“O Lo Tatou Sootaga ma le Atua,” Mo le Malosi o le Autalavou, Me 2022.
Sauniga o le Taeao o le Aso Sa
O Lo Tatou Sootaga ma le Atua
O Fuaitau
E le tatau ona tatou mafaufau i le fuafuaga a le Atua o se masini faifaatau faalevateatea tatou te (1) filifili ai se faamanuiaga moomia, (2) tuu i totonu se aofaiga o galuega lelei, ma (3) vave ai loa ona tiliva mai le oka. …
O lo tatou salamo ma le usiusitai, o a tatou taulaga, ma a tatou galuega lelei e taua. Tatou te mananao e i ai faatasi ma i latou na faamatalaina e Eteru “e faatumulia pea i galuega lelei.” [Eteru 12:4]. Ae e le faapea ona o faitauga o loo tausia i tusi faamaumau faaselesitila. E taua nei mea ona e faaaofia ai i tatou i le galuega a le Atua, ma o auala foi ia tatou te galulue faatasi ai ma Ia i lo tatou lava faaliliuga mai le tagata natura i le tagata paia. O le mea ua ofo mai e lo tatou Tama Faalelagi ia i tatou o Ia lava ma Lona Alo, o se sootaga vavalalata ma tumau ma i La’ua e ala i le alofatunoa ma le puluvaga a Lona Alo, o Iesu Keriso, lo tatou Togiola.
… E naunau lo tatou Tama e taiala i tatou taitoatasi i luga o Lana ala o feagaiga ua i ai laasaga ua mamanuina e tusa ma o tatou manaoga taitoatasi, ma ua fua faatatau i Lana fuafuaga mo lo tatou fiafia taualuga ma Ia. …
Ae tusa lava, e le mafai lava ona faigofie lenei ala mo se tasi o i tatou. E matua tele naua le faagasologa o le faaleleia e manaomia ina ia faigofie ai. …
O le mea lea, i le lotolotoi o le afi a le tunu auro, nai lo le ita i le Atua, ia faalatalata atu i le Atua. Valaau atu i le Tama i le suafa o le Alo. Savavali faatasi ma i La’ua i le Agaga, i lea aso ma lea aso. Tuu atu ia i La’ua pe a mavae se taimi e faaali mai lo La’ua faamaoni ia te oe. Sau ma le faamaoni ia iloa i La’ua ma ia e iloa moni oe lava. Ia Faamuamua le Atua.