“Usa ka Inhenyero sa Hingpit nga Kalipay,” Alang sa Kalig-on sa mga Kabatan-onan, Ene. 2022.
Usa ka Inhenyero sa Hingpit nga Kalipay
Kining batan-ong lalaki gikan sa Germany nakakaplag og kahibalo, katahom, ug kalipay sa tanang matang sa mga dapit—ug kon siya makakaplag niini, ipaambit niya kini.
Si Patrick nagtrabaho sa iyang modelo nga makina sa sakyanan.
Mga litrato pinaagi ni Julian Klemm
Si Patrick L., 16, gikan sa Bavaria, Germany, miingon nga ang iyang paborito nga mga hilisgotan sa eskwelahan mao ang math, physics, ug chemistry. Sa pagkatinuod, ganahan kaayo siya sa siyensiya nga gusto niyang ipakigbahin kini sa uban pinaagi sa pagsulat og basahon mahitungod sa physics (bahin sa thermodynamics ug magnetism, aron mahimong tukma).
Gusto siya nga mahimong usa ka engineer alang sa iyang panarbaho, nga maghimo og teknikal nga mga ekipo sama sa mga makina sa sakyanan. (Lain pay ato, ang punoang buhatan sa mga tighimo og sakyanan nga BMW ug Audi usa ra ka oras ug tunga gikan sa dapit diin siya nagpuyo.)
Apan dili lamang sa siyensya nga si Patrick nakakaplag og makapalagsik, makapahinam nga mga butang.
Siyensya ug Imahinasyon
Oo, si Patrick adunay dakong gugma alang sa siyensiya, apan ang iyang mga interes lapad pa kay sa lunlon, walay kalabotan sa pagbati sa tawo nga mga kasayoran ug mga pormula.
“Nakasulat ako og usa ka libro bahin sa physics, apan karon naghimo ako og pantasya nga basahon,” mipasabot siya. “Ang libro nga akong ginasulat mahitungod sa mga binuhat nga adunay madyik ug sa ilang kalibotan. Ug dayon adunay pipila ka mga batan-on kinsa mosulbad sa mga problema.”
Kining labing ulahi nga lingaw-lingaw nga proyekto nadasig sa gugma ni Patrick sa pantasya nga mga nobela sama sa Harry Potter ug Percy Jackson nga series. Ang lingaw-lingaw nga pagsulat og mga basahon usa ka butang nga nakapainteres ni Patrick human nga ang iyang uyoan misulti kaniya kon unsa kini ka makalingaw. “Natakdan ko sa iyang kalipay,” miingon si Patrick.
Kana nga makatakod nga kalipay migiya ni Patrick sa pagkuha sa unsay iyang nakat-onan mahitungod sa mga lagda ug mga reyalidad sa pisikal nga kalibotan ug magsulat og libro kabahin niini. Kini mihimo usab kaniya nga gusto nga magmugna og kahibulongan nga pantasya nga istorya. Ug walay pagkasukwahi niini. Si Patrick ingon og nasayod nga ang kamatuoran ug katahom ug kalipay mahimong makit-an sa daghang dapit. Ug gusto siya nga mangita, mohimo, ug mopakigbahin niadto nga mga butang bisan asa pa kini.
Ang Natural nga Kalibotan
Si Patrick daghan og nasabtan mahitungod sa mga balaod sa pisikal nga kalibotan. Apan naglantaw usab siya lapas sa mga kasayoran aron makakita og katahom didto.
“Nagpuyo ako duol sa usa ka lasang,” miingon siya. “Mao kana ang bentaha sa pagpuyo diha sa gamay nga lungsod—dali ra kang makaadto sa kakahoyan ug makakaplag og kalinaw didto.”
Ganahan siya sa daghang agianan sa kakahoyan alang sa pag-hike o, ilabi na, sa pagbisikleta. “Ganahan ko nga magbisikleta. Dako kini nga kalingawan alang kanako, “siya miingon. Sige gayod ako og bisikleta. Kausa nagbisikleta ako og 1,200 ka kilometros [745 ka milya] sulod sa duha ka semana.”
Ang siyensiya nagdasig sa hunahuna ni Patrick, ug ang pag-ampo nagdasig sa iyang espiritu. “Ako adunay lig-on nga pagpamatuod sa pag-ampo,” miingon siya. “Mahimo kang makig-istorya sa [Langitnong Amahan] bisan asa.”
Usahay ganahan siya nga mag-hike o magbisikleta diha sa kakahoyan uban sa iyang tibuok pamilya (Mama, Papa, duha ka manghod nga mga lalaki ug duha ka manghod nga mga babaye) o uban lang sa iyang papa. Kasagaran moadto siya nga siya lamang. Apan kanunay siyang makakaplag og kalinaw ug katahom diha sa kinaiyahan.
“Ang mga pagsubang sa adlaw nindot kaayo dinhi,” miingon siya. “Usahay makita ninyo ang kabukiran sa Alps gikan dinhi bisan og layo kaayo kini. Ug kon mosubang ang adlaw, kini moaninag, ug uban sa kabukiran, makita ninyo kining matahom nga pula nga kalangitan, ug nindot kaayo kini.”
