“Tokanikai Iaon Ana Kairoro Tatan,” Ibukin Kakorakoraia Kairake, Tianuare 2022.
Nakomai, Iriirai
Tokanikai Iaon Ana Kairoro Tatan
Tatan e karaoa are e kona bwa e na mwamwanaira. Ma te kakaitau iai ibuobuoki mai ieta ni buokiira n totokoi ana kai ni kamwane.
Te tia kaiwa e karebwei taboni baina ao te boro e bua mai imatam.
E Kamimi!
Ngkanne e katika te rabiti mai inanon te bwara ae akea kanoana ao ni karika te bwai teuana bwa e na beibeti n te eea.
Whoa! E kanga ni karaoia?
A tia taan kaiwa ni karaoa ae aomata a na kakoauaa bwa a nora te bwai ae kangaanga arona n riki ngke, ni bon koauana, a ti nora te bwai are e tangiria te tia kaiwa bwa ana noria.
Eti anne! Taan kaiwa aki n ae a bon karaoa raoi ae a korea rabwatan aia tia ibuobuoki ni iteranna. A tia ni kunei kawai aika wanawna ni kamwaningaira ni iangoia bwa ti a tia n nora te bwai ae bon aki riki. Bwaai aika raba a boboto iaon iango aika kewe ao a mwamwana te aba.
Ngkai a bane ni karaoaki bwaai aikai ibukin te kakukurei ao te kamataku, aekan iango ni kewe ao ni mwamwana te aba a kakamaaku—nakon te maiu n rabwata ao n tamnei.
Te Tia Kewe ao te Tia Mwamwana te Aba ae Kakamaaku
Tatan bon ana kairiribai ni kabane te raoiroi ao e aki tangira temanna bwa e na ira Tamara are i Karawa ao Iesu Kristo. E tangiriira bwa ti na karawawataaki ni kabane n ai arona (taraa 2 Nibwaai 2:27).
Ni kakoroan nanon aei, e karaoa are e konaa ni kairiira bwa ti na nanououa ke n aki mutiakin koaua aika akea tokiia. E mwakuri n aki motirawa ni kamangoira ni kakoaua ae te raoiroi e buakaka ao te buakaka e raoiroi (taraa Itaia 5:20). Aio bukina ae n tabetai e kinaaki bwa tamaia taan mwamwana te aba ao te tia kamwaamwane ae korakora (taraa Mote 4:4). Ao e a tia ni karaoa aei n te tai ae rangi ni maan.
Te Bwaka
N te Ne n Aroka are Eten, te Atua e tuanga Atam ao Ewa bwa a na aki amwarake man uaan te kai n ata te raoiroi ao te buakaka. Ngkana a karaoia, a na kitana te Ne n Aroka are Eten ao ana bon mate. Ma e tuangiia te Atua bwa a kona n rineia (taraa Mote 3:16–17).
Tatan e tangiria ni kamaunai ana babaire te Atua. E kataia man anakin nanon Ewa bwa e na kana uaan te kai are tabuaki. E kewe ao e taku bwa e aki kona ni mate (are e bon kaitara te bwai are e a tia n taekinna te Atua). E tuangnga naba ti mwakoron te koaua (taraa Mote 4:11).
N tokina, Atam ao Ewa a kana uaan te kai ao a teweaki nako mai imatan te Atua. E atongaki aei ni booki aika tabu bwa te “mate n tamnei.” A riki naba ni mamate, are nanona a kona ni mate n rabwataia. E ataaki aei bwa te Bwaka.
Ngkai ngaira bon kanoan Atam ao Ewa, ngaira, naba, ti kaokoroaki mai imatan te Atua ao ti na rinanon te mate n rabwata. Ti kataaki naba man kangaangan te maiu ao ana kariiri Tatan.
E tara n ae aei bon te bwai ae buakaka, ma te Bwaka bon mwkoron ana babaire Tamara are i Karawa ae kakawaki. E anganira te tai bwa ti na reiakinna ao n rikirake man kabonganakin ara rinerine n rineia ni karaoa te raoiroi. Ao ibukin Iesu Kristo ao Ana Mwakuri ni Kamaiu, ti kona n raira nanora ngkana ti bure ao ni katauraoi ni karekea te maiu ae akea tokina. Bwaai ni kabane ake a riki man te Bwaka, Iesu Kristo e kaeti. Tatan e aki katoka ana babaire te Atua.
