“Ana Kairoro Raoraom,” Ibukin Kakorakoraia Kairake, Tianuare 2022.
Ana Kairoro Raoraom
Ngke I a mena n te roro ni kairake e bon matoatoa, ma te Atua e karekea raoraou bwa e na buokai n rinanona.
Kamataata n te tamnei iroun Judy Bloomfield
I a tia n namakina te maroa n te aonaaba. A raure au karo ngke I uarereke, ao tabeua te ririki imwiina tinau e a manga iein ao ti mwaing tao 6500 te kiromiita, mai Georgia, USA, nako Oregon, USA. Bon te bitaki ae korakora iroun te ataeinnaine ae ruaiwa ana riki n rinanona, riki ngkai e rangi ni kaokoro tein een ana taetae are e aki butimwaeaki irouia ataei ake tabeman.
Ngke I a waerake man te moanrinan nakon te kauarinan n reirei, ao, I kaitibo ma Nicole.* Ngkekei naba, I namakina arona ae raoiroi, ao n rau—te bwai ae akea ni maiu. I ataia bwa n na iraorao ma te aine aei!
I nanon ara tai ni bobotaki, e riki ae menan Nicole irarikiu e buokai n namakina te mano ao te aki maroa. Te nanako ni mwengana ti tebo ma te nakonako n te maiu ae kaokoro: Tamnein te Atua e kaona nanon te auti ni kabane. Iai tamnein te Tia Kamaiu ao kateitei aika bubura n taabo nako. (I reiakinna imwiina bwa kateitei aika bubura aikai bon taian tembora.) Ana mwakuri ni mitinare Nicole e moanaki man ti kaoakiu, ao e aki ataia.
Riiki bwa te Rao ao Kakoauaa
E ibuobuoki Nicole nakoiu ti man te iraorao. E anganai Ana Boki Moomon, ao ti moana ara wareware inanon ana kaa imwiin te reirei.
Warekan Ana Boki Moomon e buokai n namakina te nakoraoi ao te tabeakinaki. Ma I teimatoa n namakina te maroa. Tiaki ngai kaain ana aro Nicole, ma tiaki ngai raoi naba kaain aia aro au karo.
Nicole e kaungaai bwa n na tataro ao n titirakina te Atua ngkana e koaua Ana Boki Moomon. I tuai man tataro ni kabaibati, ngaia ae akea au iango bwa tera ae n na riai n taekinna. Ma I ti otinako ao ni moana au taetae. I titirakina te Auta ngkana ana aro Nicole bon te aro ae koaua ibukiu naba. N te tai are e bane au titiraki, I namakina te mwaitoro rinanon rabwatau ni kabane. I ataia, n akea te nanououa, ae Ana Boki Moomon e bon koaua ao te Ekaretia aei e bon eti ibukiu.
Bon 15 au ririki ngke I karekea te kakoaua aei. Inanon tabeua ririki ake imwiina I kakoaua te Ekaretia, e ngae ngke akea nanoia au karo n te Ekaretia. Ma I aki maroa n au onimaki, ibukina bwa e teimatoa ni mena ikekei Nicole ni boutokaai.
Te Onimaki ae Boou, Titiraki Aika Boou
Imwiin ae bane au tai n te kauarinan n reirei, I mwaing nako Utah, USA. E kaman mena Nicole ikekei, ao e rangi n ingainga n tataningaai bwa I aonga ni wakina au reirei ma mitinare. Iai au babaire bwa n na bwabetitoaki n au ka 19 n ririki—ai ti onoua te wiiki riki—ao e karaua nanou Nicole bwa e na bon mena ikekei n raonai.
Ngke a moanna n reireinai mitinare, I waekoa n ataia ae e rangi ni uarereke au atatai iaon te Ekaretia. I a tia ni wareka ao n tangira Ana Boki Moomon, ma n te tai ae waekoa a tuangai taekan ana bwaintituaraoi te Tamnei ae Raoiroi, te babaire ni kamaiu, te riki n aron te Atua, ao a mwaiti riki bwaai aika a boou nakoiu. E bon rangi ni mwaiti reiakinakina n teuana te tai.
Ma e ataai raoi Nicole. E na ibuobuoki ni kabwarabwara te bwai are a reirei iaona mitinare n te kawai ae e ataia ae n na ota iai. Inanon moan reirei aikanne, ana kabwarabwara ae nanorinano bon ngaia bukina ae I tiku iai.
N Tokina I A Kaainna
E boutokaai Nicole n te tamnei n aron anne ni karokoa te bong are I bwabetitoaki iai—ao n are imwiina. E buokia membwa n te uoote ao mitinare ni baireia bwa I aonga ni bwabetitoaki n au ka 19 n ririki. Ngke I otinako man te ran ao n noriia aomata ni moangare nakoiu, I aki manga namakina riki te maroa. N na bon aki mwanuokina te namakin anne are n tokina I a bwainaki iroun te Uea ao Ana Ekaretia.
I teimatoa n reiakinaki man teimatoan ana onimaki ao ana iraorao Nicole. E kaotia nakoiu mai moana ae te mwakuri ni mitinare e aki kainnanoa te ara are a uouotia. Ana mwakuri ni mitinare Nicole e moa mai inanona, ngke e nakon te ataeinnaine ni maiaki ae kainnanoa te moangare.
E maeka te tia korokaraki i Utah, USA.