Laing Matang sa Kahibalo
Agig dugang sa mga kasayoran sa natural nga siyensiya ug sa mga katahom sa natural nga kalibotan, gihatagan usab og bili ni Patrick ang kamatuoran—ang matang sa kamatuoran nga makita lamang pinaagi sa pag-ampo.
“Ako adunay lig-on nga pagpamatuod sa pag-ampo,” miingon si Patrick. “Pagluhod, pagkyugpos sa akong mga kamot, pagbaton og kalinaw ug kahilom, ug dayon mag-ampo. Kini mao ang akong labing dako nga pagpamatuod.”
Siya mipasabot nga usa ka bahin sa iyang pagpamatuod nagagikan sa usa ka butang nga gisulti kaniya sa iyang patriyarkal nga panalangin. “Kini nag-ingon nga ako kinahanglan mohinumdom kanunay nga ang Langitnong Amahan usa lamang ka pag-ampo ang gilay-on gikan kanako,” miingon siya. “Ikaw mahimong makig-istorya Kaniya bisan asa. Siya anaa alang kanimo bisan asa, ug ikaw makakuha og mga tubag bisan asa.”
Ang iyang kasinatian sa pagdawat og mga tubag sa pag-ampo napalambo, miingon siya, sa dihang mohimo siya og piho nga mga lakang. “Kusog nakong mabati ang Espiritu Santo sa pipila ka pag-ampo. Kon matinguhaon akong maghimo og mga tumong, mahunahunaon nga mangutana, tuyuon nga maningkamot ug molihok sama sa giingon sa mga kasulatan, ug maghulat ug mogahin og panahon—kon ako makahimo niana, ako kanunay adunay lig-on nga pagpamatuod ug mobati sa Espiritu Santo.”
Si Patrick nakahinumdom sa usa ka panahon nga siya mihalad og ingon niana nga espesyal nga pag-ampo. “Kita naghisgot pirme kabahin kang Joseph Smith ug sa unsang paagi sa edad nga 14 siya nag-ampo ug nakadawat og tubag,” miingon siya. “Ug busa ako naningkamot—ako miadto gani sa kakahoyan—ug ako nag-ampo. Ug ako nakadawat og tubag. Dayon nagmalipayon ako. Ug kana nakapalig-on sa akong pagpamatuod.”
Pagpakigbahin sa Unsay Iyang Nahibaloan
Sama nga siya nagtinguha sa pagpakigbahin sa iyang siyentipikanhon nga kahibalo ug sa iyang mamugnaon nga imahinasyon, nagtinguha usab si Patrick sa pagpakigbahin sa iyang espirituhanong kahibalo.
Sugod sa edad nga 12, siya migahin og panahon sa pagtabang sa full-time nga mga misyonaryo. Kausa midapit usab siya og higala sa iyang panimalay aron makadawat og mga leksiyon sa misyonaryo. “Naghisgot kami mahitungod sa Pagpahiuli. Nainteresado siya. Naminaw siya pag-ayo ug miapil ug mibasa sa mga kasulatan. Gibasa namo ang Santiago 1:5, nga nabasa usab ni Joseph Smith. Gipabasa nako siya sa Joseph Smith—Kasaysayan. Interesado gayod kaayo siya.”
Ang iyang mga kauban sa klase sa eskwelahan nagtahod sa iyang tinuohan. “Imbes nga biay-biayon ang Simbahan, ila kining gisuportahan,” miingon siya. Bisan ang iyang magtutudlo sa iyang klase sa relihiyon sa eskwelahan nagsuporta kaniya. “Nagtuo siya nga nindot kaayo nga ako adunay hugot nga pagtuo sa Dios ug gani nagtabang kanako sa pagkab-ot sa akong mga tumong.”
Human nga siya makatapos sa pag-eskwela ug mopasarang alang sa pagtuon sa unibersidad, nagplano usab si Patrick nga moserbisyo og full-time nga misyon. “Tingali mag-andam ko pinaagi sa pagbasa sa Isangyaw ang Akong Ebanghelyo,” miingon siya. “Ganahan ko nga mahimong maalamon ug magbasa, motudlo sa mga leksiyon, ug mogahin usab og daghang panahon uban sa mga misyonaryo.”
Ganahan si Patrick nga palamboon ang iyang imahinasyon. Nagsulat gani siya og pantasya nga libro.
Maayo Og Dungog
Nakat-onan ni Patrick nga adunay daghang butang nga “mahiyason, matah[o]m, o maayo og dungog o dalaygon”, ug busa nagtinguha siya niini nga mga butang (Mga Artikulo sa Hugot nga Pagtuo 1:13). Ug kon makaplagan niya kini, ipakigbahin niya kini.
Sa siyensya man, imahinasyon, o kinaiyahan, nakakaplag siya og makapahinam nga kahibalo ug talagsaon nga katahom bisan asa man siya moadto. Ug siya nakakaplag sa labing taas nga kahibalo, katahom, ug kamatuoran pinaagi sa iyang relasyon sa Langitnong Amahan ug ni Jesukristo.