«Հաղթահարելով սատանայի մարտավարությունը», Երիտասարդներին զորացնելու համար, հունվար 2022 թ.։
Եկ, հետևիր ինձ
Հաղթահարելով սատանայի մարտավարությունը
Սատանան անում է հնարավոր ամեն ինչ, որպեսզի խաբի մեզ: Բարեբախտաբար մենք ունենք աստվածային օգնություն` նրա թակարդներից խուսափելու համար:
Աճպարարը չրխկացնում է մատները, և գունդն անհետանում է հենց քո աչքերի առաջ:
Ապշեցուցիչ է:
Ապա դատարկ գլխարկից նա դուրս է քաշում մի նապաստակ, և օդում սավառնող ինչ-որ բան է հայտնվում:
Վա՜յ: Ինչպե՞ս է նա անում այդ:
Աճպարարները հասկացել են, թե ինչպես կարելի է մարդկանց հավատացնել, որ իրենք ականատես են եղել մի անհնարին բանի, երբ իրականում նրանք տեսնում էին միայն այն, ինչ աճպարարը ցանկանում էր, որ նրանք տեսնեին:
Դա ճիշտ է: Մոգերը իրականում իրենց օգնականներին չեն սղոցում երկու կեսի: Նրանք գտել են խելացի հնարքներ՝ մեզ խաբելու համար, որ կարծենք, թե տեսել ենք մի բան, որն իրականում տեղի չի ունեցել: Գաղտնի ստերը՝ պատրանքների և խաբկանքների մեջ:
Չնայած այս բոլորն արվում է ուրախության և զվարճանքի համար, սակայն այլ տեսակի պատրանքներն ու խաբկանքները վտանգավոր են՝ ինչպես ֆիզիկապես, այնպես էլ հոգևորապես:
Վտանգավոր աճպարար և խաբեբա
Սատանան թշնամի է ամեն արդարության և չի ցանկանում, որ որևէ մեկը հետևի Երկնային Հորը և Հիսուս Քրիստոսին: Նա ցանկանում է, որ մենք թշվառ լինենք, ինչպես որ ինքն է թշվառ (տես 2 Նեփի 2.27):
Սա իրականացնելու համար նա անում է հնարավոր ամեն ինչ, որպեսզի մեզ ստիպի կասկածի տակ դնել կամ անտեսել հավերժական ճշմարտությունները: Նա անխնա աշխատում է, որպեսզի շփոթեցնի մեզ, և մենք հավատանք, որ բարին չար է և չարը բարի (տես Եսայիա 5.20): Այդ պատճառով նա երբեմն հայտնի է, որպես ստերի հայր և մեծ խաբեբա (տես Մովսես 4.4): Եվ նա դա անում է վաղուց, երկար ժամանակ:
Անկում
Եդեմի պարտեզում Աստված պատվիրեց Ադամին ու Եվային չուտել բարու և չարի գիտության ծառի պտղից: Եթե նրանք անեին դա, ստիպված կլինեին լքել Եդեմական պարտեզը և, ի վերջո, կմահանային: Բայց Աստված ասաց նրանց, որ նրանք կարող էին ընտրել (տես Մովսես 3.16–17):
Սատանան ուզում է կործանել Աստծո ծրագիրը։ Նա փորձեց դա՝ գայթակղելով Եվային ուտել արգելված պտուղը: Նա ստեց և ասաց, որ Եվան չի մահանա (որն ուղղակիորեն հակադրվեց նրան, ինչ Աստված էր ասել): Նա նրան ասաց նաև կիսաճշմարտություններ (տես Մովսես 4.11):
Ի վերջո, և՛ Ադամը, և՛ Եվան կերան պտուղը և դուրս նետվեցին Աստծո ներկայությունից։ Սուրբ գրությունները սա անվանում են «հոգևոր մահ»: Նրանք նաև դարձան մահկանացու, որը նշանակում է, որ նրանք կարող էին ֆիզիկապես մահանալ: Սա հայտնի է որպես Անկում:
Որպես Ադամի ու Եվայի հետնորդներ՝ մենք ևս բաժանված ենք Աստծո ներկայությունից և ենթակա ենք ֆիզիկական մահվան: Մենք նաև փորձվում ենք կյանքի դժվարություններով և սատանայի գայթակղություններով:
Գուցե այս ամենը վատ բան է թվում, բայց Անկումը Երկնային Հոր ծրագրի կարևոր մասն է: Այն մեզ սովորելու և աճելու հնարավորություն է տալիս` օգտագործելով բարին գործելու մեր ազատ կամքի ընտրությունը: Եվ երբ մեղանչենք, Հիսուս Քրիստոսի և Նրա Քավության շնորհիվ մենք կարող ենք ապաշխարել ու պատրաստվել ստանալ հավերժական կյանք: Այն ամենը, ինչ պատահեց անկման հետևանքով, Հիսուս Քրիստոսը ուղղում է: Սատանան չկանգնեցրեց Աստծո ծրագիրը։
Հաղթահարելով սատանայի մարտավարությունը
Սատանան շարունակում է այսօր` փորձելով հնարքներ գործել և խաբել մեզ: Ահա մի քանի եղանակներ, որոնցով նա անում է այդ.
