Թեման և ես

Երիտասարդները կիսվում են, թե ինչպես են ապրում Երիտասարդ կանանց և Ահարոնյան քահանայության քվորումի թեմաների խոսքերով:

Ես գիտեմ իմ արժեքը

«Ես երկնային ծնողների սիրելի դուստրն եմ»:

Ջիհան Ջոնսոն

Լուսանկարը՝ Քրիստինա Սմիթի

Ջամայկայի շատ մասերում իմ նման ուսանողները պետք է քննություն հանձնեն` իրենց ցանկացած ավագ դպրոցն ընդունվելու համար: Ես ու ընկերներս տքնաջան պարապեցինք, որպեսզի կարողանայինք ընդունվել լավագույն ավագ դպրոցը: Երբ ես սկսում էի կասկածել, թե արդյո՞ք կկարողանայի դա անել, մայրիկս միշտ խրախուսում էր ինձ: Նա հիշեցնում էր ինձ, որ ես Երկնային Հոր զավակներից մեկն եմ, և Նա կօգնի ինձ գնալ ճիշտ ուղիով:

Իմ քննության արդյունքները եկան, և ես ստացել էի հնարավոր բարձր թվանշանները: Ես շատ ոգևորված էի, քանի որ դա նշանակում էր, որ ես կլինեի իմ բոլոր ընկերների հետ:

Բայց շուտով պարզվեց, որ իմ ընկերուհիներից մեկը բավակաչափ բարձր միավորներ չէր հավաքել: Մենք բոլորս այնքան տխրեցինք, որ նա չէր կարող մեզ հետ գալ: Բայց ես ուրախացա` հիշելով այն, ինչ մայրս էր ուսուցանել ինձ: Իմ ընկերուհին ևս Երկնային Հոր հիանալի դուստրն էր, և Նա նրան ևս կօգներ՝ անկախ ստուգարքի միավորներից:

Իմ ոգևորությունն անցավ, երբ ընկերուհիս սկսեց ասել բոլորին, որ ես արժանի չէի ընդունվելու ավագ դպրոց, որ ինքը պիտի անցներ իմ փոխարեն: Իմ ընկերների մեծ մասը նրա կողմն անցան և դադարեցին ինձ հետ շփվել: Ես սկսեցի կասկածել ինքս ինձ։ Արդյո՞ք ես իսկապես արժանի էի ընդունվել:

Ես մտաբերեցի, թե մայրս ինչ էր սովորեցրել ինձ. որ ես Երկնային Հոր պատկերով առանձնահատուկ զավակ եմ:

Ես այժմ նոր դպրոցում եմ և նոր ընկերներ ունեմ: Նրանք աջակցում են ինձ և հիշեցնում ինձ իմ արժեքը: Ես հասկացա, որ նշանակություն չունի, թե ինչ են ուրիշներն ասում իմ մասին: Ես երջանիկ եմ, երբ փորձում եմ լինել այն անձնավորությունը, որ Աստված է ցանկանում, որ ես լինեմ, քանի որ ես էլ եմ նույնը ցանկանում:

Հեղինակն ապրում է Ջամայկայում: