“Pagbuntog sa mga Taktika ni Satanas,” Alang sa Kalig-on sa mga Kabatan-onan, Ene. 2022.
Dali, Sunod Kanako
Pagbuntog sa Mga Taktika ni Satanas
Si Satanas mobuhat sa tanang butang aron sa paglingla kanato. Salamat na lang nga kita adunay balaan nga tabang aron malikay sa iyang mga laang.
Ang usa ka salamangkero mopitik sa iyang mga tudlo ug ang usa ka bola mawagtang diha sa atubangan sa inyong mga mata.
Katingalahan!
Dayon iyang birahon ang koneho nga mogawas sa walay sulod nga kalo ug mura og mopalutaw sa mga butang.
Wow! Giunsa man niya kini sa paghimo?
Ang mga salamangkero nakadiskobre kon unsaon nga makatuo ang mga tawo nga sila nakasaksi og imposible nga butang nga, sa tinuod, sila nakakita lang sa unsay gusto sa salamangkero nga ipakita ngadto kanila.
Husto kana! Ang mga salamangkero sa pagkatinood dili tinuod nga mogabas sa ilang mga alalay nga matunga. Nakakita sila og alisto nga mga paagi sa paglipat kanato nga sa atong tan-aw nahitabo ang butang nga sa tinuod lang wala nahitabo. Ang sekreto anaa ra sa mga ilusyon ug paglingla.
Samtang kining tanan gihimo alang sa kalingawan, ang ubang matang sa ilusyon ug mga paglingla makuyaw—sa pisikal ug espirituhanon nga paagi.
Usa ka Makuyaw nga Ilusyonista ug Manglilinla
Si Satanas mao ang kaaway sa tanang pagkamatarong ug dili gusto nga si bisan kinsa mosunod sa Langitnong Amahan ug ni Jesukristo. Gusto siya nga kita mauyamot sama kaniya (tan-awa sa 2 Nephi 2:27).
Aron matuman kini, buhaton niya ang tanang butang kutob sa iyang mahimo aron makuha kita nga mosupak o mobaliwala sa mahangturong mga kamatuoran. Walay puas siya nga nagtrabaho sa paglibog kanato sa pagpatuo nga ang maayo daotan ug ang daotan maayo (tan-awa sa Isaias 5:20). Mao kini ngano nga usahay siya nailhan isip ang amahan sa bakak ug ang dakong manglilinla (tan-awa sa Moises 4:4). Ug siya nagbuhat niini sulod sa dugay na kaayong panahon.
Ang Pagkapukan
Didto sa Tanaman sa Eden, ang Dios misulti kang Adan ug Eva sa dili pagkaon sa bunga sa kahoy sa kahibalo sa maayo ug daotan. Kon ila kining buhaton, sila kinahanglang mobiya sa Tanaman sa Eden ug sa kataposan mamatay. Apan ang Dios misulti kanila nga sila makapili (tan-awa sa Moises 3:16–17).
Gustong gub-on ni Satanas ang plano sa Dios. Misulay siya sa pagtintal ni Eva sa pagkaon sa ginadiling bunga. Siya namakak ug miingon nga siya [si Eva] dili mamatay (nga sukwahi gayod sa unsay gisulti sa Dios). Siya misulti usab niya [ni Eva] sa katunga sa kamatuoran (tan-awa sa Moises 4:11).
Sa kataposan, si Adan ug si Eva mikaon sa bunga ug gipapahawa sa presensya sa Dios. Sa mga kasulatan kini gitawag og “espirituhanon nga kamatayon.” Sila usab nahimo nga mortal, diin nagpasabot nga sila mahimong mamatay sa pisikal nga paagi. Kini nailhan isip ang Pagkapukan.
Isip mga kaliwatan ni Adan ug Eva, kita usab nahibulag sa presensya sa Dios ug makasinati og pisikal nga kamatayon. Sulayan usab kita pinaagi sa mga kalisdanan sa kinabuhi ug sa mga tintasyon ni Satanas.
Tingali kining tanan mura og daotan pamation, apan ang Pagkapukan usa ka importanting bahin sa plano sa Langitnong Amahan. Kini naghatag kanato og oportunidad sa pagkat-on ug4 paglambo pinaagi sa paggamit sa atong kabubut-on sa pagpili sa pagbuhat og maayo. Ug tungod ni Jesukristo ug sa Iyang Pag-ula, kita makahinulsol kon kita makasala ug maandam sa pagdawat og kinabuhing dayon. Ang tanang butang nga nahitabo uban sa Pagkapukan, gihimo ni Jesukristo nga matarong. Si Satanas wala makapahunong sa plano sa Dios.
