“Ang Plano sa Dios sa Kalipay ug ang Inyong Balaanon nga Kapalaran,” Alang sa Kalig-on sa mga Kabatan-onan, Ene. 2022.
Ang Plano sa Dios sa Kalipay ug ang Inyong Balaanon nga Kapalaran
Ang pagsabot ug pagpakabuhi sumala sa plano sa kalipay motugot kaninyo sa pagkab-ot sa inyong balaanon nga kapalaran.
Mga Paghulagway pinaagi ni Albert Espí
Unsa ang mosantop sa hunahuna kon madungog ninyo ang pulong nga kapalaran? Maghunahuna ba kamo og usa ka butang nga natino na daan o dili malikayan? Usa ka butang nga makuyaw o talagsaon nga dili mausab bisan unsay inyong buhaton? O tingali maghunahuna kamo bahin sa bayani diha sa usa ka salida o libro, kinsa gitagana aron sa pagkompleto sa panimpalad [quest], pagluwas sa kalibotan, o mahimong hari o rayna?
Ang mga diksyonaryo mahimong mouyon niadto nga mga interpretasyon; apan, kon maghisgot kita sa balaan nga kapalaran, kita nagpasabot og lahi nga butang. Dili sama sa kapalaran nga inyong mabasa sa mga basahon o makit-an sa mga salida, ang pagkab-ot sa inyong balaan nga kapalaran posible tungod kay kamo anak sa Dios, apan kini usab nagkinahanglan sa paggamit sa inyong kabubut-on.
Ang Dios aduna sa tanan nga gahom sa langit ug sa yuta. Ang mga pakigsaad nga atong himoon ngadto sa atong Langitnong Amahan motugot Kaniya nga mahimong atong kauban samtang maglakaw kita sa mga unos sa kinabuhi. Ang atong balaan nga kapalaran—ang atong potensiyal kon kita makig-uban sa Dios—nahimong posible pinaagi sa Iyang plano sa kalipay.
Ang pagsabot sa plano sa Langitnong Amahan alang sa inyong kalipay motugot kaninyo nga makaila sa inyong mahangtorong pagkatawo ug katuyoan. Ug ang pagpili sa paghimo ug pagtuman sa mga pakigsaad ngadto sa Dios motugot kaninyo sa pagkab-ot niana nga katuyoan.
Diha sa basahon ni Moises atong mabasa nga “si Moises nadala ngadto sa usa ka hilabihan ka taas nga bukid, ug siya nakakita sa Dios nawong sa nawong, ug siya nakigsulti uban kaniya” (Moises 1:1–2). Pinaagi niini nga personal nga pagbisita, ang Dios mitudlo ni Moises mahitungod sa iyang mahangtoron nga pagkatawo. Bisan og mortal ug dili perpekto si Moises, siya nakakat-on og butang nga importante mahitungod sa iyang kaugalingon: siya gayod usa ka anak sa Dios (tan-awa sa Moises 1:6).
Hinumdomi Kon Kinsa Kamo
Si Satanas gusto nga kamo makalimot kon kinsa kamo. Sa dihang si Satanas naningkamot sa pagdani ni Moises gikan sa buhat nga giandam sa Ginoo alang kaniya, si Moises maisogon nga mitubag, “Kinsa ikaw? Kay tan-awa, ako mao ang usa ka anak sa Dios“ (Moises 1:13; empasis gidugang). Si Moises dayon mipahayag, “Pahawa gikan dinhi, Satanas; ayaw paglingla kanako” (Moises 1:16; empasis gidugang).
Sa laing pagkasulti, si Moises miingon, “Dili ka makalingla kanako, tungod kay ako nasayod kinsa ako. Ikaw walay kahayag ug himaya sa Dios. Mao nga nganong mosimba ko nimo o motuo sa imong mga bakak?”
