“Ā Tatou Mea Uma Mai Le Loto,” Mo Le Malosi o le Autalavou, Me 2022.
Sauniga o le Aoauli o le Aso Sa
Ā Tatou Mea Uma Mai Le Loto
O Fuaitau
O le avea ai ma se soo o Iesu Keriso e le na o se tasi o le tele o mea tatou te faia. O le Faaola o le mana faaosofia i tua atu o mea uma tatou te faia. …
Ae faapefea le tele o galuega ma tiutetauave ua matua pisi ai o tatou olaga? …
“Ua silafia e lo outou Tamā o i le lagi e aoga ia mea uma ia te outou.
“Ae ia outou muai saili le malo o le Atua ma lana amiotonu, ma o le a faaopoopo atu ia te outou nei mea uma” [3 Nifae 13:32–33; tagai foi Mataio 6:32–33].
Ae e le faapea ai e le mafai ona fai. E manaomia ai uma le ositaulaga ma le faapaiaga.
E manaomia ai le lafoai ese o nisi mea ae tuu atu le avanoa i isi mea ia tuputupu a’e.
… O le ositaulaga o lona uiga o le lafoai o se mea ina ia faasaoina ai se isi mea e sili atu ona taua. …
O le faapaiaga e ese mai le ositaulaga i se auala taua se tasi. Pe a tatou faapaiaina se mea, tatou te le tuua ina ia faaumatiaina i luga o le fatafaitaulaga. Ae, tatou te faaaogaina i le galuega a le Alii. Tatou te faapaiaina ia te Ia mo Ona faamoemoega paia. …
Pe a tatou vaai i o tatou olaga ma vaai i le selau o mea e fai, tatou te lagonaina le lofituina. Pe a tatou vaai i se mea se tasi—alofa ma auauna atu i le Atua ma Ana fanau, i ni auala eseese se selau—ona mafai lea ona tatou galulue i na mea ma le olioli.
O le auala lenei tatou te tuu atu ai o tatou agaga atoa—e ala i le ositaulagaina o soo se mea o loo taofiofia i tatou i tua ma faapaiaina isi mea uma o totoe i le Alii ma Ona faamoemoega.