Pagbuntog sa mga Taktika ni Satanas
Si Satanas nagpadayon karon sa pagsulay sa paglipat kanato ug paglingla kanato. Ania ang pipila ka paagi nga siya mohimo niini:
1. Tintasyon
Si Satanas ganahan nga mobutang og hugaw ug dili mabination nga mga hunahuna sa atong dalan. Gusto siya nga kining mga butanga mosulod sa atong mga hunahuna ug nga atong buhaton kini. Makabuntog kita niini nga tintasyon pinaagi sa pagsulti ni Satanas sa pagpahawa (tan-awa sa mensahe ni Elder Stevenson diha sa pahina 4). Usa sa atong labing dakong mga panalipod batok sa tintasyon mao ang pag-ampo sa kanunay (tan-awa sa Alma 13:28; 3 Nephi 18:15). Makabasa usab kita ug makatuon sa mga kasulatan. Makadala kini sa Espiritu ngadto sa atong mga kasingkasing, mopasalig kanato sa unsay tinuod, ug mopalig-on kanato batok tintasyon sa umaabot.
2. Bakak ug Pagpanglingla
Usahay si Satanas magsulti kanato og mga butang sama sa: “Walay na gyod kay nahimong bisan unsang butang nga tarong,” “Kadaghan na kaayo ka nga nakasala nga dili na mapasaylo,” “Imposible nga mausab,” o “Wala kay pulos ug walay nagpakabana nimo.”
Kini mga bakak. Ayaw pagtuo niini! Ania ang kamatuoran: Ang Dios nahigugma kanimo ug nagmaya diha kanimo tungod kay ikaw Iyang anak. Ikaw talagsaon! Ikaw adunay dako kaayo nga potensiyal, ug kon mosunod ka Kaniya, hayag ang imong kaugmaon! Bisan kon makahimo ka og kasaypanan, makabaton gihapon ka og paglaom ug, uban ni Kristo, mausab ang mga butang.
Makasalig ka kanunay nga si Satanas mosulti kanimo og mga bakak. Makasalig usab ka sa Espiritu nga kanunayng makasulti nimo sa kamatuoran (tan-awa sa Jacob 4:13). Mao kana ang usa ka rason nga importante ang maningkamot nga sa kanunay makabaton sa Espiritu uban kanato.
Kita makaila usab ug makabatok sa mga bakak ni Satanas pinaagi sa regular nga pagbasa sa mga kasulatan ug mga mensahe gikan sa lider sa Simbahan. Makakita ka og makapabayaw nga mga kasulatan o mga kinutlo sa pagpahinumdom kaninyo sa mga kamatuoran nga gipakigbatokan sa mga bakak ni Satanas. Kamo mahimong mosag-ulo niini o mobutang niini sa mga dapit diin kanunay ninyo kining makita.
3. Pagpakawala sa paglaom
Si Satanas ganahan niini kon kita mawad-an og kadasig. Gusto siya nga motuo kita nga kon bisan unsa man ang makapaubos kanato mapermanente na. Apan dili gyod kana tinuod.
Si Elder Jeffrey R. Holland sa Korum sa Napulog Duha ka Apostoles nagtudlo nga si Satanas gusto nga kita motuo niini tungod kay “Si [Satanas] nasayod nga siya dili molambo, siya dili mouswag, nga ang mga kalib[o]tan nga walay kataposan siya dili gayod makabaton og usa ka hayag nga kaugmaon. Siya usa ka uyamot nga tawo nga ginapos sa mahangturong mga limitasyon, ug gusto usab niya nga kita mahimong uyamot. Nan, ayaw padala niana.”1
Ang Langitnong Amahan ug si Jesukristo gusto nga magmalipayon kamo. Kon kita mobalik Kanila, Sila makatabang kaninyo nga makalahutay sa mga pagsulay ug makakaplag og kalinaw ug kalipay.
Nasayod Kita kon si Kinsa ang Modaog sa Kataposan
Ang Ginoo nagdapit kanato sa “paghunahuna [ngadto Kaniya] sa matag hunahuna; ayaw pagduha-duha, ayaw kahadlok” (Doktrina ug mga Pakigsaad 6:36). Kon kita maminaw niini nga imbitasyon, ang Iyang maulaong grasya ug gahom kanunay nga mas molig-on kay sa mga paningkamot ni Satanas sa paglingla kanato. Dili kita magpabiktima sa mga sa taktika ni Satanas. Kita makabaton og kaisog ug kalig-on sa pagbuntog sa mga tintasyon ni Satanas ug sa paglahutay sa mga hagit sa kinabuhi.
Himoa nga Dili Mahasol ang Inyong mga Kasingkasing, ni Howard Lyon
Ang Manluluwas miingon, “Ako mao ang kahayag sa kalibotan. Ang mosunod kanako dili na gayod maglakaw diha sa kangitngit kondili makabaton hinuon sa kahayag sa kinabuhi” (Juan 8:12). Siya miingon usab, “Paantuson kamo sa kalibotan apan ayaw kahadlok kay nabuntog ko na ang kalibotan!” (Juan 16:33).
Si Jesukristo mobayaw kanato ug molig-on kanato batok sa bisan unsa nga taktika nga sulayan ni Satanas sa paggamit batok kanato. Kon kita mohinumdom sa Manluluwas ug sa Iyang mga pagtulun-an, kita makakita sa mga lipat-lipat ni Satanas ug mga ilusyon ug makita “nga mga butang nga sila gay[o]d mao” (Jacob 4:13).