“Tamara are i Karawa e Ataai,” Ibukin Kakorakoraia Kairake, Tianuare 2022.
Te Boto n Iango ao Ngai
Kairake a tibwaia bwa a kanga ni maiuakin taeka ake n aia Boto n Iango Ataeinaine ao te Kooram n te Nakoanibonga ae te Aaron
Tamara are i Karawa e Kinaai
“Ngai natin te Atua ae Tangiraki.”
Ngke ti nako ni kaembwa ma tamau, ti tibwaua tabeua te tai ni botaki ao ti rinanon te bwai teuana ae onoti ae I aki kona ni mwaninga. Ti nakonako irarikin te maunga n te tairiki teuana ao ni kunea te tabo ae ti na tekateka iai. Ngke ti taraa karawa n te tairiki anne, ti katobibiaki n itoi aika raneanea aika I tuai man nonori. Ti uaia n tekateka inanon te tai ae maan, n arani buraneti ao kurubu ni itoi teuana imwiin teuana.
N taraakin te aonaaba are e mena imoau, I namakinna ae I uarereke ao n akea bonganau. I aki kona n ataia naba bwa iraua buraneti ake tabeua aika mena ikekei—“n aonaba ae akea tokina,” kee? Tera ae I kabotauaki ma ngaai nakon te bwai anne?
I titirakina au karo ngkana iai riki bwaai aika maiu ikekei itinanikun te aonaaba, aio e a kaman anganai te nakonano n te iango anne. Tao e a kaman tia ni wareki au iango, ibukina bwa e taekinna n ae bebete: “Aio te bwai ae I ataia. A mwaiti ana karikibwai Tamara are i Karawa, n aron ae ko kona n noria. Ma man Ana karikbwai ni kabane, E tangiri ngkami n tatabemani ngkami.
“E noori bwaai ni kabane aika ko rinanoi ao e tangiria riki bwa kam na riki bwa mwakoron maiumi. E tangiria ni uota te kimwareirei nakoimi ao ni buoki ngkami n oki ni maeka ma Ngaia n aki toki.”
I teimatoa n namakina ae I uarereke iaan karawa ae moan te bubura aei, ma I kakoaua ana koaua tamau. I kakawaki nakon Tamau are i Karawa. Ao E tangiria ni mena inanon maiu.
I uringa te bwai ae reirei Beretitenti Dieter F. Uchtdorf, ngke ngaia ngkoa te Kauoman ni Kauntira n te Moan Beretitentii: “Aio bon aia kangaanga aomata: ni kabotauaki nakon te Atua, ngaira bon akea arora; ma ngaira bon ana bwai te Atua.”1
N aron karawa are e takiakia, Ana karikibwai te Atua bon akea tokiia—ma ti tebo ma Ana tangira ibukiia Natina n tatabemania nako. Ibukira n tatabemaniira nako. N tabetai ao e oki rikaaki au ururing nakon te tai ngke I tekateka iaon te maunga ma te miimi ae korakora. I kona n ae akea arou ni kabotauaki nakon te Atua, ma E aki iango n aron anne. Ngai bon Natina, ao E kinaai.
E maeka te tia korokaraki i California, USA