“Kunean Iesu Kristo n Te O Tetemanti,” Ibukin Kakorakoraia Kairake, Tianuare 2022.
Nakomai, Iriirai
Kunean Iesu Kristo n te O Tetemanti
Aikai teniua kawai aika ko kona ni kunea iai te Tia Kamaiu ngkana ko kamatebwaia te O Tetemanti n te ririki aei.
Te kamwaninga ae karina: Tera booki man booki aika tabu aika a taekina Iesu Kristo? Hmm. Ti na noria:
Ana Boki Moomon bon te kakoaua teuana Ibukina.
Reirei ao Berita aika Tabu bon karekean rongorongo mai Irouna nakon Iotebwa Timiti ao burabeti ake tabeman.
Te Nu Tetemanti e kabwarabwarai taekan Maiuna.
Ao tera taekan te O Tetemanti? E reireiniira taekan naba Iesu Kristo?
Eng! Ni koauana, te Tia Kamaiu e kakorakoraia riki Ana reirei n ata Tabena n te O Tetemanti: “Ni moa ni kaeti mairoun Mote ao mairouia burabeti ni kabaneia, e kaeti nako ia baike E taekinaki iai n te Baibara ni kabanea” (Ruka 24:27).
Aikai teniua kawai aika ko kona ni kina iai te bwai ae ko warekia bwa e kaineti nakon Iesu Kristo ngkai ko rinanon te O Tetemanti n te ririki aei.
1. Koroboki aika tabu aika a taekina Iesu Kristo ni kabongana te ara ae kaokoro.
N te O Tetemanti, e aki toki n atongaki Iesu bwa te “Uea” ke te “Atua.” Kiibu man te Baibara ae boretiaki man te Ekaretia iai inanona taeka mai inano (footnotes) ae kona ni buokiko n ataia ngkana e kaeineti te kibu anne nakon Iesu Kristo. Te katooto, ngke e taetae Mote ma te Atua n te buakoako ae ura (taraa Te Otinako 3:6), taeka mai inano e kamatata ae taetae ma te Tia Kamaiu.1 Beretitenti Russell M. Nelson e a tia ni kaungaira bwa ti na kamatebwai aran ao nakoan Kristo aika e kabonganai inanon koroboki aika tabu.2
2. Bwaai ao mwakuri aika riki aika a kauringiira Iesu Kristo.
A mwaiti kiibu n te O Tetemanti n raonaki ma kanikina aika a kona n reireinira taekan Iesu Kristo ao ni kauringiira te ibuobuoki are E anganiira. Ibukin te katooto:
-
A mwaiti booki aika tabu aika a kabwarabwarai taai ngke aomata aika onimaki a tuangaki bwa ana anga aia karea aika taian man bwa iteran aia nebonebo. Te katooto, ngkana natin Iteraera a mwaken aia mataroa ma raraan te tiibu, a kamanoaki man te kamateaki ae korakora. A kauringiira angakarea aikai ae e kariaia Iesu Kristo bwa e na tiringaki bwa iteran Ana Mwakuri ni Kamaiu n tokanikai iaon te mate n tamnei ao n rabwata. (Taraa Te Otinako 12:13.)
-
N te taina te burabeti ae arana Eria e na karaba n te rereua. E namakina te nanokawaki ao e taku bwa E tangiria ni mate. Ngke e matu, te kariki ao te ran a kaoti n te kakai, ni kakorakora n rabwatana ao n ana iango bwa e na reitinako ni maiu. E kona te bwai aei ni kauringiira ae Iesu Kristo bon te Ran ni Kamaiu ao te Berena ni Kamaiu, te kabanea ni kakawaki n te kantaninga ao n te maiu. (Taraa 1 Uea 19:1–8.)
-
“Boni baen waeu am taeka,” e koreia temanna te tia koro areru (Taian Areru 119:105). Ao e taku Mika, “Ngkana I tekateka n te ro, ao Iehova bon te ota nakoiu” (Mika 7:8). E kauringiira aia taeka are Iesu Kristo bon Otan te Aonaaba, ni kairiira rikaaki nakon mwengara i karawa.
Ngkana ko wareware, ko na kunei bwaai riki tabeua ake a kauringko ibukin Iesu Kristo ao Ana konabwai ni kamaiura. Te katooto, ngke a kamaiuaki ana utu Nooa man te ieka n te aake ke ngke e anganaki Ana tai Iona bwa e na raira nanona ngke e mena inanon biroton te ika. A kona taai aikai ni kauringiira ae e kona te Tia Kamaku ni uotiira rinanon angibuakan te maiu ao n anganiira ara tai n oki rikaaki n te kawai ae eti. (Taraa Karikani Bwaai 7:1; Ioona 1:17.)
3. Kiibu ake a taetae ni burabetiia bungiakin Iesu Kristo.
N te bong aei ao a ingainga nanora nakon ao te katauraoi ibukin Kauaokin Iesu Kristo. N te kawai naba anne, burabeti n te O Tetemanti a ingainga nanoia nakon ao ni korea taekan moan Rokona, ngke E bungiaki iaon te aba. Ibukin te katooto:
-
Te burabeti ae arana Baraam e kabwarabwara bwa e kanga “n oti nako te itoi teuana mai buakoia Iakoba” (Warekaia Ireraera 24:17). E nanonaki n aei bwa e na bungiaki te Tia Kamaiu rinanon rikiia ana bakatibu Iakoba (ke Iteraera).
-
Te burabeti ae arana Natan e tuanga te Uea Tawita ae e na riki Iesu Kristo bwa temanna kanoan Tawita—bwa kanoana e na kateimatoa “kaintokan ueana n aki toki” (2 Tamuera 7:13).
-
Te burabeti Itaia e koroi tabeua kabwarabwaraan te Tia Kamaiu n te O Tetemanti aika rang n ataaki. Tabeua ana taeka a kabongaki bwa mwanewen kuuna inanon Handel’s Messiah, are e aki toki n ananeaki n tain te Kiritimati. (Taraaa Itaia 7; 9; 40; 53.)
Ma te kataneiai ae uarereke, ko na kona ni kunea Iesu Kristo ni kabuta te O Tetemanti n te ririki aei. E tangiriko n ae onoti, n aron are E tangira Atam ao Ewa, Aaron ao Miriam3—ao a mwaiti riki aika E karaoa te mwakuri n ibuobuoki nakoia n rongorongon ngkoa, aika kairaki mai ieta. Ma te onimaki iroun Iesu Kristo, ao ma te ibuobuoki mairouia n tatabemaniia nako, te ririki aei e na riki bwa ririkin kamatebwaian koroboki aika a tabu!