“Karaoan Bwaai ibukin te Kimwareirei,” Ibukin Kakorakoraia Kairake, Tianuare. 2022.
Karaoan Bwaai ibukin te Kimwareirei
Te ataeinimwaane mai Tiaman e kunea te atatai, te tikiraoi n taraakin bwaai, ao te kimwareirei n aekakin nako taabo—ao ngke e kunei, e tibwauai.
E mwakuri Patrick iaon katotoon intinin ana kaa.
Te tamnei iroun Julian Klemm
Patrick L., 16, mai Bavaria, Germany, e taku bwa ana bwai n te reirei ae mamate nanona iai bon te math, physics, ao te chemistry. Ni koauana, e tangira te tiaenti n ae korakora ngaia are e tangiria n tibwauaia ma tabeman man korean te boki iaon taekan te physics (iaon thermodynamics ao magnetism, bwa a na rangi ni mataata raoi).
E tangiria n riki bwa te intiniia ibukin ana mwakuri, ni karaoi bwaai ni mwakuri n aron intinin bwaai aika buti. (Ma ko na ataia bwa, aia etukuata taan karao kaa BMW ao Audi bon ti teuana ao teuana ma teiterana te aoa raroana man te tabo are e maeka iai.)
Ma tiaki ti te tiaenti te tabo ae e na kona Patrcik ni kunea iai te korakora, ao bwaai aika kamimi.
Te Tiaenti ao te Kario Iango
Eng, e korakora tangiran te tiaenti iroun Patrick, ma mamaten nanona e riaon baika aaki irekereke ma aron te aomata, koaua aika itiaki ao tein taian ware.
“I a tia ni korea te boki iaon te physics, ma ngkai I a korea te boki ae oin au kario,” e kabwarabwara. “Te boki ae I koreia bon taekan maan ni kaakang aika kamimi ao aia aonaaba. Ao ngkanne iai tabeman kairake aika a buoka katokan te kangaanga.”
Te mwakuri ae kakaraoaki itinanikun te tai aei e reke iroun Patrick man tangiran karaki ni karioa n aron Harry Potter ao Percy Jackson ake a reireitaki. Korean booki irarikin are bon oin ana mwakuri bon te bwai ae e tangiria ni karaoia Patrick imwiin are e tuangnga ai tamana te kakukurei ae reke mai iai. “E karina irou ana namakin n te kukurei aei,” e taku Patrick.
Te aeka ni kukurei anne e kaira Patrick n anai bwaai ake e a tia n reiakin iaon taekan tuua ao koauan te aonaaba ao ni korea te boki ibukiia. E karikia naba bwa e na tangiria ni korea te karaki ae moan te kamimi. Ao akea te kaitara n te bwai aei. E taraa n ae Patrick e ataia ae te koaua ao te tikiraoi ao te kakimwareirei a kona n reke n taabo aika mwaiti. Ao e tangiria n kakaei, karaoi, ao n tibwauai bwaai aikanne n taabo ake a mena iai.
Te Aonaaba Aei
Patrick e rangi n atai tuan te aonaaba. Ma e taraa riki ake a riaon bwaai aika a kakoauaaki n noori bwaai aika tikiraoi ikekei.
“I maeka irarikin te buakonikai,” e taku. “Anne raoiroin te maeka n te kawa ae uarereke—ko kona ni waekoa n nakon te buakonikai ao ni kakaea te rau ikekei.”
E tangiri kawain buakonikai aika mwaiti ibukin te nakonako ke, riki, te bwatika. “I tangiria ni bwatika. Bon te bwai ae I tatangiria ni karaoia,” e taku. “I aki toki ni bwabwatika. I bwatika n te taina n te raroa ae 1,200 kiromiita [745 te maire] inanon uoua te wiiki.”
Te tiaenti e kakorakora nanon Patrick, ao te tataro e kakorakora tamneina. “Iai au koaua ae korakora ibukin te tataro,” e taku. “Ko kona n taetae nakon [Tamara are i Karawa] n taabo nako.”
N tabetai e tangiria n nako n nakonako ke ni bwatika n te buakonikai ma ana utu (Tinana, Tamana, uoman tarina aika uarereke riki, ao uoman mwanena aika uarereke riki) ke ma ti tamana. N angiin te tai e nako bon ti ngaia. Ma e aki toki ni kunea te rau ao tikiraoin bwaai n te aba.
“Otintaai e bon rang n tikraoi ikai,” e taku. “N tabetai ko kona n noora rinanin taubukin maunga mai ikai e ngae ngke a rangi n raroanako. Ao ngkana e oti taai, e oota tamnein taai, ao ma maunga, ko nora karawa ae uraura, ao e bon rang n tikiraoi.”