Tokanikai Iaon Ana Kairoro Tatan
Tatan e teimatoa n te bong aei ni kataia ni kaitaraira ao ni mwamwanaira. Aikai tabeua kawai ni karaoan aei:
1. Te Kariiri
E tangiria Tatan ni katikui iango aika aki itiaki ao n aki iraorao inanon kawaira. E tangiri bwaai aikai bwa a na rin n ara iango ao ni karaoira bwa ti na karaoi. Ti kona n totokoa te kariiri aei man tuangan Tatan bwa e na nako (taraa ana rongorongo Unimwaane Stevenson n te iteraniba 4). Teuana te kabanea ni korakora ni kamanomano ni kaitara te kariiri bon te tataro n tainako (taraa Aramwa 13:28; 3 Nibwaai 18:15). Ti kona naba ni wareki ao ni kamatebwai booki aika tabu. Ana uota te Tamnei nakon nanora, ni manga kakoaua nakoira te bwai ae koaua, ao ni kakorakoraira ni kaitarai kariiri n taai aika ana roko.
2. Keewe ao Mwamwana te Aba
N tabetai Tatan e tuangira bwaai n aron: “Ko tuai man kakaraoi bwaai aika eti,” “Ko bure kakaiaki ao e kangaanga kabwaraakin am bure,” “E bon kangaanga te bitaki,” ke “Akea bonganam ao akea temanna ae tabe iroum.”
Aikai bon taian kewe. Tai kaoauai! Aio te koaua: E tangiriko ao e kukurei iroum te Atua ibukina bwa Natina ngkoe. Kam bon rang n tikiraoii! A mwaiti ami konabwai, ao ngkana ko iria, ana riki bwaai aika raraoi nakoim n am tai aika na roko! E ngae ngkana ko karaoi buure, ko kona n teimatoa ni iai iroum te kantaninga ao, n raonaki ma Kristo, a na bitaki bwaai nakon ae raoiroi.
Ko kona n ataia n tainako ae Tatan e na tuangko taian kewe. Ko kona naba n onimakina te tamnei bwa e na tuangko n tainako te koaua (taraa Iakoba 4:13). Teuana bukina anne ae kakawaki bwa n tainako ti na karekea te Tamnei iroura.
Ti kona naba n atai ao n totokoi ana kewe Tatan man warekan n tainako booki aika tabu ao rongorongo mairouia ara taan kairiiri man te Ekaretia. Ko kona ni karekei kiibu ke taetae ni kauringko koaua ake a totokoa a na kewe Tatan. Ko kona ni kamatenanoi ke ni katikui n te tabo are ko kona n noori n taainako.
3. Te Bwarannano
E tangiria Tatan ngkana ti namakina te bwarannano. E tangiriira bwa ti na kakoaua bwa tera ae na bwara nanora iai e na teimatoa n iriiriira. Ma e aki koaua anne.
Unimwaane Jeffrey R. Holland man te Kooram n Abotoro n te Tengaun ma Uoman e reirei bwa e tangiriira Tatan bwa ti na kakoaua te bwai aei ibukina bwa “[Tatan] e ataia ae e aki kona n rikirake, e aki kona ni waaki rake, bwa aonaaba ae akea tokiia e na aki karekea te kukurei ningabong. Bon te mwaane ngaia ae aki kukurei are e kabaeaki man tianaki arona n aki toki, ao e tangiria bwa ko na aki kukurei naba. Eng, tai butimwaea anne.”1
Tamara are i Karawa ao Iesu Kristo a tangiriko bwa ko na kukurei. Ngkana ti tan Nakoia, A kona ni buokiko ni kaitarai kangaanga ao ni kunea te rau ao te kimwareirei.
Ti Ataia Bwa Antai ae Tokanikai n Tokina
E kaoira te Tia Kamaiiu bwa ti na “[Taraia] n ara iango n taai nako, tai nanououa, tai maaku” (Reirei ao Berita aika Tabu 6:36). Ngkana ti ongo nakon te kakao aei, Ana nanoanga ni kamaiu ao mwakana e na korakora riki nakon ana kairoro Tatan ni mwamwanaira. Ti na aki rekenako ni bwaka n ana mwakuri ni kairoro Tatan. Ti kona ni karekea te ungannano ao te korakora n tokanikai iaon ana kariiri Tatan ao ni kaitarai kakaewenako n te maiu.
A Riai n Aki Raraoma Nanomi, iroun Howard Lyon
E a tia n taekinna te Tia Kamaiu, ““Otan te aba Ngai: ane irai ao e na bon aki nakonako n te roo, ma e na karekea te oota ni kamaiu.” (Ioane 8:12). E taku naba, “Ami b’ai i aon te aba te rawawata: ma kam na kabebetei nanomi; I a tia ni kataea ana kai te aba” (Ioane 16:33).
Iesu Kristo e kona ni uotira rake ao ni kakorakoraira ni kaitarai ana kairoro Tatan are e kataia ni kabongana iaora. Ngkana ti uringa te Tia Kamaiu ao Ana reirei, ti kona n norii ni kabane ana iango Tatan ni kewe ao ni mwamwana te aba ao n noori “bwaai ngkai” (Iakoba 4:13).