“Talaʻi Atu le Talalelei o le Filemu,” Mo le Malosi o le Autalavou, Me 2022.
Sauniga o le Taeao o le Aso Toonai
Tala’i Atu le Talalelei o le Filemu
O Fuaitau
Talu mai le konafesi mulimuli, o loo faaauau pea faigata i le lalolagi. O loo aafia pea o tatou olaga i le faama’i oti i le lalolagi atoa. Ma i le taimi nei ua luluina le lalolagi i se vevesi. …
Uso e ma tuafafine, e leai se isi taimi ua matua sili ona manaomia ai le talalelei a Iesu Keriso i lo le taimi nei. … Ou te alofa i le Alii o Iesu Keriso ma molimau atu o Lana talalelei e na o le pau lea o le vaifofo tumau mo le filemu. …
…Ua ia i tatou le tiutetauave paia e faasoa atu le mana ma le filemu o Iesu Keriso i tagata uma o le a faalogo ma ē o le a faamuamua le Atua i o latou olaga.
O tagata uma ua osia ni feagaiga ma le Atua ua folafola atu e popole i isi ma auauna atu ia i latou o ē mafatia. E mafai ona tatou faaali atu le faatuatua i le Atua ma saunia i taimi uma e tali atu ia i latou e fesili mai e le uiga “i le faamoemoe o loo ia te [i tatou].” [1 Peteru 3:15]. …
O le asō ou te toe faamautu atu ai ua toe poloaiina e le Alii ia alii talavou agavaa uma lava, ma malolosi ia sauniuni ma auauna atu i se misiona. …
Mo outou tuafafine talavou ma malolosi, o se misiona o se avanoa mamana foi, ae e tuu i le faitalia. …
…Matou te tali leleia foi ulugalii matutua e auauna atu pe a faatagaina ai e o latou tulaga. …
O faifeautalai uma latou te aoao ma molimau atu e uiga i le Faaola. O le pogisa faaleagaga i le lalolagi ua matua manaomia atili ai le malamalama o Iesu Keriso i lo se isi lava taimi muamua. E manaomia e tagata uma le avanoa e iloa ai e uiga i le talalelei toefuataiina a Iesu Keriso.