Te Aeka n Atatai Riki Teuana
Irarikin koaua n te tiaenti ao tikiraoin te aonaaba, e kakawaki naba iroun Patrick te koaua—te aeka ni koaua are e kona ni kuneaki ti rinanon te tataro.
“Iai au koaua raoi iaon te tataro,” e taku Patrick. “I katorobubua, boti baiu, karekea te rau ao te aki karongoa, ao ngkanne I tataro. Anne te bwai ae e korakora iai au koaua.”
E kabwarabwara bwa e reke ana koaua teutana man te bwai are e tuangaki n ana kakabwaia te tamanuea. “E taekinaki bwa n na ururingnga n tainako ae Tamara are i Karawa rinanon te tataro E kaan ao n tauraoi n ongo,” e taku. “Ko kona n taetae nakoina n taabo nako. E mena ikekei ibukim n taabo nako, ao ko kona ni karekei kaeka n taabo nako.”
Ana taneiai ni karekean kaeka nakon te tataro e rikirake, e taku, ngkana e karaoi mwaneka tabeua. “I namakina te Tamnei ae Raoiroi ae korakora ma tabeua tataro. Ngkana I iangoia raoi ni katei au kouru, iangoi raoi au titiraki, ao ni iangoia raoi n tekateka ni karaoa are taekinaki ni booki aika tabu, ao tataninga ao anga te tai—ngke I kona ni karaoa anne, I aki toki ni karekea te koaua ae korakora ao n namakina te Tamnei ae Raoiroi.”
E uringnga Patrick teuana te tai ngke e karaoa te tataro ae onoti. “E bane ara tai ni maroroakina taekan Iotebwa Timiti bwa e kanga ngke 14 ana ririki n tataro ao ni karekea te kaeka,” e taku. “Ao ngaia ae I tekateka—I nako naba nakon te buakonikai—ao I tataro. Ao I karekea te kaeka. Imwina ao I kukurei. Ao anne ae kakorakoraa au koaua.”
Tibwauaan Te Bwai ae E Ataia
N aron ae e ukoria n tibwaua ana atatai n te tiaienti ao ana kakauiango, Patrick e ukoria naba bwa e na tibwaua ana atatai n tamnei.
Ni moa ngke 12 ana ririki, e a tia ni kabanea ana tai ni buokiia mitinare aika bwanin aia tai. E kaoa naba raoraona n te taina nakon mwengana bwa e na karekea aia reirei mitinare. “Ti taekina taekan Kaokan bwai. Iai nanona iai. E kakauongo raoi ao e ira te waaki ao e wareki booki aika tabu. Ti wareka Iakobo 1:5, are e a tia naba Iotebwa Timiti ni warekia. Ao I tuangnga bwa e na wareware man Iotebwa Timiti—Rongorongo. E bon rang karaoia raoi.”
Raoraona n te reirei a karinea ana aro. “Irarikin are a kakaitaraa te Ekaretia, a boutokaia,” e taku. Riki ana tia reirei n ana kiraati n taekan te aro a boutokaia. “N ana iango ao e taku bwa e raoiroi bwa iai au onimaki iroun te Atua ao e buokai ni kakoroi nanon au kouru.”
Imwin banen ana reirei ao n tau ibukin ana reirei n te iuniwetiri, e baireia naba Patrick bwa e na beku bwa te mitinare ae bwanin ana tai. “N na katauraoi man warekan Tataekina Au Euangkerio,” e taku. “I tangiria n reitinako n ataibwai ao n rangi ni mataata ao ni wareware, karaoi reirei, ao ni kabanea naba te tai ae bati ma mitinare.”
E tangiria Patrick ni karikirakea ana karioiango. E korea naba te boki ae bon oin ana kario.
Ae Tamaroa Rongorongona
E a tia n reiakinna Patrick bwa a rawata bwaai ikekei aika a “raoiraoi, ae kakateke, ke ae tamaroa rongorongona ke kamoamoaki,” ti na ukoukori bwaai aikai (Taekan te Onimaki 1:13). Ao ngkana e kunei bwaai aikai, e tibwauai.
Tao inanon te tiaenti, te karioiango, ke n tein te aba, e kunei atatai aika kakukurei ao n rianako tikiraoia n are e nori n tainako. Ao e kunea te kabanea n rietata n atatai, tikiraoi, ao te koaua rinanon ana reitaki ma Tamara are i Karawa ao Iesu Kristo.