Ayaw gayod kalimot nga ang Dios nahigugma kaninyo ug nagtinguha sa pagtabang ug pagpanalangin kaninyo. Siya adunay balaan nga interes kaninyo sa personal nga paagi isip usa sa Iyang mga anak. Palihog paggahin og panahon sa pagkat-on kon unsa gayod ang kahulogan nga mahimong anak sa Dios. Dayon pagtakda og mga tumong ug paghimo og mga pagpili nga makatabang kaninyo sa pagpakabuhi subay niana nga kahibalo kada adlaw.
Ako Adunay usa ka Buhat alang Kanimo
Kamo adunay daghang dinalian nga mga problema ug mga kabalaka. Kamo adunay buluhaton sa eskwelahan, panaghigalaay, mga responsibilidad sa pamilya, ug tingali gani usa ka trabaho. Siyempre, ang inyong hagit mao ang pagbalanse niining tanan nga importante nga mga tahas nga dili makalimot sa inyong nag-unang katuyoan sa kinabuhi. Ang Dios adunay buhat alang kaninyo nga tumanon (tan-awa sa Moises 1:6). Kini mao ang tubag sa pangutana “Nganong ania ako dinhi sa yuta?”
Isip anak sa Dios, kamo mianhi sa yuta aron makadawat og pisikal nga lawas. Gamit ang inyong lawas, kamo matinud-anong makapili sa pagsunod ni Jesukristo. Makapili kamo nga mosunod sa mga sugo sa Dios, modawat og balaan nga mga ordinansa, ug mohimo ug motuman sa mga pakigsaad sa ebanghelyo. Ang pagbuhat niining mga butanga moandam kaninyo sa pagtuman sa inyong balaanon nga kapalaran.
Uban niini nga katuyoan nga tataw sa hunahuna, makakita kamo sa importansiya sa pag-ambit sa sakramento matag semana, pagtuon sa mga kasulatan, pag-ampo matag adlaw, paghimo og bililhon nga mga tumong, ug pagserbisyo sa uban. Kini nga mga butang makatabang sa pagpahinumdom kaninyo kon nganong ania gayod kamo dinhi, ug kini makatabang kaninyo nga mahimong takos sa pagdawat og personal nga pagpadayag nga gikinahanglan ninyo aron mahimong malipayon ug magpabilin sa dalan sa pakigsaad. Samtang maghinulsol kamo ug makugihong mosunod sa Ginoo, makadawat kamo og personal nga direksiyon sa matag aspeto sa inyong kinabuhi.
Maningkamot nga Mamahimong Matang sa Tawo nga Gitakda nga Mao Kamo sa Umaabot
Ang mga kabalaka sa kalibotan, o ang inyong kaugalingong mga kawalay pagsalig, mahimong makaingon nga kamo makalimot sa inyong importante nga tahas sa mahinungdanong plano sa kaluwasan sa Dios. Kon mahitabo kini, ako modapit kaninyo sa pagduol ngadto kang Kristo (tan-awa sa Moroni 10:32). Walay posible sa mahangtorong plano sa Dios kon wala Siya, ug uban Kaniya, makab-ot ang matag maayong butang.
Ang pagpaningkamot sa pagsunod sa Manluluwas mao ang labing maayong paagi sa paghupot og panglantaw sa ebanghelyo. Uban sa hugot nga pagtuo ug paglaom diha Kaniya, kamo masaligon nga makaatubang sa mga hagit sa kinabuhi. Mas makaklaro kamo samtang mohimo kamo og mga pagpili, mosulbad og mga problema, maningkamot sa pagbuhat sa matarong nga mga tumong, ug mosagubang sa mga tintasyon.
Ang inyong mga desisyon makaapekto sa kahangtoran. Pinaagi ni Jesukristo ug sa Iyang maulaon nga grasya, makabaton kamo og kalipay niini nga kinabuhi ug sa sunod nga kinabuhi. Makab-ot ninyo ang inyong balaanon nga kapalaran sa pagdawat sa tanan nga anaa Kaniya ug sa pagpuyo sa matang sa kinabuhi nga Siya nangulo, diin mao ang “kinabuhi nga dayon … ang labing mahinungdanon sa tanan nga mga gasa sa Dios” (Doktrina ug mga Pakigsaad 14:7).