“Nasayod Ko sa Akong Bili,” Alang sa Kalig-on sa Kabatan-onan, Ene. 2022.
Ang Tema ug Ako
Mga Kabatan-onan mipaambit kon giunsa nila sa pagsunod ang mga pulong sa Tema sa Young Women ug sa Korum sa Aaronic nga Pagkapari
Nasayod Ko sa Akong Bili
“Ako usa ka hinigugmang anak nga babaye sa langitnong mga ginikanan.”
Gilitratohan ni Christina Smith
Sa daghang bahin sa Jamaica, ang mga estudyante nga sama nako adunay kuhaon nga usa ka eksamin sa eskwelahan aron makasulod sa high school nga ilang gusto. Ang akong mga higala ug ako nagtuon og maayo aron nga kaming tanan makaadto sa labing maayo nga high school. Sa dihang misugod ko sa pagduhaduha nga makahimo ba kaha ko niini, ang akong mama kanunayng midasig kanako. Siya mipahinumdom kanako nga ako usa sa mga anak sa Langitnong Amahan ug nga Siya motabang kanako nga makaadto sa husto nga dalan.
Sa dihang miabot ang mga resulta sa eksamin, nakuha nako ang kinatas-ang grado nga akong maabot! Mahinamon kaayo ko tungod kay nagpasabot kana nga makauban nako ang tanan nakong mga higala!
Apan sa wala madugay akong nahibaloan nga usa sa akong mga higala mubo ra ang iyang grado. Naguol kaayo kaming tanan nga siya dili makauban kanamo. Apan ako nakakaplag og kalipay sa paghinumdom sa unsay gitudlo sa akong mama kanako. Ang akong higala usab usa ka talagsaong anak nga babaye sa Langitnong Amahan, ug Siya motabang usab kaniya, dili igsapayan ang grado sa eksamin.
Ang akong kamahinamon nahanaw sa dihang ang akong higala misugod sa pagsulti sa tanan nga ako dili angayan nga makasulod niana nga high school—nga siya unta ang angay nga makasulod. Kadaghanan sa akong mga higala dapig kaniya ug mihunong sa pagpakig-uban kanako. Misugod ko sa pagduhaduha sa akong kaugalingon. Angayan ba gyod kaha ko nga makasulod?
Gihunahuna nako og balik ang unsay gitudlo sa akong mama ngari nako: nga ako lahi nga anak gilalang gikan sa panagway sa Langitnong Amahan.
Ako anaa na karon sa bag-ong eskwelahan, ug ako mihimo og bag-ong mga higala. Nagsuporta sila nako ug nagpahinumdom kanato sa akong bili. Akong nakat-onan nga dili igsapayan unsay isulti sa ubang mga tawo bahin kanako. Malipayon ko kon naningkamot ko mahimong kinsa nga gusto sa Dios nga ako mahimo—tungod kay kana mao ang akong gusto nga mahimo.
Ang tagsulat nagpuyo sa Jamaica.