“Mga Pangutana ug mga Tubag,” Alang sa Kalig-on sa mga Kabatan-onan, Ene. 2022.
Mga Pangutana ug Mga Tubag
“Wala kaayo koy mga kinaiya o mga butang nga ganahan nga kaparehas [komon] sa mga tawo sa akong grupo sa kabatan-onan. Unsaon nako nga mobati nga mas konektado sa akong grupo sa kabatan-onan?”
Pagtabang Ngadto sa Usa
“Bation nako nga mas konektado sa uban kon ako maningkamot gayod nga mogahin og panahon uban kanila sa tagsa-tagsa, dili lang diha sa grupo nga mga kahimtang. Kon gusto kamo nga makakita og usa ka tawo nga inyong ikahugoy-hugoy, tabangi ang usa ka tawo kinsa ingon og nagkinahanglan sila og higala. Kamo tingali sa kataposan mas makabenepisyo pa kay sa kanila!”
Latyanna P., 17, Singapore
Ipaambit ang Inyong mga Interes
“Kadaghanan sa mga tawo sa akong grupo sa kabatan-onan adunay lain-lain nga mga butang nga sila interesado. Ganahan kong mangutana kanila mahitungod sa ilang mga interes tungod kay kini nagpakita nga ako nagpakabana bahin kanila. Dayon kini maghatag kanila og kahigayonan sa pagpangutana mahitungod sa akong mga interes usab. Ang paghimo og mga koneksiyon ngadto sa mga tawo nagkinahanglan og panahon—ipadayon kana!”
Erin F., 18, Utah, USA
Pangita og Komon nga mga Butang
“Kon gusto kamo og mas suod nga relasyon uban sa inyong grupo sa mga higala, pangita og nindot, makahuloganon nga mga butang nga inyong mahimo og dungan, bisan kon kini diyutay ra kaayo. Makapangita kamo og kalingawan o pangpalabay sa oras nga malingaw kamong tanan. Pangayo og tabang gikan sa Langitnong Amahan, ug Siya mohatag kaninyo og inspirasyon.”
Carla V., 12, Peru
Pasalamati ang Inyong mga Kalainan
“Kon mogahin ako dugang nga panahon uban sa mga tawo sa akong grupo sa kabatan-onan, mas ganahan ako sa unsay nakalahi mahitungod kanila! Nakakat-on ako unsaon nga mas maayong moserbisyo kanila, nga nakatabang kanako nga mas maduol kanila ug ni Jesukristo. Kitang tanan mga anak sa atong Langitnong Amahan, mao nga kita adunay mas daghan nga mga kinaiya o mga butang nga magkaparehas [komon] kay sa atong gihunahuna.”
Sarah M., 16, Oregon, USA
Sulay og Bag-o nga mga Butang
“Pagmahigalaon lang ug padayon sa pakig-istorya kanila. Padayon sa pagsulay og bag-o nga mga butang aron mas makalakip sa uban. Usa ka batang lalaki sa among ward dili gayod ganahan og mga paugnat sa kusog, apan kanunay siyang makigdula uban kanamo. Dayon mobuhat kami sa mga butang nga siya interesado, sama sa mga lipat-lipat nga madyik [magic tricks] o paglabay og kard. Ang pagsulay og bag-o nga mga butang usa ka maayong paagi nga mobati nga konektado.”
Jarren M., 17, Nova Scotia, Canada
Pagtabang
“Tabangi ang usa ka tawo sa inyong grupo sa kabatan-onan kinsa anaa sa panahon sa panginahanglan. Kon maningkamot kita nga mahimong ehemplo sa gugma sa Manluluwas, makatabang kini kanato nga mahimong mas konektado sa usag usa.”
Joshua C., 20, Faleniu, American Samoa
Pabilin kon Kinsa Kamo
“Sa paglabay sa panahon tingali inyong makaplagan ang mga butang nga komon kaninyo, apan tingali dili dihadiha dayon. Sa kasamtangan, makapalambo kamo og relasyon pinaagi sa mga kalihokan ug mga butang nga mahitabo sulod sa semana. Kalingawi ang mga kalihokan! Pilia nga moapil, ug pabilin kon kinsa kamo!”
Hannah W., 18, Nova Scotia, Canada