“Ana Babaire ni Kakukurei te Atua ao Tokin Kawaim ae Mairoun te Atua,” Ibukin Kakorakoraia Kairake, Tianuare 2022.
Ana Babaire ni Kakukurei te Atua ao Tokin Kawaim ae Mairoun te Atua
Ataakin ao maiuakinan maium ni kaineti ma te babaire ni kakukurei e kariaiakako bwa ko na roko n tokin kawaim ae mairoun te Atua.
Kamataata n te tamnei iroun Albert Espí
Tera ae roko n am iango ngke ko ongo te taeka tokin kawaim? Ko iangoa te bwai ae a kaman katauraoaki ao n aki kona ni katukaki? Te bwai ae kakamaku ke ae kakukurei ae aki kona ni bitaki n aki tabe bwa teraa ae ko karaoia? Ke tao ko iangoa te titaa n te tamnei ke te boki, are e kantaningaki bwa e na katia te mwananga, kamaiuia te aonaaba, ke n riki bwa te toka ke te uea n aine?
Nanon taeka akanne a kona n titebo ma are n te rikitinare; ma e ngae n anne, ngkana ti taetae iaon tokin kawaira mai iroun te Atua, ti nanona te bwai ae kaokoro. Ni kaokoro ma tokin te kawai ae ko wareka taekana inanon booki ke n noori n te tamnei, rokom n tokin kawaim ae mairoun te Atua e kona n reke ibukina bwa ngkami natin te Atua, ma e tangiria naba ae ko na kabongana inaomatam.
Iai mwakan te Atua i karawa ao iaon te aba. Te berita ae tabu ae ti karaoia ma Tamara are i Karawa e kariaia Ngaia bwa ara itoman ngkai ti nakonako rinanon kangaangan te maiu. Tokin kawaira mairoun te Atua—ara konabwai ngkana ti reitaki ma te Atua—a kona ni karaoaki rinanon Ana babaire ni kukurei.
Atakin ana babire Tamara are i Karawa ibukin kukureim e na anganiko te konaa n ataa kinakim ae akea tokina ao te kantaninga iai. Ao rinean karaoan ao kawakinan berita ma te Atua e na kariaiko ni kakoroa nanon te kantaninga anne.
N ana boki Mote ti warekia bwa “E uotaki nako Mote nakon te maunga ae moan te rietata, ao e noora te Atua ni kaaitara ma ngaia, ao e taetae ma ngaia” (Mote 1:1–2). Rinanon kawarakina aei, te Atua e reireina Mote taekan tokin kawaina ae akea tokina. E ngae ngke rabwatan Mote e mamate ao n aki kororaoi, e reiakina te bwai ae kakawaki bon ibukina: bon ngaia raoi natin te Atua (taraa Mote 1:6).
Uringnga bwa Antai Ngkoe
E tangiria Tatan bwa ko na mwaninga ae antai ngkoe. Ngke e kataia Tatan n ana nanon Mote man te mwakuri ae e a tia te Uea ni katauraoia ibukina, E kaeka Mote ma te ninikoria, “Antai ngkoe? Bwa nooria, ngai natin te Atua” (Mote 1:13; e kairaki ma katuruturuana). Mote e a manga taekinna, “Kararoako, Tatan; tai mwamwanai” (Mote 1:16; e kairaki ma katuruturuana).
N taekana teuana, e taku Mote: “Ko aki kona ni mwamwanai, ibukina bwa I ataia bwa antai ngai. Akea iroum otan te Atua ao mimitongina. Ngaia ae bukin tera n na taromauriko ke ni kakoauai am kewe?”
Tai mwaninga ae e tangiriko te Atua ao iai nanona ni buokiko ao ni kakabwaiako. Iai Nanona ae e rine iroum ngkai ngkoe temanna naba Natina. Taiaoka ana te tai n reiakinna bwa tera raoi nanon ae ngkoe natin te Atua. Ngkanne katei kouru ao karaoi rinerine aika a na buokiko ni maiuakina mataatam anne ni katoa bong.
Iai te Mwakuri ae N na Anganiko
E na iai bwaai ae ko na katawei ao tabeaiangam. Iai am bwai n reirei ae ko na karaoi, raoraom, tabem n am utu, ao tao am mwakuri. Eng, am kakaewenako bwa ko na kabaeranti mwakuri ni kabane aika kakawaki aikai n aki mwaninga oin te kantaninga ni maium. Iai ana mwakuri te Atua ibukim ae ko na kakoroa bukina (taraa Mote 1:6). Tao bon te kaeka nakon te titiraki “Bukin tera I mena n te aonaba aei?”
Ngkai ngkoe natin te Atua, ko roko nakon te aonaaba aei bwa ko na karekea rabwatam. Ma rabwatam, ko kona n rineia bwa ko na ira Iesu Kristo ma te kakaonimaki. Ko kona n rineia ni karinei ana tua te Atua, karekei otenanti aika tabu, ao ni karaoi ao ni kawakin berita aika tabu n te euangkerio. Karaoan bwaai aikai e na katauraoiko ni kakoroa nanon tokin kawaim ae mairoun te Atua.
Ma te kantaninga aei ni mataata n am iango, ko kona n nora kakawakin kanakin te toa ni katoa wiiki, kamatebwaiakan koroboki aika tabu, tataro ni katoabong, katean kouru aika uaana, ao ni buokiia tabeman. Bwaai aikai a ibuobuoki ni kauringko bwa bukin tera raoi ae ko mena ikai, ao a na buokiko n tau ni karekea te kaotioti are ko kainnanoia bwa ko na kukurei ao n teimatoa iaon te kawai are e beritanaki. Ngkana ko rairananom ao ni kakaonimaki n ira te Uea, ko na karekei oin am kaetieti n iteran nako maium.
Kataia n Riki Bwa Antai Ngkoe Bon Anne ae Nanonaki
Ana tararua ao ana tabeaianga te aonaaba, ke oin am aki mano, e kona ni karaoiko bwa ko na tarariaoa te bwai teuana n tabem ae kakawaki n ana babaire ni kamaiu te Atua ae kakawaki. Ngkana e riki aei, I kaoko bwa ko na nakomai nakon Kristo (taraa Moronaai 10:32). Akea n ana babaire te Atua ae akea tokina ae a kangaanga bwaai Irouna, ao Irouna, a bane ni kona ni karaoaki bwaai ni kabane aika raraoi.
Katakin irakin te Tia Kamaiu bon te kabanea n tamaroa ni kawai man te taratara n te euangkerio. Ma te onimaki ao te kantaninga Irouna, ko kona ni kaitarai ma te aki nanokokoraki kakaewenako n te maiu. E na reke otam riki ae korakora ngkana ko karaoi rinerine, katoki kangaanga, mwakuri nakon kouru aika raoiroi, ao ni kaitarai kataaki.
Am babaire e na rota are akea tokina. Rinanon Iesu Kristo ao Ana mwakuri n akoi, ko kona ni karekea te kimwareirei n te maiu aei ao are imwiina. Ko kona n ata tokin kawaim ae mairoun te Atua ni karekean ake iai Irouna ni kabane ao ni maiuakina te maiu ae E kairia, are bon “te maiu ae akea tokina, …te bwai n tituaraoi ae moan te korakora mai i buakon ana bwai n tituaraoi te Atua” (Reirei ao Berita aika Tabu 14:7).