1. Գայթակղություն
Սատանան սիրում է անմաքուր և չար մտքեր դնել մեր ճանապարհին: Նա կամենում է, որ դրանք մտնեն մեր միտքը և ստիպեն մեզ գործել ըստ դրանց: Մենք կարող ենք դիմակայել այդ գայթակղությանը` ասելով սատանային, որ հեռանա (տես երեց Սթիվենսոնի ուղերձը էջ 4-ում): Գայթակղության դեմ մեր մեծագույն պաշտպանություններից մեկը միշտ աղոթելն է (տես Ալմա 13.28, 3 Նեփի 18.15): Մենք կարող ենք նաև կարդալ և ուսումնասիրել սուրբ գրությունները: Դրանք բերում են Հոգին մեր սրտերի մեջ, վերահաստատում մեզ ճշմարտությունը և ամրապնդում մեզ ապագա գայթակղության դեմ:
2. Ստեր և խաբեություններ
Սատանան երբեմն մեզ ասում է նմանատիպ բաներ. «Դու ոչ մի բան ճիշտ չես անում», «Դու շատ մեղքեր ես գործել` ներվելու համար», «Անհնար է փոխվել», կամ «Դու անարժան ես և ոչ ոք իրականում քո մասին հոգ չի տանում»:
Սրանք ստերեն: Մի հավատացեք դրանց: Ահա ճշմարտությունը. Աստված սիրում է ձեզ, և ուրախանում է ձեզանով, որովհետև դուք Նրա զավակն եք: Դուք հրաշալի մարդ եք։ Դուք այնքան մեծ ներուժ ունեք, և երբ հետևեք Նրան, ձեր ապագան պայծառ կլինի: Նույնիսկ, երբ սխալներ եք գործում, դուք կարող եք հույս ունենալ և Քրիստոսի հետ ուղղել ամեն բան:
Դուք կարող եք միշտ ակնկալել, որ սատանան ձեզ ստեր կասի: Դուք կարող եք նաև Հոգուն վստահել, որ ասի ձեզ ճշմարտությունը (տես Հակոբ 4.13): Դա է պատճառներից մեկը, որ կարևոր է ձգտել միշտ մեզ հետ ունենալ Հոգին:
Մենք կարող ենք նաև ճանաչել և դիմակայել սատանայի ստերին` կանոնավոր կարդալով սուրբ գրությունները և Եկեղեցու ղեկավարների ուղերձները: Դուք կարող եք գտնել սուրբ գրության ոգեշնչող հատվածներ ու մեջբերումներ, որոնք կհիշեցնեն ձեզ այն ճշմարտությունների մասին, որոնք չեզոքացնում են սատանայի ստերը: Կարող եք դրանք անգիր սովորել կամ կախել այնպիսի տեղում, որ կարողանաք հաճախ տեսնել դրանք։
3. Հուսահատություն
Սատանան սիրում է, երբ մենք հուսալքվում ենք: Նա ցանկանում է, որ մենք հավատանք, որ այն, ինչ մեզ հուսալքում է, մշտապես գոյություն կունենա: Բայց դա ուղղակի ճիշտ չէ։
Տասներկու Առաքյալների Քվորումից երեց Ջեֆրի Ռ. Հոլլանդն ուսուցանել է, որ սատանան ցանկանում է, որ մենք հավատանք սրան, քանի որ «[սատանան] գիտի, որ ինքը չի կարող բարեփոխվել, ինքը չի կարող առաջադիմել դեպի «աշխարհներ անվերջ», ինքը երբեք չի ունենա պայծառ ապագա: Նա մի թշվառ մարդ է, ով կապված է հավերժական սահմանափակումներով և ցանկանում է, որ դուք նույնպես թշվառ լինեք։ Դեհ ինչ, մի՛ ենթարկվեք ձեզ թշվառ դարձնելու նրա փորձերին»:1
Երկնային Հայրը և Հիսուս Քրիստոսը ցանկանում են, որ դուք երջանիկ լինեք: Եթե դառնաք դեպի Նրանց, Նրանք կարող են օգնել ձեզ դիմանալ փորձություններին և խաղաղություն ու ուրախություն գտնել:
Մենք գիտենք, թե ով է վերջում հաղթում
Տերը հրավիրում է մեզ «նայել [Իրեն] բոլոր մտորումներում. չկասկածել, չվախենալ» (Վարդապետություն և Ուխտեր 6․36): Երբ մենք ընդունենք այս հրավերը, Նրա քավիչ շնորհն ու զորությունը միշտ ավելի ուժեղ կլինեն, քան մեզ խաբելու սատանայի փորձերը: Մենք չպետք է զոհ գնանք սատանայի մարտավարությանը։ Մենք կարող ենք քաջություն և ուժ ունենալ սատանայի գայթակղությունները հաղթահարելու և կյանքի մարտահրավերներին դիմակայելու համար:
Հիսուսն ասել է. «Ես եմ աշխարհքի լոյսը. Ով որ իմ ետեւից գայ, նա խաւարումը չի գնալ, այլ կեանքի լոյսը կ’ընդունի» (Հովհաննես 8.12): Նա նաև ասել է. «Աշխարհքումը նեղութիւն կունենաք. բայց քաջացէք, ես յաղթել եմ աշխարհքին» (Հովհաննես 16.33):
Հիսուս Քրիստոսը կարող է բարձրացնել և զորացնել մեզ՝ պայքարելու սատանայի ամեն մարտավարութան դեմ, որ նա փորձում է օգտագործել մեր դեմ: Երբ մենք հիշում ենք Փրկիչին և Նրա ուսմունքները, մենք կտեսնենք սատանայի հնարքներն ու պատրանքները և կտեսնենք «բաները, ինչպես դրանք իրականում կան» (Հակոբ 4․13)։