“Impluwensiya sa Usa ka Higala,” Alang sa Kalig-on sa mga Kabatan-onan, Ene. 2022.
Impluwensiya sa Usa ka Higala
Ang akong pagkatin-edyer lisod, apan ang Dios mipadala kanako og usa ka higala sa pagtabang kanako latas niini.
Paghulagway ni Judy Bloomfield
Kanunayng kong mibati nga nag-inusara sa kalibotan. Ang akong mga ginikanan nagdiborsyo sa dihang ako usa pa ka masuso, ug dayon pipila ka tuig ang milabay ang akong mama nagminyo pag-usab ug mibalhin kami sa 4,000 ka milya, gikan sa Georgia, USA, ngadto sa Oregon, USA. Dako kaayo kadto nga kausaban alang sa usa ka nuybe anyos nga batang babaye, ilabi na sa usa nga adunay tonada sa habagatan [southern accent] kinsa dili hingpit nga madawat sa ubang mga bata.
Sa dihang mibalhin ko sa high school, hinoon, nahimamat nako si Nicole.* Diha-diha dayon, gibati nako ang usa ka positibo, malinawon nga pagbati mahitungod kaniya—usa ka butang nga wala na nako nasinati. Nasayod ko nga kinahanglan ko nga makighigala niini nga batang babaye!
Sa among kanunayng panagkuyog, nakatabang ang among panag-uban nga dili na kaayo ko mobati og kamingaw. Ang makauban niya sa ilang panimalay sama nga naglakaw ngadto sa usa ka lahi nga kinabuhi: mabati ang Espiritu sa tibuok panimalay. Adunay mga hulagway sa Manluluwas ug sa higanting mga estraktura bisan asang dapit. (Akong nahibaloan sa kadugayan nga kini ang mga templo.) Ang misyonaryo nga buhat ni Nicole gisugdan pinaagi sa pagdapit kanako sa balay, ug wala gani siya nakahibalo niini.
Pagpakighigala ug Pagtuo
Si Nicole nangalagad kanako pinaagi lang sa pagkahimong higala nako. Mihatag siya nako sa Basahon ni Mormon, ug kami misugod sa pagbasa og dungan sulod sa iyang sakyanan human sa eskwela.
Ang Basahon ni Mormon misugod sa paghulip sa mga kahaw-ang sa akong kinabuhi. Apan gibati gihapon nako ang pag-inusara. Dili ako miyembro sa simbahan ni Nicole, apan dili man usab ako kabahin sa relihiyon sa akong mga ginikanan.
Si Nicole mabinationg miaghat kanako sa pag-ampo ug mangutana sa Dios kon tinuod ba ang Basahon ni Mormon. Wala pa gayod ako nakaampo sukad, busa wala koy ideya unsay angay nakong isulti. Apan migawas lang ko ug misugod sa pakig-istorya. Nangutana ako sa Dios kon ang simbahan ni Nicole husto ba usab nga simbahan alang kanako. Sa paghuman gayod sa akong pangutana, mibati ko og kabugnaw sa tibuok nakong lawas. Ako nasayod, sa walay pagduhaduha, nga ang Basahon ni Mormon tinuod ug kining Simbahan mao ang husto alang nako.
Nag-edad ko og 15 sa dihang nadawat nako kini nga pagsaksi. Sulod sa misunod nga pipila ka tuig ako mituo, bisan og ang akong mga ginikanan wala mainteresado sa Simbahan. Apan ako wala mag-inusara sa akong hugot nga pagtuo, tungod kay si Nicole anaa gihapon nagsuporta kanako.
Bag-ong Tinuohan, Bag-ong mga Pangutana
Pagkahuman nga migradwar ko sa high school, mibalhin ko ngadto sa Utah, USA. Si Nicole anaa na didto, ug siya mahinangpon nga nagpaabot kanako nga moabot didto aron makasugod nako sa pagdawat og mga leksyon gikan sa misyonaryo. Aduna koy plano nga magpabunyag sa akong ika-19 nga adlawng natawhan—unom nalang ka semana— ug si Nicole mipasalig kanako nga anaa siya uban kanako sa tibuok higayon.
Sa dihang ang mga misyonaryo misugod na sa pagtudlo kanako, wala nadugay akong naamgohan kon unsa ra gayod kagamay ang akong nasayran mahitungod sa Simbahan. Akong gibasa ug gimahal ang Basahon ni Mormon, apan sa kalit lang sila nagsulti kanako mahitungod sa gasa sa Espiritu Santo, sa plano sa kaluwasan, sa pagkahimong sama sa Dios, ug sa daghan pa kaayong ubang butang. Daghan ra kaayo kini nga masabot ang tanan sa usa ka higayon.
Apan si Nicole nakaila kaayo kanako. Motabang siya og pasabot kon unsa ang gitudlo sa mga elder sa paagi nga siya nasayod nga ako makasabot. Niadtong unang mga leksyon, ang iyang mapailubon nga mga pagpasabot mao ang rason nga ako nagpadayon.
Sa Kataposan Nahisakop
Sa espirituhanong paagi si Nicole misuporta kanako hangtod sa adlaw nga ako nabunyagan—ug sa pagkahuman. Mitabang siya sa mga miyembro sa ward ug sa plano sa mga misyonaryo aron ako mabunyagan sa akong ika-19 nga adlawng natawhan. Sa dihang mikawas nako gikan sa tubig ug nakita ang daghang tawo nga nagtan-aw ngari nako, wala nako mobati nga nag-inusara. Dili gayod nako makalimtan kana nga pagbati nga sa kataposan nahisakop ngadto sa Ginoo ug sa Iyang Simbahan.
Nakakat-on pa gihapon ko gikan sa makanunayon nga hugot nga pagtuo ug pakighigala ni Nicole. Iyang gipakita kanako gikan sa sinugdanan nga ang misyonaryo nga buhat wala magkinahanglan og usa ka name tag. Ang misyonaryo nga buhat ni Nicole nagsugod diha sa iyang kasingkasing, sa dihang siya mitabang ngadto sa usa ka batang babaye gikan sa habagatan kinsa nagkinahanglan og pahiyom.
Ang tagsulat nagpuyo sa Utah, USA.