan] i save se, hem, hem i no save kam antap, hem, hem i no save progres, se nomata i no gat en long ol wol we oli stap, be hem, bae i neva gat wan tumoro we i saen. Hem i wan man we bae i harem nogud nomo, be i fas long ol limit blong taem we i no save finis, mo hem i wantem yu blong yu harem nogud tu. So, yu no foldaon long samting ia.”1
Papa long Heven mo Jisas Kraes, Tufala i wantem yu blong stap hapi. Sapos yumi tanem i go long Tufala, bae Tufala i save helpem yu blong stap strong tru long ol tes mo faenem pis mo glad.
Yumi Save Huia I Stap Win long En
Sevya i stap invaetem yumi blong “lukluk long [Hem] long evri tingting blong [yumi]; no gat tu tingting, no fraet.” (Doktrin mo Ol Kavenan 6:36). Taem yumi stap mekem folem invitesen ia, gladhat blong Hem we i pem praes from sin, mo paoa blong Hem bae i oltaem strong moa bitim ol tes blong Setan blong stap giaman long yumi. Yumi no nid blong foldaon long ol trik blong Setan blong i kakae yumi. Yumi save gat strong paoa long tingting, mo paoa long bodi blong winim ol temtesen we oli kam long Setan, mo stap strong tru long ol jalenj blong laef.
Hat blong yufala i no mas trabol, i kam long Howard Lyon
Sevya i bin talem: “Mi nao, mi olsem laet blong ol man long wol. Man we i biaen long mi, bambae hem i no save wokbaot long tudak. Hem bambae i gat laet blong laef.” (Jon 8:12). Hem i talem tu: “Long wol ia bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ia finis” (Jon 16:33).
Jisas Kraes i save leftemap yumi mo i save mekem yumi kam strong moa agensem eni trik we Setan i save traem blong yusum agensem yumi. Taem yumi stap tingbaot Sevya mo ol tijing blong Hem, yumi save luk tru long ol trik mo giaman blong Setan, mo luk “olsem we oli rili stap” (Jekob 4:13).